LESONI 10
Ena Yaga Vakacava Vei Iko Nodra Soqoni na iVakadinadina i Jiova?
O sa bau sureti ena dua na nodra soqoni na iVakadinadina i Jiova? Ke o se bera ni tiko kina de dua o na rere vakalailai mo tiko ena imatai ni gauna. De o na taroga: ‘Na cava e dau caka ena nodra soqoni? Na cava e bibi kina? Na cava meu gole kina?’ Ena lesoni qo, o na vulica ni yaga vei iko kei na nomu toro voleka vua na Kalou na nomu soqoni kei ira tale eso.
1. Na cava na yavu bibi duadua meda soqoni vata kina?
Dikeva na nona vakamacalataka e dua na dauvola iVolatabu na yavu bibi duadua meda soqoni kina kei ira tale eso: “Au na vakacaucautaki Jiova ena ivavakoso levu.” (Same 26:12) Era marau tale ga vakalevu na iVakadinadina i Jiova nira soqoni vata. Ena veiyasa i vuravura, era soqoni vata e veimacawa mera vakacaucautaka na Kalou, mera lagasere, mera masu vata. E dau caka tale ga vakavica e veiyabaki na nodra soqo lelevu mera sokalou vata.
2. Na cava o na vulica ena neimami soqoni?
E vakavulici ena soqoni na Vosa ni Kalou, ‘e vakamacalataki vinaka, e tukuni tale ga na kena ibalebale.’ (Wilika Niemaia 8:8.) Ni o tiko kina, o na vulica na veika me baleti Jiova kei na nona itovo totoka. Na levu ga ni nomu vulica na nona lomani iko, o na qai toro voleka vua. O na vulica tale ga na sala e vukei iko kina me vakainaki na nomu bula.—Aisea 48:17, 18.
3. E yaga vakacava nomu veimaliwai kei ira tale eso ena neimami soqoni?
E dusimaki keda o Jiova meda “dau veinanumi nida veivakauqeti ena loloma kei na caka vinaka, meda kua ni biuta na noda soqoni vata.” (Iperiu 10:24, 25) Ena neimami soqoni o na sotavi ira era dau veikauaitaki dina, era dau taleitaka mera vulica e levu na ka me baleta na Kalou, me vakataki iko ga. O na rogoca nira vakamacalataka eso na vakasama veivakauqeti mai na iVolatabu. (Wilika Roma 1:11, 12.) O na veivosaki tale ga kei ira era vosota na dredre ni bula vakadawai se na bula vakawati. Qori e vica ga na vuna e vinakata kina o Jiova meda soqoni vakawasoma.
VAKEKELI
Saga mo kila na ka e dau caka ena nodra soqoni na iVakadinadina i Jiova kei na vuna e yaga kina na sasaga meda tiko ena soqoni.
4. Soqoni ni iVakadinadina i Jiova
Ena imatai ni senitiuri, era soqoni vakawasoma na lotu vaKarisito mera sokaloutaki Jiova. (Roma 16:3-5) Wilika Kolosa 3:16, qai veivosakitaka na taro qo:
-
Era sokaloutaki Jiova vakacava na lotu vaKarisito taumada?
Nikua, era soqoni vata tale ga na iVakadinadina ena nodra vanua ni sokalou. Mo raica na ka e dau caka ena nodra soqoni, sarava na VIDIO. Oti, raica na itaba ni soqoni vakaivavakoso qai veivosakitaka na taro tarava.
-
Na cava o raica ni tautauvata ena ka e caka ena Vale ni Soqoni kei na ka o wilika ena Kolosa 3:16?
-
Dua tale na ka o taleitaka ena vidio se itaba me baleta na soqoni?
Wilika 2 Korinica 9:7, qai veivosakitaka na taro qo:
-
Na cava e sega ni caka kina na soli ena nodra soqoni na iVakadinadina i Jiova?
Drau raica vata kei na nomu qasenivuli na ka ena veivosakitaki ena soqoni e tarava.
-
Na itavi cava ena soqoni o taleitaka se na yaga vei iko?
O bau kila?
O rawa ni raica ena jw.org, na vanua kei na gauna e vakayacori kina na soqoni e veiyasa i vuravura.
-
E okati ena neimami soqoni na vunau, vakatasuasua kei na vidio. E tekivu qai cava na soqoni ena sere kei na masu
-
Eso na itavi ena porokaramu era sureti na vakarorogo mera vakamacala
-
Sureti kece na vuvale, dawai, itabaqase kei na gone
-
E sega ni saumi neimami soqoni. E sega ni vakaicurucuru se lavaki na soli
5. E vinakati na sasaga meda tiko ena soqoni
Vakasamataka mada na ivakaraitaki ni vuvale i Jisu. E veiyabaki eratou na taubaletaka e rauta ni 100 na kilomita ena veiulunivanua mai Nasareci me yaco i Jerusalemi, me ratou gole ina valenisoro. Wilika Luke 2:39-42, qai veivosakitaka na taro qo:
-
O nanuma ni vinakati ena ilakolako qo i Jerusalemi na sasaga?
-
Na cava ena rairai vinakati kina na sasaga mo tiko ena soqoni?
-
O nanuma ni yaga? Na vuna?
E kaya na iVolatabu ni bibi dina meda soqoni vata meda sokalou. Wilika Iperiu 10:24, 25, qai veivosakitaka na taro qo:
-
Na cava meda soqoni kina vakawasoma?
KA ERA KAYA ESO: “Sega ni vinakati meda soqoni vata kei ira tale eso. Sa rauta ga noda vuli iVolatabu tiko e vale.”
-
Na tikinivolatabu se ivakaraitaki vakaivolatabu cava e vakaraitaka na ka e vinakata o Jiova?
KA O VULICA
Na nomu tiko ena soqoni ena vukei iko mo vulica e levu tale na ka me baleti Jiova, mo vaqaqacotaka nomu veitokani kei koya, mo sokaloutaki koya tale ga kei ira tale eso.
Railesuvi
-
Na cava e uqeti keda kina o Jiova meda soqoni vata?
-
Na cava o na vulica ena nodra soqoni na iVakadinadina i Jiova?
-
Dua tale na sala o nanuma ni yaga kina nomu tiko ena soqoni?
IKURI
Vakacava ke o rere na lako ina soqoni? Raica na nona taleitaka na soqoni e dua na turaga e dau va tu qori e liu.
Raica nona taleitaka e dua na cauravou na soqoni kei na ka e cakava me kua ni calata.
Wilika na ka e tukuna eso me baleta nodra tiko ena soqoni.
“Na Cava Mo Gole Kina ina Vale ni Soqoni?” (Ulutaga ena jw.org)
Wilika nona veisau e dua e lewena tu na ilawalawa voravora ni oti nona tiko ena nodra soqoni na iVakadinadina i Jiova.
“Au Kau Dakai e Veivanua Kece” (Na Vale ni Vakatawa, 1 Julai, 2014)
Rawa ni o Wilika Tale ga
TARO E TAROGI WASOMA
Era Veivakavulici Vakacava na iVakadinadina i Jiova ena iVolatabu?
E sega ni saumi nodra veivakavulici na iVakadinadina i Jiova ena iVolatabu. O rawa ni vakayagataka ga na ivakadewa ni iVolatabu o vinakata. Rawa tale ga ni o sureti ratou nomu vuvale, se itokani me ratou veitomani ena vuli.
