ADZESUA 10
Ebɛn Kwan Do Na Jehovah Adasefo Nhyiamu Ahorow No Botum Aboa Wo?
Ana wɔato nsa afrɛ wo dɛ kɔ Jehovah Adasefo nhyiamu bi ase pɛn? Sɛ ennkɔr hɔn nhyiamu bi ase pɛn a, nna ɔno bi a da a odzi kan a ebɛpɛ dɛ ekɔ bi no, wo yamu bɛhyehye wo kakra. Bi a ibebisa dɛ: ‘Ebɛnadze na wɔyɛ wɔ dɛm nhyiamu ahorow yi ase? Ebɛnadze ntsi na no ho hia? Ebɛnadze ntsi na ɔwɔ dɛ mokɔ bi?’ Wɔ dɛm adzesua yi mu no, ibohu mbrɛ afofor a enye hɔn bɔbɔ mu ehyia mu no botum ama aabɛn Nyankopɔn, nye mbrɛ ɔbɔboa wankasa so.
1. Ebɛnadze ntsi na no ho hia dɛ yehyia mu?
Hwɛ mbrɛ Bible kyerɛwfo bi kaa siantsir a no ho hia dɛ yɛnye afofor hyia mu no ho asɛm: “Mboanofo no mu na mibehyira [Jehovah].” (Ndwom 26:12) Dɛmara so na ɔtse, sɛ Jehovah Adasefo hyia mu a, hɔn enyi gye kɛse. Wɔ wiadze nyina no, wohyia mu dapɛn biara som Nyankopɔn, tow ndwom, na wɔbɔ mpaa. Wɔ mpɛn dodow bi wɔ afe biara mu no so, wɔkɔsom wɔ nhyiamu akɛse ahorow bi ase.
2. Ebɛnadze na ibosua wɔ hɛn nhyiamu ahorow no ase?
Wɔ nhyiamu ahorow no ase no, yɛdze hɛn nkyerɛkyerɛ gyina Nyankopɔn n’Asɛm no do, na ‘yɛkyerɛkyerɛ mu kofee ma ntseasee ba mu.’ (Kenkan Nehemiah 8:8.) Sɛ eba hɛn nhyiamu no ase a, ibosua Jehovah nye no su ahorow a ɔyɛ fɛw no ho adze. Sɛ isua ɔdɔ a ɔwɔ ma wo no ho adze pii a, ɔbɛma abɛn no kɛse. Ebɛsan so ehu mbrɛ obotum aboa wo ma eenya asetsena a akomatɔyamu wɔ mu.—Isaiah 48:17, 18.
3. Ebɛn kwan do na hɔn a enye hɔn behyia mu wɔ hɛn nhyiamu ahorow no ase no botum aboa wo?
Jehovah ka kyerɛ hɛn dɛ “yɛndwendwen hɛnho do, nnunu hɛnho nkɔ dɔ nye ndwuma pa mu; [na mma] hɛn werɛ mmfir hɛnho ehyiadzi.” (Hebrewfo 10:24, 25) Wɔ hɛn nhyiamu ahorow ase no, ibehyia nyimpa a wɔdodɔ hɔnho, na hɔn so enyi gye ho dɛ wobosua Nyankopɔn ho adze tse dɛ woara. Ebɛtse dɛ wɔreka Bible mu nsɛm ahorow bi a ɔhyɛ dzen. (Kenkan Romefo 1:11, 12.) Ebɛsan so enya ho kwan nye esigyafo na awarfo a worigyina ɔhaw ahorow a worihyia ano no akasa. Siantsir a Jehovah pɛ dɛ yɛkɔ do hyia mu aber biara no, no mu kakraabi pɛ nye yi!
PƐNSAPƐNSA MU KƆ EKYIR
Ma yɛnhwɛ dza ɔkɔ do wɔ Jehovah Adasefo nhyiamu ahorow no ase, nye siantsir a mfaso wɔ do dɛ ebɔbɔ mbɔdzen akɔ dɛm nhyiamu ahorow yi bi.
4. Jehovah Adasefo nhyiamu ahorow
Wɔ mfeha a odzi kan no mu no, nna Christianfo taa hyia mu som Jehovah. (Romefo 16:3-5) Ma yɛnkenkan Colossaefo 3:16, na yensusu asɛmbisa yi ho:
-
Nna ebɛn kwan na Christianfo a wodzi kan no fa do som Jehovah?
Ndɛ, Jehovah Adasefo so taa hyia mu wɔ mbea ahorow a wohyia mu som no. Mbrɛ ɔbɛyɛ na eehu mbrɛ hɔn nhyiamu ahorow no tse no, ma yɛnhwɛ VIDEO no. Afei, ma yɛnhwɛ mfonyin a ɔkyerɛ mbrɛ asafo nhyiamu bi tse no na yensusu nsɛmbisa a odzidzi do yi ho.
-
Sɛ edze asɛm a yɛkenkanee wɔ Colossaefo 3:16 no toto dza ɔkɔ do wɔ Ahendzi Asa do no ho a, ebɛn nsɛdzi na ihu?
-
Wɔ video anaa mfonyin no mu no, aso ihun biribi fofor bi a w’enyi gye ho fa nhyiamu ahorow no ho?
