FARKARKOR 10
Payamyum Rosai Nari Wasmai ro Saksi-Saksi Yahwe Sya Fananjur Ari Sena?
Wakso ro Saksi-Saksi Yahwe sya fananjur ari sena ro ras oso kwar ke? Wakso ḇaim ido, rya nari wamgak kero kukro insape wakso randak. Na Ausya wafuken radine: ’Fananjur ari sena moḇsa naksnai rai? Fananjur senane nefandun kaku ke? Yaso ido, payamyum rosai nari yaksmai ya?’ Ro farkarkor ine, nari kofarkor moḇsa fananjur ari senane nafnoḇek Au fa fanam syadi ḇe Manseren Allah. Nari kawos kako payamyum rosai na waksmai ro fananjur ari ine.
1. Rosai ḇefnai kaku fa Saksi-Saksi Yahwe sya sfanjur kayame?
Manfasfas Mazmur fyasnaiḇair roi ḇefnai kaku fa Allah kawasa Ḇyesi sfanjur kayame. Doḇe, ”Ro jemaat ḇeba, nari yasandik Yahwe I.” (Mazmur 26:12) Raris Allah kawasa Ḇyesi ro fafisu naiwara, Saksi-Saksi Yahwe ro baboine sakmarisen fa sfanjur kayame. Ro supswan ine ḇesiper, nari sfanjur rarwan riḇeso ro swaf minggu oser. Ro fananjur senane, nari sisandik Manseren Allah, sidisen, ma senadi. Oso wer ido, ro swaf taun oser, sfanjur ro munara sarawrow ḇeba kaku riḇeso.
2. Rosai na wafarkor ro fananjur ari anine?
Roi nari kofarkor ro fananjur ari ine iso Wos Refo ya. Ma nari komam rariso sfasnaiḇair pyum kakaku ya, ma kakaku ḇyena sbuk na faro ko. (Kowasya Nehemia 8:8.) Wakso fananjur ari ine kada, nari wafarkor fa wafawi Yahwe I ma rari-rari ḇepyum Ḇyena. Na wafarkor roi nabor fa wafawi Yahwe ima iswar Au kaku. Rarirya, nari nafrur fa wafanam syadi faro Yahwe I. Irya monda ḇa, nari wafarkor fa wafawi moḇsa Yahwe isaramper Au fa wasmai payamyum ro kenem ine.—Yesaya 48:17, 18.
3. Payamyum rosai na wasmai kukro bebati kuker snonggaku wasrow ro fananjur ari ine?
Yahwe iwan ko fa ’kokarayae insa kodifyae ko, insa kofrur roi ḇeḇye ma kofasnai saswar ya. Koḇinggwanbur awer fananjur kayam ro ḇaḇeari koḇena’. (Ibrani 10:24, 25) Ro fananjur ine, nari wasrow kuker snonggaku ḇesawarwar. Sima sakmnis ra Au, simarisen sakfarkor nabor fa sifawi Manseren Allah. Nari sbuk wos samarawraw ro Refo ya ḇe Au. (Kowasya Roma 1:11, 12.) Nari wasrow ma wawos kuker snonggaku ḇefarḇuk ḇaim ma ḇefarḇuk kwar. Sisya saksmai samswen kako, fama siryaḇ pdef. Yahwe imarisen koso ari ḇesya kwar insama kosmai payamyum nane kam!
SWEWAR KAKU WER
Nari kawos rosai sifrur ro Saksi-Saksi Yahwe sya fananjur ari sena ma kosewar kaku fa koso ari ine pdef ido, nari kosmai payamyum na.
4. Saksi-Saksi Yahwe sya fananjur ari sena
Snonggaku Kristen ro abad randak siwara sima sfanjur kayam fa sisyom Yahwe I ḇesya kwar. (Roma 16:3-5) Kowasya Kolose 3:16, raimnai kawos fakfuken ine:
-
Rosai snonggaku Kristen ro abad randak siwara sifrur kaku fafisu sfanjur fa sisyom Yahwe I?
Saksi-Saksi Yahwe ro baboine sfanjur kayam rarirya kwar ro moḇ seari ro na. Imbe wakfawi moḇsa seari rai ido, komam VIDIO. Raimnai, komam sonin ro farkarkor ine ḇefasnai roi sifrur ro fananjur ari ma kawos fakfuken suine.
