LÈSON 10
Ka sa ké pòté dè bon ba-w si ou ay an réinyon a Témwen a Jéova ?
Ès ou ja ni lokazyon ay adan on réinyon a Témwen a Jéova ? Si sa po’o jen rivé-w, pétèt kè ou on tijan pè alé. Pétèt ou ka pozé-w sé kèsyon-lasa : « Ka i ka pasé adan sé réinyon-lasa ? Ès sé réinyon-la vréman enpòwtan ? É poukwa fò-mwen ay réinyon ? » Adan lèson-lasa, ou ké vwè kè lè ou ka sanblé èvè dòt moun, sa pé édé-w vin pibon zanmi èvè Bondyé é vi a-w pé vin pi bèl.
1. Poukwa Témwen a Jéova k’ay réinyon ?
Nonm-la ki maké Sòm 26 la ka ban-nou rézon-la ki pi enpòwtan la. Mi sa i ka di : « An ké louwé Jéova adan gran lasanblé-la » (Sòm 26:12). Jòdijou osi, Témwen a Jéova ni labitid réini-yo é yo kontan fè sa toubònman ! Toupatou si latè, yo ka réini-yo chak simenn pou adoré Bondyé, pou chanté louwanj ba-y é pou priyé-y. Chak lanné, yo ka òwganizé dé ou twa gran lasanblé pou yo louwé Jéova.
2. Si ou ay réinyon, ka ou ké aprann ?
Adan réinyon an nou, nou ka montré moun ka Labib ka di ; ‘nou ka èspliké-y on mannyè ki klè é nou ka fè moun konprann-li’ (li Néémi 8:8). Si ou vin réinyon, ou ké aprann konnèt Jéova pibyen é ou ké vwè ki bèl kalité i ni. Pi ou ké vwè jan Jéova enmé-w, pi ou ké anvi séré-y an 2 bra a-w. Ou ké rann-vou kont osi kè i pé fè vi a-w vin pi bèl (Izayi 48:17, 18).
3. Lè ou ké vin réinyon, ou ké palé èvè dòt moun. Ka sa pé pòté dè bon ba-w ?
Jéova ka mandé-nou ‘voyé zyé yonn asi lòt pou yonn pé sa pousé lòt ni lanmou é fè sa ki bèl, san nou abandoné réinyon an nou’ (Ébré 10:24, 25). Lè ou ké vin réinyon, ou ké jwenn èvè moun ki enmé pwochen a yo vréman é ki anvi konnèt Bondyé pibyen. Ki sé avan, ki sé pannan oben ki sé apré sé réinyon-la, ou ké pé tann-yo ka palé dè sa ki ka ankourajé-yo adan Bib-la (li Women 1:11, 12). Ou ké pé fè konésans èvè moun ki ni tchè-kontan menmsi yo ni ti pwoblèm a yo kon toutmoun. Mi sé pousa Jéova vlé nou vin réinyon chak simenn !
AN-NOU FOUYÉ PI FON
An-nou vwè kijan sa ka pasé adan réinyon a Témwen a Jéova. É an-nou vwè osi ki bon biten sé réinyon-lasa pé pòté ba-w.
4. Réinyon a sé Témwen a Jéova la
Sé prèmyé krétyen-la té ja ni labitid réini-yo pou adoré Jéova (Women 16:3-5). Li Kolosyen 3:16 é fè on ti kozé asi kèsyon-lasa :
-
Kijan sé prèmyé krétyen-la té ka adoré Jéova ?
Jòdila osi, sé Témwen-la ni labitid réini-yo adan Sal di Wayòm a yo. Pou vwè kijan réinyon a yo ka déwoulé, gadé VIDÉO-la. Aprésa, pran tan gadé imaj-la ki ka montré jan on réinyon ka pasé é fè on ti kozé asi sé kèsyon-la ki ka vin la :
-
Ki biten ou ka touvé an Kolosyen 3:16 é ki ka fèt adan on Sal di Wayòm ?
-
Lè ou ka gadé imaj-la oben vidéo-la, ès ni on biten an pawtikilyé ki ka ba-w anvi ay fè on lantou an réinyon ?
Li 2 Korentyen 9:7 é fè on ti kozé asi kèsyon-lasa :
-
Poukwa ou pa bizwen péyé pou vin an réinyon a sé Témwen-la ?
Konnyéla, gadé èvè moun-la ki ka fè étid a-w la, dè ki biten pwochen réinyon-la ké palé.
-
Dapré sa nou sòti vwè la, ki pawti a réinyon-la ou ka touvé pi entérésan oben ki ké pi itil ba-w ?
Ès ou té sav sa ?
Asi jw.org, ou ké touvé ki koté é a ki lè sé réinyon-la ka fèt toupatou si latè.
-
Adan réinyon an nou, yo ka montré-nou kijan pou nou préché, nou ka gadé vidéo é ni moun ka fè diskou osi. Chak réinyon ka koumansé é ka fin èvè on kantik é on priyè.
-
Ni délè, sé moun-la ki la la pé bay on komantè.
-
Nou ka akéyi toutmoun bra gran wouvè : misyé, madanm, jennmoun é granmoun osi.
-
Ou pa bizwen péyé pou vin réinyon. Témwen a Jéova pa’a fè-w péyé pou rantré é yo pa’a fè lakèt.
5. Pou ou vin réinyon, fò ou fè éfò
An-nou pran ègzanp asi fanmi a Jézi. Chak lanné, fò-yo té maché pannan 3 jou on koté ki plen mòn, pou yo té ay an tanp-la, a Jérizalèm. Li Lik 2:39-42 é fè on ti kozé asi sé kèsyon-lasa :
-
Ès ou ka di vwayaj-lasa té mòl ?
-
Ki éfò ou ké oblijé fè pou ay réinyon ?
-
Menmsi sa ka mandé-w onlo éfò pou ay réinyon, ès ou ka di sa vo lapenn ? Poukwa ou ka di sa ?
Labib ka di kè fò-nou ay réinyon pou nou adoré Bondyé pas sé on biten ki enpòwtan toubònman. Li Ébré 10:24, 25 é fè on ti kozé asi kèsyon-lasa :
-
Poukwa fò-nou pran labitid ay réinyon chak simenn ?
MI SA MOUN KA DI : « An pa bizwen adoré Bondyé ansanm èvè dòt moun. Dépi an ka li Bib an mwen tousèl akaz an mwen, an pa bizwen fè plis ki sa. »
-
Ki vèwsé oben ki ègzanp ou té’é pé itilizé pou montré ka Jéova ka mandé ?
ON TI RÉZIMÉ
Si ou ay réinyon, ou ké aprann konnèt Jéova pibyen, ou ké vin pibon zanmi èvè-y é ou ké adoré-y ansanm èvè dòt moun alantou a-w.
Ka ou woutyenn
-
Poukwa Jéova ka ankourajé-nou réini-nou ?
-
Lè ou ké ay an réinyon a Témwen a Jéova, ka ou ké aprann ?
-
Lè ou k’ay réinyon, ki dòt bon biten sa pé pòté ba-w ?
AY GADÉ SA OSI
Ès ou on tijan pè ay réinyon ? Sé sa on misyé té ka rèsanti avan i vin réinyon. Men aprésa, a pa ti enmé i vin enmé réinyon a-y !
Gadé ka on jennboug fè pou i té vin enmé sé réinyon-la é ki éfò i fè pou i pa té raté ponyonn.
Déotwa moun ka di sa yo ka rèsanti lè yo k’ay lasal.
« Pourquoi assister aux réunions tenues à la salle du Royaume ? » (on awtik ki asi jw.org)
On délenkan vin lasal é aprésa vi a-y chanjé bout-pou-bout.
« Je ne sortais jamais sans mon arme » (Tou dè Gad a 1é juiyé 2014 an fransé)
Ay gadé sa osi...
KÈSYON ONLO MOUN KA POZÉ-YO
Sé lèson biblik la Témwen a Jéova ka pwopozé : kijan sa ka pasé ?
Sé lèson-la gratui é ou ka pé fè bèl ti kozé èvè Témwen a Jéova ; ou pé sèvi èvè pwòp Bib a-w é ou pé envité fanmi a-w oben zanmi a-w suiv étid-la èvè-w.
