PELAJAREN 10

Kai Gunana man Bandu Adi Reh Kam ku Perpulungen Saksi Jahwe?

MAINKEN

Pernah nge kam reh ku acara perpulungen Saksi-Saksi Jahwe? Adi lenga pernah, banci saja agak kuatir kam reh ku je. Banci saja tersungkun-sungkun kam, ‘Uga nge kari acara perpulungen e? Engkai maka penting acara e? Kai gunana adi reh aku?’ Bas pelajaren enda, sibahas kari engkai maka reh ku perpulungen banci erban kam reh deherna ras Dibata. Selain si e, lit ka gunana si deban.

1. Engkai maka Saksi Jahwe reh ku perpulungen?

Sekalak penulis Pustaka si Badia nulisken kai alasen si pentingna reh ku perpulungen. Nina, “Bas perpulungen si mbelin, kupuji pagi Jahwe.” (Masmur 26:12) Bage ka pe, gundari Saksi-Saksi Jahwe meriah kel kapna reh ku perpulungen. I belang-belang doni, pulung kalak e dua kali seminggu guna nembah Dibata, rende, ras ertoto. Tiap tahun, lit piga-piga kali ban Saksi Jahwe perpulungen si ndauh teremen asangken biasana, guna nembah Jahwe.

2. Kai nge kari si pelajarindu bas perpulungen kami?

Bas perpulungen, kami erlajar Kata Dibata si ‘iterangken alu jelas janah ikataken kai ertina.’ (Baca Nehemia 8:8.) Adi reh kam, banci pelajarindu kerna Jahwe ras sipat-sipatNa si luar biasa. Reh buena gejapkenndu kekelengenNa, reh deherna kam ras Ia. Pelajarindu ka kari, uga Jahwe banci nampati kam gelah dame geluhndu.—Jesaya 48:17, 18.

3. Uga kalak si jumpaindu bas perpulungen banci nampati kam?

Perentahken Jahwe gelah “siperdiateken sada ras si debanna, gelah siiah-iahen kita bas engkelengi ras ncidahken perbahanen si mehuli.” Janah ikatakenNa ka, “Ula kita la reh ku perpulungen.” (Heber 10:24, 25) Bas perpulungen kami, jumpa kari kam ras kalak situhu-tuhu ermediate man sada ras si debanna. Seri bagi kam, kalak e pe merhat erlajar terbuen kerna Dibata. Banci ka kam terpegegehi arah kai si kataken kalak e bas Pustaka si Badia nari. (Baca Roma 1:11, 12.) Banci ka kam ngerana-ngerana ras kalak si lit i je, la soal singuda-nguda, anak perana, ntah pe si enggo erjabu. Amin pe banci saja lit nge masalah kalak e, tapi tetap meriah ukurna. E me piga-piga alasenna engkai maka perlu kita teratur reh ku perpulungen!

PELAJARI TERBAGESEN

Sipelajari kari uga kin perpulungen Saksi-Saksi Jahwe janah engkai maka erguna man banta adi siusahaken kel reh.

4. Perpulungen Saksi-Saksi Jahwe

Kalak Kristen bas abad pertama teratur pulung guna nembah Jahwe. (Roma 16:3-5) Bacalah Kolose 3:16, kenca si e bahas penungkunen enda:

Uga kalak Kristen bas abad pertama nembah Jahwe?

Gundari pe Saksi-Saksi Jahwe teratur reh ku perpulungen. Guna meteh uga perpulungen kalak e, putar VIDEO. Dung e, nenlah gambar kerna perpulungen, kenca si e bahas penungkunen-penungkunen enda:

VIDEO: Kai si Ilakoken i Bale Kerajan? (2:12)

Sanga nenndu gambar ndai ras bacandu Kolose 3:16, lit nge idahndu persamanna?
Bas video ras bas gambar e, kai ka nge kapndu si menarik kerna perpulungen?

Bacalah 2 Korinti 9:7, kenca si e bahas penungkunen enda:

Engkai maka bas perpulungen Saksi-Saksi Jahwe la lit ipindo biaya kai pe?

Nenndulah bahan si nandangi ipelajari bas perpulungen Saksi Jahwe minggu enda ras kalak si ngajari kam erlajar Pustaka si Badia.

Bagin si apai nge kapndu si menarikna janah si erguna man bandu?

Tehndu nge?

Bas jw.org, banci idahndu ingan ras waktu perpulungen si lit i belang-belang doni.

Bas perpulungen kami lit khotbah, video, bage pe pelatihen guna erberita ras ngajar. Perpulungen imulai ras idungi alu rende ras ertoto.
Bas piga-piga bagin, lit penungkunen si iban man hadirin janah hadirin banci mereken jawapen
Kerina banci reh—dilaki, diberu, si metua, ntah pe si nguda denga
Perpulungen kami la nggalar. Saksi-Saksi Jahwe la lit mindo sen.

5. Usahakenlah reh ku perpulungen

Perdiatekenlah usihen arah keluarga Jesus. Gelah banci reh ku rumah pertoton guna acara perayan tahunen, arus kalak e erdalan kira-kira 100 kilometer ngelewati daerah pegunungen arah Nasaret nari ku Jerusalem. Bacalah Lukas 2:39-42, kenca si e bahas penungkunen-penungkunen enda:

Adi menurutndu, perlu nge kalak e erjuang guna reh ku Jerusalem?
Engkai maka banci saja kam pe arus erjuang gelah reh ku perpulungen?
Lit nge kapndu gunana reh kam ku perpulungen amin gia la menukah? Engkai?

Bas Pustaka si Badia ikataken maka seh kel pentingna reh ku perpulungen guna nembah Jahwe. Bacalah Heber 10:24, 25, kenca si e bahas penungkunen enda:

Engkai maka perlu kita teratur reh ku perpulungen?

LIT SI NGATAKEN: “Labo perlu kita pulung guna nembah Dibata. Bas rumah saja pe kita mbaca Pustaka si Badia enggom bias.”

Gelah siteh uga sura-sura Jahwe kerna perpulungen, ayat si apai nge si banci nampati kita? Contoh si apai nge bas Pustaka si Badia si banci nampati kita?