10 YATICHÄWI
¿Kunjamsa Jehová Diosan Testigonakapan tantachäwinakapar sarañajj yanaptʼiristam?
¿Jehová Diosan Testigonakapan tantachäwiparojj invittʼapjjerïtamti? Janitï ni mä kutis sarksta ukhajja, inas nayrïr kuti sarañ ajjsarayassta. Inas akham jisktʼassta: “¿Kunsa Testigonakajj tantachäwinakapan lurapjje? ¿Kunatsa tantachasiñajj jupanakatak importantejja? ¿Nayan uka tantachäwinakar sarañajajj wakisirakiti?” sasa. Aka yatichäwinjja tantachäwinakajj kunjamsa Diosan suma amigopäñamatakisa jakañ vidamansa yanaptʼiristam ukwa yatjjatäta.
1. ¿Kunatsa Testigonakajj tantachasipjje?
Tantachasiñajj kunatsa wali wakiskiri uka toqet parlkasajja, Biblia qellqeri mä chachajj akham sänwa: “Nayajj jachʼa congregacionanwa Jehová Diosar jachʼañchäjja” sasa (Salmo 26:12). Jichhürunakanjja Jehová Diosan Testigonakapajj ukhamarakiw tantachasipjje, ukham lurasajj jupanakajj wali kusisitäpjjewa. Aka oraqpachanwa Jehová Diosar adorañatakisa, cancionanakamp jachʼañchañatakisa, orañatakis sapa semana tantachasipjje. Maran mä qhawqha kutejja, jachʼa tantachäwinakaruw sarapjjaraki.
2. ¿Kunsa tantachäwinakan yateqäta?
Tantachäwinakanjja Diosan Arupatwa yatichasi, ukatjja Biblian qellqatäki uka arunakajj kamsañsa muni ukajj qhana amuytʼkañaw qhanañchasiraki (Nehemías 8:8 liytʼäta). Tantachäwinakanjja, Jehová Diosatsa jupajj kunjam chuymanis uka toqetsa jukʼampinakwa yateqäta. Diosajj qhawqsa jumar munastam uka toqet jukʼamp yatisajja, jupan amigopäñ jukʼampwa munäta. Kunjamsa jupajj sum jakasiñatak yanaptʼiristam uka toqetsa yateqarakïtawa (Isaías 48:17, 18).
3. Tantachäwinakan uñtʼkäta uka jilat kullakanakajja, ¿kunjamsa yanaptʼapjjeristam?
Jehová Diosajj akwa mayistu: “Mayninakajj kunjamäsipkisa ukjja amuyapjjapuniñäni, ukhamat munasiñasa suma luräwinakasa jukʼamp utjañapataki. Tantachäwinakasjja janirak jaytanukupjjañäniti” (Hebreos 10:24, 25). Tantachäwinakanjja kunayman kasta jaqenakaruw uñtʼäta, jupanakajj jumjamarakiw Diosat jukʼamp yateqañ munapjje. Ukanjja Bibliat apstʼat chʼamañchtʼkir arunakwa istʼarakïta (Romanos 1:11, 12 liytʼäta). Tantachäwinakanjja kunayman jan waltʼäwinakar saykatiri jilat kullakanakaruw uñtʼäta. Uka razonanakatwa Jehová Diosajj jan faltasis tantachäwinakar sarañas munatap amuytanjja.
JUKʼAMP YATJJATAÑÄNI
Jehová Diosan Testigonakapan tantachäwinakapajj kunjamasa, kunatsa uka tantachäwinakar sarañatak chʼamachasiñasa uka toqenakatwa jichhajj yatjjatañäni.
4. Jehová Diosan Testigonakapan tantachäwinakapa
Nayrïr patak maranakanjja, cristianonakajj Jehová Diosar yupaychañatakiw tantachasipjjerïna (Romanos 16:3-5). Colosenses 3:16 liytʼasajja aka toqetwa parltʼapjjäta:
-
¿Kunjamsa nayrïri cristianonakajj Jehová Diosar adorapjjäna?
Jichhürunakanjja Testigonakajj ukhamarakiw Diosar adorañatak lugaranakan sapa semana tantachasipjje. Tantachäwinakapajj kunjamasa uk yatiñatakejja, VIDEO uñtapjjäta. Ukatjja kunjamsa tantachasipjje uk dibujon uñjjattʼasajj aka toqetwa parltʼapjjäta:
-
¿Kunanakatï tantachäwinakan luraski ukampi, kuntï Colosenses 3:16 textojj siski ukampejj kunansa pachpakïpjje?
-
Uñtktan uka videorjamasa jan ukajj dibujorjamasa, ¿kunas tantachäwinakat jumar wal gusttamjja?
