LISON 10

Ki Mannyè Mitin Témwen Jéhova Sa Édé’w?

JWÉ

Ès ou ja atandé mitin Témwen Jéhova? Si ou p’òkò atandé yonn an sé mitin-lan pitèt ou an ti miyèt pè, paski ou pa sav sa ki ka fèt an sé mitin-lan. Pitèt ou pé mandé: ‘Pouki sé mitin-lan enpòtan? Pouki mwen sipozé atandé?’ An lison sala, ou kay wè mannyè ou sa vansé pli pwé Bondyé èk sé bennéfis-la ou kay twapé lè ou atandé sé mitin nou-an.

1. Pouki Témwen Jéhova ka asanblé ansanm?

Bib-la ka di nou pli gwo wézon-an moun té ka asanblé ansanm an tan lontan. Sam 22:22 di: “Mwen kay lévé nonʼw lè mwen asanblé èk yo”. Menm kon an tan lontan, jòdi, Témwen Jéhova ka asanblé ansanm. Toulé simenn, owon latè-a yo ka asanblé ansanm pou chanté, pwédyé èk pou glowifyé Bondyé. Èk osi, twa fwa pa lanné yo ka asanblé ansanm an gwo gwoup pou adowé Bondyé. Tout sé mitin sala ka ba yo an chay lajwa.

2. Kisa ou kay apwann an mitin Témwen Jéhova?

An mitin Témwen Jéhova, nou ka toujou sèvi Pawòl Bondyé, nou ka ‘èspliké’y byen èk . . . fè sé moun-lan konpwann li.’ (Li Néhimaya 8:8.) Lè ou atandé sé mitin-lan ou kay apwann konsèné Jéhova èk adan an sé bèl kawaktè’y-la. Pli ou vini konnèt mannyè Jéhova enmen’w, sé pli ou kay vansé pwé’y. Osi, ou kay apwann mannyè Jéhova sa édé’w ni lapé an lavi’w.—Izaya 48:17, 18.

3. Ki mannyè moun nou jwenn épi, èk palé épi an sé mitin-lan sa édé nou?

Sé Jéhova menm ki ka di nou pou “toujou katjilé ki mannyè pou nou sa ankouwajé yonn a lòt pou enmen èk pou fè sa ki bon. Annou pa néglijé asanblé ansanm kon lézòt ka fè”. (Hibrou 10:24, 25) An sé mitin nou-an ou kay jwenn épi moun ki vwéman enmen yonn a lòt, èk ki entéwésé pou apwann pli konsèné Bondyé menm kon ou. Sé diskou-a èk sé wimak-la ou kay tann diwan sé mitin-lan bazé asou Bib-la, èk yo kay enkouwajé’w an chay. (Li Ronm 1:11, 12.) Osi ou kay palé épi diféwan moun, ni sa ki mayé, ni sa ki pa mayé. Èk ou kay wè mannyè yo ni lakontantman, magwé yo ni pwòblenm. Wi, sa sé annèk déotwa wézon pouki Jéhova vlé nou asanblé ansanm an sé mitin-lan!

ANNOU APWANN PLI

Apwézan, nou kay apwann kisa ki ka fèt an mitin Témwen Jéhova. Èk osi nou kay apwann, pouki i enpòtan pou fè tout sa nou pé pou atandé sé mitin sala.

4. Mitin Témwen Jéhova

An pwèmyé syèk-la Kwityen té ka toujou vini ansanm pou adowé Jéhova. (Ronm 16:3-5) Annou li Kòlòsé 3:16, èk apwé nou kay kozé asou kwèsyon sala:

Ki mannyè sé Kwityen-an an pwèmyé syèk-la té ka adowé Jéhova?

Jòdi, Témwen Jéhova ka toujou jwenn ansanm pou adowé Jéhova. Ès ou vlé apwann pli konsèné kisa ki ka pwan kou an sé mitin nou-an? Annou gadé VIDIYO-A, Ki sa ki ka Pwan Kou an sé Mitin Nou-an? Apwé nou gadé vidiyo-a, nou kay gadé an pòtwé ki ka moutwé sa ki ka pwan kou diwan an mitin. Èk nou kay kozé asou sé kwèsyon sala:

VIDIYO: Ki sa ki ka Pwan Kou an sé Mitin Nou-an? (2:12)

Ès sa ou li an Kòlòsé 3:16 ka pwan plas an sé mitin nou-an?
Lè ou té gadé vidiyo-a ében pòtwé-a, ès la té ni pyès lòt bagay ou wè ou kontan?

Annou li 2 Kòrint 9:7, èk apwé nou kay kozé asou kwèsyon sala:

Pouki Témwen Jéhova pa ka mandé pou lajan an sé mitin yo-a?

Ou épi titja’w gadé enfòmasyon-an pou yonn an sé mitin nou-an pou simenn-lan.

Ki pa an mitin-lan ou kwè ou kay enjwi pli?

Ès ou té sav?

Ou sa alé asou jw.org, pou twapé ki koté èk ki lè nou ka tjenn sé mitin nou-an an diféwan péyi owon latè-a.

An sé mitin nou-an, nou ka ni diskou, vidiyo èk étwennman asou mannyè pou pwéché èk enstwi moun. Mitin nou ka koumansé épi fini épi chanson èk lapwiyè
La ni diféwan pa asou pwogwanm-lan moun sa patisipé adan
Népòt moun sa atandé sé mitin-lan. Moun tèl kon fanmi, moun ki pa mayé, moun ki an laj, èk jis ti manmay
Ou pa ni pou péyé pou atandé mitin Témwen Jéhova èk nou pa ka anmasé latjèt

5. Nou ni pou fè éfò pou atandé mitin

Annou konsidiwé ègzanp fanmi Jézi. Yo té ka wèsté an vil Nazawèt. Èk toulé lanné yo té ka atandé Fèt Délivwans-lan an Jérouzalèm. Mé yo té ni pou maché pou twa (3) jou pou atandé fèt sala. Sa sé apipwé swasant (60) lyé. Èk bèl maché sala pa té ézé, paski la té ni an chay moutany pou mouté désann. Annou li Louk 2:39-42, èk apwé nou kay kozé asou sé kwèsyon sala: