NǓKPLƆNKPLƆN 10
Lè Tɛ lɛ Kplé Kúnnuɖetɔ́ Jehovah Tɔn lɛ Tɔn lɛ ka Sixu Hɛn Wá nú We?
È ka ko ylɔ́ we nú kplé Kúnnuɖetɔ́ Jehovah tɔn lɛ tɔn ɖé kpɔ́n à? Nú a ma ko wá kpɔ́n ǎ ɔ, ado sixu hú we kpɛɖé dó linlin na wá azɔn nukɔntɔn ɔ wu. A sixu kanbyɔ hwiɖée ɖɔ: ‘Nɛ̌ kplé enɛ lɛ ka nɔ yì gbɔn? Etɛwu ye ka ɖò taji? Etɛwu un ka ɖó na nɔ yì tɛn yetɔn mɛ?’ Ðò nǔkplɔnkplɔn elɔ mɛ ɔ, a na kplɔ́n lee kplékplé xá mɛ ɖevo lɛ sixu zɔ́n bɔ a na sɛkpɔ́ Mawu gbɔn é, kpo lee é na d’alɔ hwiɖesu mɛtún ɔ gbɔn é kpo.
1. Hwɛjijɔ taji hugǎn tɛ wu mǐ ka nɔ kplé ɖó kpɔ́?
Kpɔ́n hwɛjijɔ taji e wu è ɖó na nɔ kplé xá mɛ ɖevo lɛ bɔ Biblu-wlantɔ́ ɖé ɖɔ é: “Un na kpa susu nú Mawu Mavɔmavɔ hwenu e togun ɔ na kplé é.” (Ðɛhan 26:12) Mɔ̌ ɖokpo ɔ, Kúnnuɖetɔ́ Jehovah tɔn lɛ nɔ mɔ awǎjijɛ tawun ɖò kplé yetɔn lɛ jí. Gbɔn gbɛ̀ ɔ bǐ mɛ ɔ, ye nɔ bló kplé lɛ ɖò aklunɔzán gbla ɖokpo ɖokpo mɛ bo nɔ kpa Mawu, jihan, bo nɔ lɛ́ xoɖɛ. Ye nɔ lɛ́ bló kpléɖókpɔ́ ɖaxó lɛ hweɖelɛnu ɖò xwè ɖokpo ɖokpo mɛ bo nɔ sɛn Mawu.
2. Etɛ lɛ a ka na kplɔ́n ɖò kplé mǐtɔn lɛ jí?
Ðò kplé lɛ jí ɔ, mǐ nɔ sɔ́ ayi ɖó Xó Mawu tɔn jí, “bo nɔ tinmɛ, bonu mɛ ɖokpo ɖokpo na mɔ nǔ jɛ . . . mɛ.” (Xà Nɛɛmíi 8:8.) Ðò kplé mǐtɔn lɛ jí ɔ, a na kplɔ́n nǔ dó Jehovah kpo jijɔ tɔn ɖagbeɖagbe lɛ kpo wu. Ee a na ɖò nǔ gegě tuùn dó wǎn e é yí nú we é jí wɛ é ɔ, a na sɛkpɔ́ ɛ d’eji. A na lɛ́ kplɔ́n lee é sixu d’alɔ we bɔ gbɛzán towe na jɛmɛ nú we gbɔn é.—Ezayíi 48:17, 18.
3. Lè tɛ lɛ gbɛ̌didó xá mɛ ɖevo lɛ ɖò kplé mǐtɔn lɛ jí ka sixu hɛn wá nú we?
Jehovah zɔ́n mǐ ɖɔ mǐ ni nɔ ‘kpé nukún dó mǐɖée wu, bo na flɔ́ wanyiyi kpo ɖagbewiwa kpo sín zo dó lanmɛ nú mǐɖée, lobo ma gɔn kplékplé ɖó kpɔ́ ó.’ (Eblée lɛ 10:24, 25) Ðò kplé mǐtɔn lɛ jí ɔ, a na mɔ mɛ e nɔ ɖè wanyiyi nǔgbo ɔ xlɛ́ yeɖée lɛ, bɔ hwi ɖɔhun ɔ, ye nɔ ba na kplɔ́n nǔ dó Mawu wu d’eji lɛ é. A na sè bɔ ye na ɖò linlin wusyɛn dó lanmɛ nú mɛ tɔn e ɖò Biblu mɛ lɛ é má xá yeɖée lɛ wɛ. (Xà Hlɔmanu lɛ 1:11, 12.) A na lɛ́ kpéwú bo ɖɔ xó xá mɛ ɖevo ɖěɖee ɖò xwi ɖí xá tagba e tlɛnnɔ kpo mɛ e ko wlí alɔ é kpo bǐ nɔ mɔ lɛ é wɛ, bɔ é ka ɖò ye kpa wɛ lɛ é. Hwɛjijɔ ɖěɖee wu Jehovah ba ɖɔ mǐ ni nɔ kplé ɖó kpɔ́ hwɛhwɛ é ɖé lɛ kpowun nɛ!
BA DÒ NÚ NǓ D’EJI
Kpɔ́n lee nǔ lɛ nɔ yì gbɔn ɖò kplé Kúnnuɖetɔ́ Jehovah tɔn lɛ tɔn lɛ jí é kpo nǔ e wu é nyɔ́ ɖɔ mǐ ni nɔ dó gǎn syɛnsyɛn bo nɔ yì kplé enɛ lɛ é kpo.
4. Kplé Kúnnuɖetɔ́ Jehovah tɔn lɛ tɔn Lɛ
Ðò xwè kanweko nukɔntɔn ɔ mɛ ɔ, Klisanwun lɛ nɔ kplé ɖó kpɔ́ hwɛhwɛ bo nɔ sɛn Jehovah. (Hlɔmanu lɛ 16:3-5) Xà Kolosinu lɛ 3:16, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
-
Nɛ̌ Klisanwun nukɔntɔn lɛ ka sɛn Jehovah gbɔn?
Égbé ɔ, Kúnnuɖetɔ́ lɛ lɔ nɔ kplé ɖó kpɔ́ hwɛhwɛ ɖò fí e ye nɔ sɛn Mawu ɖè lɛ é. Bo na dó tuùn lee nǔ lɛ nɔ yì gbɔn ɖò kplé yetɔn lɛ jí é hǔn, xò VIDEO ɔ. Enɛ gudo hǔn, mi kpɔ́n kplé agun tɔn ɖé sín ɖiɖe ɔ bo ɖɔ xó ɖó kpɔ́ dó nǔkanbyɔ e bɔ d’ewu lɛ é jí.
-
Nǔ ɖokpo ɔ tɛ lɛ wu a ka ɖ’ayi ɖò lee nǔ lɛ nɔ yì gbɔn ɖò Kpléxɔ Axɔ́suɖuto ɔ tɔn ɖé mɛ é kpo nǔ e a xà ɖò Kolosinu lɛ 3:16 mɛ é kpo mɛ?
-
Ðò video ɔ alǒ ɖiɖe ɔ mɛ ɔ, a ka ɖ’ayi nǔ ɖevo wu dó kplé lɛ wu bɔ é dɔn we à?
Xà 2 Kɔlɛntinu lɛ 9:7, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
-
Etɛwu Kúnnuɖetɔ́ Jehovah tɔn lɛ ma ka nɔ yí agbǎnmɛkwɛ ɖò kplé yetɔn lɛ jí ǎ?
Kpɔ́n nǔ e jí na ɖɔ xó dó wɛ è ɖè ɖò kplé aklunɔzán gbla elɔ tɔn lɛ ɖokpo hwenu lɛ é xá nǔkplɔnmɛtɔ́ towe.
-
Akpáxwé kplé ɔ tɔn tɛ ka dɔn we alǒ hɛn lè wá nú we hugǎn?
A ka tuùn à?
Ðò jw.org jí ɔ, a sixu mɔ fí e è nɔ bló kplé lɛ ɖè gbɔn gbɛ̀ ɔ bǐ mɛ lɛ é kpo hwenu e è nɔ bló ye lɛ é kpo.
-
Xóɖiɖɔ lɛ, wazexlɛ́ lɛ, kpo video lɛ kpo nɔ ɖò kplé mǐtɔn lɛ mɛ. Han kpo ɖɛ kpo wɛ mǐ nɔ dó bɛ́ kplé mǐtɔn lɛ na, bo nɔ lɛ́ dó fó na
-
Ðò akpáxwé tuto ɔ tɔn ɖé lɛ mɛ ɔ, è nɔ byɔ kpléwatɔ́ lɛ ɖɔ ye ni na xósin
-
Mɛ bǐ wɛ è hun kplé lɛ sín hɔn kɛ́ na: xwédo lɛ, tlɛnnɔ lɛ, mɛxomɔ lɛ, kpo yɔkpɔvu lɛ kpo
-
Vɔ̌nu wɛ nyí kplé mǐtɔn lɛ. Kúnnuɖetɔ́ Jehovah tɔn lɛ nɔ yí agbǎnmɛkwɛ ǎ
5. Kplé lɛ yiyi nɔ byɔ gǎndidó
Lin tamɛ dó xwédo e mɛ Jezu sù ɖè é sín kpɔ́ndéwú jí. Bo na dó yì nǔwiwa xwewu xwewu tɔn ɖé tɛnmɛ ɔ, ye ɖó na zun zɔnlin nú kilomɛtlu 100 mɔ̌ sín Nazalɛti yì Jeluzalɛmu gbɔn sókan mɛ sókan mɛ. Xà Luki 2:39-42, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:
-
A ka lin ɖɔ ali gaga enɛ zinzɔn yì Jeluzalɛmu nɔ byɔ gǎndidó à?