-
Mam ido, roi ḇemnis rosai sifrur ro Balai Kerajaan ma roi wawasya ro Kolose 3:16 ya?
-
Ro vidio insanja ma ro sonin ine, rosai wamarisen ya?
Kowasya 2 Korintus 9:7, raimnai kawos fakfuken suine:
-
Rosai ḇefnai fa sor derma ro Saksi-Saksi Yahwe sya fananjur ari sena ḇa?
Au ma ḇebuk farkarkor ḇe Au, mumam roi nari kawos ro fananjur ari ro minggu meser ine.
-
Manggundaw, farkarkor minsai wamarisen kaku na ḇaido ḇebuk payamyum faro Au?
Wafawi ke?
Ro jw.org, nari wafawi moḇ ma oras sifrur fananjur ari ro supswan ine ḇesiper.
-
Ro fananjur ari, faya, fasasnai faro fararur ḇesren, ma vidio naisya. Serak fananjur ari ine ma sisisen na kuker doya ma nadi
-
Sbuk swaf faro ḇeyakso sya kako fa sakbuk kankarem
-
Snon ke, bin ke, sinan ke, romawa sya ke, sor sikam fa sakrama ro fananjur ari ine
-
Ro fananjur ari nggoḇenane, sor ḇaḇyak ḇa ma derma oḇa
5. Kosewar kaku mande insape bisa koso fananjur ari ine
Kokara mura ro Yesus ma kina ḇyesi kada. Ro taun ḇe taun, sifrur marandan ro mnu Nazaret ḇe Yerusalem fa siso munara Paskah ro rum ari. Na simbranuk bon ḇekaki na ro swaf ras riḇeḇeso. Kowasya Lukas 2:39-42, raimnai kawos fakfuken nane:
-
Kwara ido, Yesus ma kina ḇyesi sifrur marandan ḇe Yerusalem nama napyan ke?
-
Rosai ḇefnai fa swewar kaku mande insape bisa wakso fananjur ari na?
-
Kwara ido, sasewar Bena nbuk payamyum ḇe Au ke? Kwara rarirya kukro?
Refo ya ikofen ḇo doḇe kofanjur fa koḇeari ima roi ḇefandun kaku. Kowasya Ibrani 10:24, 25, raimnai kawos fakfuken ine:
-
Rosai eḇedari koso fananjur ari ya ḇesya kwar?
SIA SOḆE: ”Kora koḇeari ḇa yo, kowasya Refo ma konadi ro rum monda nasrow kwar.”
-
Mnuk ḇaido fawar ḇefasnai Manseren Allah imarisen kofanjur kayam ma kosyom I naisya ro Refo ya ke?
FARKARKOR ḆYENA
Waso ari ya pdef kada, nari wafarkor roi nabor fa wafawi pyum Manseren Allah, wafanam syadi faro I, ma wasyom I fnoḇek snonggaku ḇesesya.
Waswarepen Kaḇer
-
Rosai ḇefnai fa Yahwe imarisen kofanjur kayam fa koḇeari?
-
Rosai monda nari wafarkor ro Saksi-Saksi Yahwe sya fananjur sena?
-
Kwara ido, payamyum rosai na waksmai snar waso fananjur ari ya?
SWEWAR NABOR WER
Imbe waso randak fananjur ari mboi rya wamgak ke? Mam fawar ro snon oso, randak ya imgak fa iso fananjur, fama ḇarpur ya imarisen fa dakso.
Mampan rariso snonkbor oso imarisen iso fananjur ari ma rosai ifrur kaku fa iso na pdef.
Wawasya snonggaku riḇeso sikofenḇair roi ḇefrur fa siso fananjur ari ya.
”Rosai Ḇefnai fa Kora Kakso Ari ro Balai Kerajaan ya?” (Fasfas ro situs jw.org)
Wamarisen Ido Mam Ine Kako
FAKFUKEN RO KAWASA KAM
Moḇsa Saksi-Saksi Yahwe Sya Farkarkor Refo Sena Isnai Rai?
Bisa bepake Refo rosai monda fa wafarkor Refo ḇeyor ḇaḇyak ḇa kuker Saksi-Saksi Yahwe sya. Wamgak awer fa wor kina karyer Bansya kam ḇaido bati Besya fa sakso.