2 Corintios 9:7 liytʼasajja aka toqetwa parltʼapjjäta:
-
¿Kunatsa Jehová Diosan Testigonakapan tantachäwinakapan qollqejj jan mayiski?
Kuna toqenakatsa jichha semanajj tantachäwin yatjjatasiskani uk yatichirimampi uñakipapjjam.
-
Uka tantachäwin yatjjataskani uka yatichäwinakatjja, ¿kawkïris jumar yanaptʼiristam, jan ukajj kawkïrsa yatiñ munasma?
¿Yatiyätati?
Internetan jw.org cheqanjja, kawkjanakansa kuna horasanakansa tantachäwinakajj oraqpachan apasi ukwa thaqtasma.
-
Tantachäwinakanjja arstʼäwinaka, demostracionanaka, videonakaw uñjasi. Taqe tantachäwinakaw mä cancionampi mä oracionampi qalltasi, tukuyarojj uka pachpaw lurasiraki.
-
Tantachäwin yaqhep partenakapanjja, tantachasirinakajj arstʼapjjarakispawa.
-
Tantachäwinakar sariri chachanakasa, warminakasa, jilïrinakasa, waynanakasa, tawaqonakasa, wawanakas wali suma katoqtʼatäpjjewa.
-
Jehová Diosan Testigonakapan tantachäwinakapanjja, janiw qollqejj apthapiskiti.
5. Tantachäwinakar sarañatakejj chʼamachasiñaw wakisi
Jesusan familiapat amuytʼañäni. Jupanakajj Nazaret markanwa jakapjjäna, Jerusalén markankir templor sarañatakejja sapa maraw qollunaknam kimsa urunak sarapjjañapäna. Lucas 2:39-42 liytʼasajja aka toqetwa parltʼapjjäta:
-
¿Jerusalén markar sarañajj chʼamäpachänti?
-
¿Tantachäwinakar jan sarañamatakejj kunanakas jarkʼtamjja?
-
¿Tantachäwinakar sarañatak chʼamachasiñajj wakisiw sasmati? ¿Kunatsa ukham amuyta?
Jehová Diosar adorañataki tantachasiñajj wali wakiskiriwa sasaw Bibliajj yatichi. Hebreos 10:24, 25 liytʼasajja aka toqetwa parltʼapjjäta:
-
¿Kunatsa tantachäwinakar jan faltasis sarañasa?
YAQHEPANAKAJJ AKHAM SAPJJEWA: “Diosar adorañatakejja, janiw mayninakamp tantachasiñajj wakiskiti” sasa.
-
¿Bibliankir kawkïr textosa, jan ukajj kuna sarnaqäwis Jehová Diosajj tantachäwinakar sarañas munatap uñachtʼayi?
¿KUNSA YATEQAWAYTAN?
Tantachäwinakar sarañajja, Jehová Diosar jukʼamp sum uñtʼañataki jupamp suma amigöñatakiw yanaptʼätam, mayninakamp chikaw jupar adorarakïta.
Amtañataki
-
¿Kunatsa Jehová Diosajj tantachäwinakar sarañatak invittʼistu?
-
¿Kunsa Jehová Diosan Testigonakapan tantachäwinakapan yateqäta?
-
¿Kunjamanakatsa tantachäwinakajj jumar yanaptʼiristam?
JUKʼAMP YATJJATAÑAMATAKI
¿Tantachäwinakar sarañ ajjsarayastati? Mä chachajj tantachäwinakar sarañ qalltan ajjsarayaskchïnsa, qhepat kunatsa ukar sarañ wal munjjäna uk videon uñtam.
Kunatsa mä waynarojj tantachäwinakar sarañajj wal gustäna, kunanaksa tantachäwinakar saraskakiñatakejj jupajj luräna uk videon uñtam.
Tantachäwinakar sarañat yaqhepanakajj kamsapjjesa uk yatjjatam.
“¿Por qué estaría bien ir a las reuniones en el Salón del Reino?” (Artículo de jw.org)
Jehová Diosan Testigonakapan tantachäwipar nayrïr kuti sarañajja, kunjamsa lunthatasiri wali nuwasir mä jaqerojj yanaptʼäna uk yatjjatam.
“Kawkjarus pistola aptʼatapuniw sarirïta” (Yatiyañataki julio 1, 2014)
Akanakajj inas gustarakiristam
KUNANAKSA JUKʼAMP JISKTʼASIPJJE
¿Kunjamsa Jehová Diosan Testigonakapajj Bibliat yatichapjje?
Jehová Diosan Testigonakapajj gratisakiw Bibliat yatichapjje, kawknïr Bibliampis yateqañ munta ukajj jumatäjjewa. Jumamp chika yateqapjjañapatakejja, taqpach familiamaruw invittʼasma, amistadanakamarus invittʼarakismawa.
