¿Jehovagi sunmagmalad igar iddoged negse be nanadimoga? Gebbe be nasoggalile sun be dobe iddogeled, sun be binge naerdibe. Degsoggu, sun be binsadaged: “¿Ar ibu nue Jehovagi sunmagmalad igar iddoged neggi durdagleye? ¿Ibigala na e igar iddoged negse naebier iddodamarye? ¿Bule an naed abelemodibeye?”. We lecciongi be durdaggoed, igar iddoged negse nanaed igi be bendaggoe nabir be Bab Dummad ai nuedga guega, nabir be ibmar nuegan durdagbaliga.

1. ¿Ibigala Jehovagi sunmagmalad na e igar iddoged negse nanamala?

Ebbenne dule wargwen Biblia narmasadi weyob sogsa gusad: “Bab Jehova, dulemar onmagmalad abargi, an be nug odummodii guoed” (Salmo 26:12). Aagala, emi ibagi Jehovagi sunmagmalad na e igar iddoged negse nanaed yeer iddodamalad. Iddoged irba na e igar iddoged negse nanamalad we ibmar imaggega: Babse golega, Babga namaggega, Bab igar durdaggega. Birga irba Jehovagi sunmagmalad igar iddoged dummagan imagmarbalid.

2. Be anmar igar iddoged negse nanaele, ¿ibu be durdaggoe?

Anmar igar iddoged neggine, Bab gaya burba nueggwa durdaglesiid (Nehemías 8:8 absogo). Degsoggu, be anmar igar iddoged negse nanamogale, nabir nueggwa be Jehova igar durdasmogaled, aagine be durdagbaloed Jehova dule igi daedi. Be mag iddononiggile igi Bab Dummad be sabgumai, bur bule be e aigala gubi gudamogoed. Anmar igar iddoged neggi be durdagbaloed, igi Bab Dummad nabir be bendasmogale be yeer iddodi guega (Isaías 48:17, 18).

3. Igar iddoged negse nanaedi, ¿igi be bendaggoe?

Jehova anmarga sogmaid, na mussub mussub sabgumaloye, geb igar iddoged negse nanaed mer iggumarbaloye (Hebreos 10:24, 25). Anmar igar iddoged neggi be dulemar nuegan abingudagoed, aa dulemar beyobi alamagnanamogad Bab igar durdaggega. Bibliagine binsaed nuegan nanaid aagine be durdagbaloed (Romanos 1:11, 12 absogo). Anmar igar iddoged neggi be dulemar abirgin nigmalad abingudagoed, abirgin surmalad be abingudabaloed, aamarga ibmar ibigwensur gusurmosoggua, beg sogdamaloed igi imasdamala nabir yeer iddodi gumalaga. Aagala, Jehova anmarga sogmaid, mer igar iddoged negse nanaed iggumaloye.

 NUEGGWA WE IBMAR DURDAGMARGOLO

4. Jehovagi sunmagmalad igar iddoged neggi ibmar imagleged

Ebbenne Cristo sordagan buraggwa buggusdamalad, Jehova nug odummogega (Romanos 16:​3-5). Colosenses 3:16 absomalo, we ibmargi sunmagmarbalo:

• Ebbenne Cristo sordagan Jehova nug odummogegala, ¿ibu imasdamala?

1. Anmar igar iddoged neggi dule wargwen emar abargi sunmasdaed, oyolesdabalid igi emar odurdaglegoe, videomar oyolesdabalid. Onodegala namaglesdaed, geb Babse gorlesdabalid, bergusale deyob imaglesdabalid.

2. Ibmar egislealile iddobugmalad nabir ibmar sogbier sogmarmogad.

3.   Bela dulemar nabir anmar igar iddogedse namalad: massergandibe, omegandibe, sergandibe, burwigandibe.

4. Jehovagi sunmagmalad igar iddoged neggi dogegala mani galesulid, yagine mani welesurbalid.

5. Igar iddoged negse nanaega beg ibmar ibigwensur guosulid

• ¿Ibigala anmar, igar iddoged negse nanaed iggued abelesuli?

 WE IGARGI SUNMAGLESAD

Igar iddoged negse be nanaele bur bule be Jehova igar durdadoed, be Jehova ai nuedga gudbaloed, aimar nuegan be niggudbaloed.

Ibu be durdasa

• ¿Ibigala Jehova abege, anmar, igar iddoged negse nanaed?

• Be anmar igar iddoged negse nanaele, ¿be ibu durdaggoe?

• Igar iddoged negse nanaedi, ¿igi nabir be bendasmogar be iddoge?