Ma yɛnkenkan 2 Corinthfo 9:7, na yensusu asɛmbisa yi ho:
-
Ebɛnadze ntsi na Jehovah Adasefo nngyegye kɔlɛhyen wɔ hɔn nhyiamu ahorow no ase?
Tsie wo kyerɛkyerɛnyi no, ɔbɔbobɔ dza yebosua wɔ hɛn nhyiamu ahorow no mu kor ase wɔ dapɛn yi mu no do akyerɛ wo.
-
Sɛ ehwɛ nhyiamu no n’afa ahorow no a, no mu hendze na ehwɛ a w’enyi bɛgye ho papaapa anaa ibenya do mfaso?
Ana inyim?
Ibotum ehu bea nye ber a wɔyɛ nhyiamu ahorow no wɔ wiadze nyina wɔ jw.org do.
-
A. Wɔma ɔkasa ahorow, wɔyɛ ɔyɛkyerɛ ahorow, na woyi video ahorow wɔ hɛn nhyiamu ahorow no ase. Yɛdze ndwontow na mpaabɔ hyɛ hɛn nhyiamu ahorow no ase, na yɛdze wie
-
B. Wɔ dwumadzi no n’afa ahorow bi mu no, wɔma etsiefo no kwan ma wɔma nsɛmbisa bi ho mbuae
-
D. Obiara botum aba bi—mbusua, ankorankor, mpanyin, nye mbofra nyina
-
E. Irunntua hwee. Jehovah Adasefo nngye sika bi ana obi eetum aba hɔn nhyiamu ahorow no bi, na wɔnngyegye kɔlɛhyen biara so wɔ ase
5. Ɔgye mbɔdzembɔ ana eetum akɔ nhyiamu ahorow no bi
Ma yɛnhwɛ dza Jesus n’ebusuafo yɛe. Nna wɔtse Nazareth, ntsi nna ɔwɔ dɛ wɔnantsew twa bɛyɛ akwansin 60, dze fow mbepɔw na nkoko ansaana woeetum akɔ nhyiamu a wɔyɛ no afe biara no bi wɔ Jerusalem. Ma yɛnkenkan Luke 2:39-42, na yensusu nsɛmbisa yi ho:
-
Aso isusu dɛ nna ɔgye mbɔdzembɔ ana woetwa kwan a ɔtse dɛm yi akɔ Jerusalem a?
-
Ehwɛ a, bi a ebɛnadze ntsi na ɔwɔ dɛ ebɔ mbɔdzen ankasa kɔ nhyiamu ahorow no bi?
-
Isusu dɛ mfaso wɔ do dɛ ebɔkɔ nhyiamu ahorow no ɔmmfa ho mpo dɛ bi a ɔbɛgye mbɔdzembɔ bi no? Ebɛnadze ntsi a?
Bible no ka dɛ no ho hia papaapa dɛ yebehyia mu asom. Ma yɛnkenkan Hebrewfo 10:24, 25, na yensusu asɛmbisa yi ho:
-
Ebɛnadze ntsi na ɔwɔ dɛ yɛkɔ nhyiamu ahorow no bi aber biara?
BINOM KA DƐ: “Onnhia dɛ enye afofor hyia mu. Sɛ isua Bible no wɔ fie a, ɔno ara ye.”
-
Ebɛn kyerɛwsɛm anaa Bible mu nhwɛdo na ɔma yehu dza Jehovah pɛ?
DZA ESUA
Sɛ ekɔ nhyiamu ahorow no a, ɔbɔboa wo ma eesua Jehovah ho adze pii, ɔbɛhyɛ enye ne ntamu anyɛnkofa no mu dzen, na ɔbɛma enye nyimpa afofor abɔ mu asom no.
Mbobɔdo
-
Ebɛnadze ntsi na Jehovah hyɛ hɛn nkuran dɛ yenhyia mu?
-
Sɛ ekɔ Jehovah Adasefo nhyiamu ahorow no ase a, ebɛnadze na ibosua?
-
Isusu dɛ nhyiamu ahorow no botum aboa wo wɔ kwan fofor bi do?
HWEHWƐ PII KA HO
Ana epɛ dɛ ekɔ nhyiamu no bi, naaso wo yamu hyehye wo kakra? Nna banyin bi so tse nka dɛmara. Hwɛ adze a ɔmaa n’enyi bɛgyee nhyiamu ahorow no ho.
Hwɛ adze a ɔmaa aberantsɛ bi n’enyi bɛgyee nhyiamu ahorow no ho nye dza ɔyɛe ama oeetum akɔ bi aber biara.
Hwɛ mbrɛ afofor si tse nka wɔ nhyiamu ahorow a wɔkɔ no ho.
Hwɛ mbrɛ obi a nna ɔdɔm kuw bi a wɔyɛ basabasa no sesaa n’abrabɔ aber a ɔkɔr Jehovah Adasefo nhyiamu bi ase ekyir no.
Bi A W'enyi Bɛgye Iyi So Ho
NSƐM A WƆTAA BISA
Ebɛnadze Nye Bible Adzesua A Jehovah Adasefo Nye Nkorɔfo Yɛ No?
Wɔ dɛm Bible adzesua a Jehovah Adasefo nye nkorɔfo yɛ yi mu no, ibotum dze Bible nkyerɛase biara a ewɔ no esũa adze. Ibotum afrɛ w’ebusuafo anaa w’anyɛnkofo binom mpo ma wɔaabɛka woho ma hom eesũa.