-
Etɛwu é ka sixu byɔ gǎndidó syɛnsyɛn cobɔ a na yì kplé lɛ?
-
A ka lin ɖɔ é sɔgbe ɖɔ a ni nɔ dó gǎn mɔ̌hun à? Etɛwu?
Biblu ɖɔ ɖɔ é ɖò taji tawun ɖɔ mǐ ni nɔ kplé ɖó kpɔ́ bo nɔ sɛn Jehovah. Xà Eblée lɛ 10:24, 25, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
-
Etɛwu mǐ ka ɖó na nɔ yì kplé lɛ ɖò gbesisɔmɛ?
MƐÐÉ LƐ ÐƆ: “É byɔ ɖɔ è ni kplé xá mɛ ɖevo lɛ ǎ. Biblu kplɔnkplɔn ɖò xwé mɛtɔn gbè ko kpé.”
-
Wemafɔ Biblu tɔn alǒ kpɔ́ndéwú Biblu tɔn tɛ ka ɖè jlǒ Jehovah tɔn xlɛ́?
ETƐ LƐ A KA KPLƆ́N?
Kplé lɛ yiyi na d’alɔ we bɔ a na kplɔ́n nǔ gegě dó Jehovah wu, bo na bló bɔ xɔ́ntɔn hwi kpo é kpo tɔn na syɛn, lobɔ a na sɛn ɛ xá mɛ ɖevo lɛ.
Vɔ̌gbɔnji
-
Etɛwu Jehovah ka dó wusyɛn lanmɛ nú mǐ ɖɔ mǐ ni nɔ kplé ɖó kpɔ́?
-
Etɛ lɛ a ka na kplɔ́n ɖò kplé Kúnnuɖetɔ́ Jehovah tɔn lɛ tɔn lɛ jí?
-
Ali ɖevo tɛ nu mɔ̌ a ka lin ɖɔ kplé lɛ sixu d’alɔ we ɖè?
KÍJÉ
Enyi ado ɖò huhu we dó kplé agun tɔn ɖé yiyi wu wɛ ɔ ka lo? Kpɔ́n lee nya e nǔ ko cí mɔ̌ na kpɔ́n é ɖé wá yí wǎn nú kplé lɛ yiyi gbɔn é.
Kpɔ́n lee dɔnkpɛvu ɖé ɖu kplé lɛ sín vivǐ gbɔn é, kpo nǔ e é wà bo kpò ɖò yiyi wɛ é kpo.
Kpɔ́n lee nǔ cí nú mɛ ɖevo lɛ dó kplé lɛ yiyi wu é.
“Etɛwu È ka Nɔ Yì Kplé lɛ Ðò Kpléxɔ Axɔ́suɖuto ɔ Tɔn Mɛ?” (Xóta Ɛntɛnɛti jí tɔn)
Kpɔ́n lee jaguda akowunká ɖé sín gbɛzán huzu, hwenu e é yì kplé Kúnnuɖetɔ́ Jehovah tɔn lɛ tɔn ɖé gudo é gbɔn é.
“Un Nɔ Yì Fí ɖé Gbeɖé Tú Ce Mɛvo Ǎ” (Atɔxwɛ [Flansegbe] 1er juillet 2014)
Xóta élɔ́ lɛ́ lɔ sixú jɛjí nú we
NǓ E MƐ LƐ́ NƆ YÁ WǓ KANBYƆ́ LƐ́ É
Nɛ̌ tuto Biblu kplɔ́nkplɔ́n tɔn e Kúnnuɖetɔ́ Jehovah tɔn lɛ́ nɔ xwlé mɛ é ka nɔ yi gbɔn?
Kpó Biblu kplɔ́nkplɔ́n vɔ̌nu sín tuto e Kúnnuɖetɔ́ Jehovah tɔn lɛ́ nɔ xwlé mɛ é kpó ɔ, a sixú zán lǐlɛ́dógbeɖévomɛ Biblu tɔn ɖěbǔ. A vo bó ná ylɔ́ xwédo towe blěbú alǒ xɔ́ntɔn towe lɛ́ ɖěbǔ bɔ yě ná gɔ́ nú we.
