AYÈGÈ 10

Bikoen Beboala be Yéhova bi ne wò vòli akia afé?

VOGOLO A

Ye o tòbòya ékoen Beboala be Yéhova? Nge tegè, o ne dzam wog ndzug éyòng ba banda wò éyòng osu. O ne sili wòmen na: ‘Dzé ya loren a bikoen bité? Amu dzé bi ne ai nfi? Amu dzé ma yeane ke tòbò a bikoen biaba?’ Ayègè di, wò yi yègè na éyòng wò togen ai bot bevòk nala a yemede amvoé doé ai Zamba ai nala a vòli fe wò énying dzoé.

1. Asu dzé Beboala be Yéhova ba togen?

Ntil Bibel zing a nga lere amu dzé: “A zang bikoen ma tamen wò a Zamba” (Salmen 26:12). É melu ma fe, Beboala be Yéhova be bele fulu ya kare togen a mebaa me Édzoé asu yi na be lugu Zamba. A si ése, ba kare togen sòndò ase ai mekonda maba asu yi na be lugu Zamba, be yiagè nyè bia ai be kogelen nsamba. Ai biyòng bilè ngeki bibè ba togen fe asu yi na be bò dò a boro bitogen.

2. Dzé wò yi yègè a bikoen bité?

A bikoen biaba Beboala be Yéhova ba yegele Ébug Zamba, “ba felen bot, be timigi fe bò; bot be nga tuene wog nlang’en” (Lang’a Néhémia 8:8). Nge wò tòbò a bikoen, wò yi yem abui mam me bebege Yéhova ai abeng mefulu moé. Ane wò yi wog abui mam me bebege éding Zamba asu doé, éye fe wò yi nyè subu babi nala. Wò yi fe yen na a ne wò vòli na o bi énying é bele nguma nsongen (Yésaya 48:17, 18).

3. A tòbò a bikoen ai é bot bevòk wa yi wò sò ai nfi mbé?

Yéhova a dzo na “nnòng’en ngab bia bia asu yi na bi ding’en a bi mimbembe mimbòen, tegè ndemere ntogen fufulu waan” (Hébréa 10:24, 25). A bikoen biaan, wò yi toben ai é bot ba wogen mintié bò bò, ai a ba yi fe ane wò ne ba yem mam me bebege Zamba. Wò yi wog ane ba lèè é mam ma ve bò awono a Bibel (Lang’a Romani 1:11, 12). Wò yi yem bot bezing be bele mintak tò ane bò fe ba toben ai abui mindzug. Dzom té ndzò Yéhova a yi na bi tòbò a bikoen mban!

TUENE FAG

Yene dzé ya loren a bikoen Beboala be Yéhova ai amu dzé a ne nfi ya tòbò a bikoen bité.

4. Bikoen Beboala be Yéhova

A ntet mimbu osu, bekristen be karege togen mban asu yi na be lugu Yéhova (Romani 16:3-5). Lang’a Kolosi 3:16 ai yalen a nsili hi:

Akia afé bekristen ya osusua be karege lugu Yéhova?

Melu ma, Beboala be Yéhova ba togen mban a mebaa me Édzoé. Asu yi na o yen ane bikoen biaan bia loren, Bebege VIDÉO. Ai amvus, bebege évegele ya lere ane bikoen bia loren abaa Édzoé, ai yalen a minsili mi tsaa mi:

VIDÉO: Dzé ya lot a nda bikoen ya Édzoé? (2:12)

Bifulen bifé bi ne a zang é mam ma loren abaa Édzoé ai é ma o he lang a Kolosi 3:16?
A vidéo ngeki a bivegele, ye o ding dzam zing é he ve wò ngong ya sò tòbò a bikoen?

Lang’a 2 Kòrinti 9:7 ai yalen a nsili hi:

Asu dzé Beboala be Yéhova ba sili ki mòni a bikoen biaba?

Ai é mot a yegele wò Bibel, bebeni é mam bia yi yen ékoen ya é sòndò a zu.

Ngab fé ya ékoen té ya dang wò namba ngeki na é ne wò nfi abui?

Ye o mbe yeme dò?

A sit internet dzaan jw.org o ne sòm mefola ai mewola bikoen asu bikoen biaan a si ése.

A bikoen biaan bikat mam bia bòben, besisia ai bevidéo. Bikoen biaan bia ke fe man ai dzia ai ngogelen
Mengab mezing ya ékoen me ne akia yi na é ba be toa be ne nòng ngab éyòng ba yalen a minsili
Mot ose a ne sò a bikoen—menda mebot, minkoé, minnom mibot ai binanga
Bia sili ki mòni a bikoen biaan. Beboala be Yéhova ba nòng ki mòni ntòlò

5. Da sili na o ve mengul moé asu yi na o tòbò a bikoen biaan

Nyeneni mvulna nda bot Yésus. Mbu ose be karege wulu bekilmèra 100 a minkol asu yi na be ke a Tempel. Lang’a Lukas 2:39-42 ai yalen minsili mi tsaa mi: