PWONY ME 10

Itwero Nongo Adwogi Maber Ango ki i Cokke pa Lucaden pa Jehovah?

TUKI

Tika dong ngat mo olwongi me cito i cokke pa Lucaden pa Jehovah? Ka peya icito i cokkewa, ci itwero bedo ki lworo me cito i cokke pi tyen mukwongo. Itwero bedo ka pennye kekeni ni: ‘Ngo ma timme i cokke magi? Pingo pigi tek? Pingo omyero acit i cokke?’ I pwony man, ibipwonyo kit ma cokke kacel ki jo mukene twero konyi me nyiko cok ki Lubanga dok konyi i kwoni.

1. Tyen lok ma pire tek loyo me cokke kacel obedo ngo?

Nen kong gin ma laco Baibul mo owaco ma nyuto tyen lok ma pire tek loyo ma oweko wacokke kacel ki jo mukene: “Abipako Rwot [Jehovah] i dye lwakke ma gucokke.” (Jabuli 26:12) I yo acel-lu, Lucaden pa Jehovah bene ginongo yomcwiny ki i cokke kacel. I twok lobo ducu, gicokke kacel cabit ki cabit me woro Lubanga, wero wer me pakke, kacel ki lega. Kare mogo, mwaka ki mwaka, gicokke i gure madongo me woro Lubanga.

2. Ngo ma ibipwonyo i cokkewa?

I cokkewa, waketo tamwa i Lok pa Lubanga, kun ‘kigonyo te lokke i yo matir bot lwak.’ (Kwan Nekemia 8:8.) Ka icito i cokke, ibipwonyo lok i kom Jehovah kacel ki kite mamwonya mapatpat. Ka imedde ki ngeyo marre matut piri, ci ibinyiko cok bote. Ibipwonyo bene kit ma en twero konyi me kwo i yo ma kelo boti yomcwiny.—Icaya 48:17, 18.

3. Adwogi maber ango ma itwero nongone ki i ribbe kacel ki jo mukene i cokkewa?

Jehovah ominiwa tira ni omyero ‘watug cwinywa kekenwa i mar ki i tiyo tic mabeco, kun pe waweko cokke kacel.’ (Jo Ibru 10:24, 25) I cokkewa, ibirwatte ki jo mukene ma giparo pi luwotgi dok calo in gin bene gitye ki miti me pwonyo lok i kom Lubanga. Ibiwinyo ka ginywako tam me cuko cwiny adada ma a ki i Baibul. (Kwan Jo Roma 1:11, 12.) Ibibedo ki kare me lok ki jo mukene ma gitye ka lweny ki pekki mapatpat ma jo ma wigi nono ki jo munyome gikato ki iye. Magi aye tyen lok manok i kin mapol ma oweko Jehovah mito ni wabed ka cokke kacel kare ki kare!

NONG NGEC MATUT

Niang kit ma cokke pa Lucaden pa Jehovah bedo kwede ki adwogi mabeco ma ibinongo ka icito i cokke magi.

4. Kit ma cokke pa Lucaden pa Jehovah bedo kwede

I cencwari me acel, Lukricitayo onongo gicokke kacel me woro Jehovah. (Jo Roma 16:3-5) Kwan Jo Kolocai 3:16, ci wunyam lapeny man:

Lukricitayo macon onongo giworo Jehovah nining?

I kare-ni, Lucaden bene gicokke kare ki kare i Odi me Ker ka woro Jehovah. Me neno kit ma cokke magi woto kwede, tuk VIDIO. I nge meno, nen cal ma tye ka nyuto kit ma cokke bedo kwede, ci wunyam lapeny magi.

VIDIO: Ngo ma Timme i Ot me Ker? (2:13)

Jami mene ma ineno marom aroma ma timme i Ot me Ker ki gin ma ikwano i Jo Kolocai 3:16?
Ki i vidio man, nyo cal ma kiketo-ni, tika ineno gin mo ma oyomo cwinyi?

Kwan 2 Jo Korint 9:7, ci wunyam lapeny man:

Pingo pe tye kit ajog mo keken i cokke pa Lucaden pa Jehovah?

Wunyam gin ma kibinyamo i cokke me cabit man kacel ki lapwonnyi.

Gin ango ma i but yub me cokke man ma ogudo cwinyi nyo itamo ni bibedo me kony boti?

Tika onongo ingeyo?

I jw.org, itwero nongo kabedo ki cawa me cokkewa i but lobo ducu.

I cokkewa, wabedo ki pwony ki vidio, dok wanongo pwonnye i kit me tito kwena ki pwonyo dano. Cokke ducu cakke dok gik ki wer ki lega
I but yub me cokke mogo, kipenyo lwak me miyo lagamgi
Kijolo dano ducu—jo me odi, jo ma wigi nono, jo mutegi, ki lutino
Cokkewa ducu tye me nono. Lucaden pa Jehovah pe gipenyo cente i cawa me donyo i cokkegi dok pe girayo ajog

5. Tute matek mitte me bedo tye i cokke

Nen kong labol pa jo gang pa Yecugi. Me a ki i Najaret me cito wa i Jerucalem, onongo mitte ni guwot ki tyengi pi nino adek wek gubed tye i yub mo ma timme mwaka ki mwaka. Onongo giwoto dok gikato ki i kin godi. Kwan Luka 2:39-42, ci wunyam lapeny magi: