ƝAAKWƐLƐI 10
Tɔnɔ ləkɛɛ ɓə ya pɛli ɉɔlɔɓoi Zehova ŋɔ Kəlaɠaa di wɔ ŋaakpɔn ma ?
Yaa ta li Zehova ŋɔ Kəlaɠaa di wɔ ŋaakpɔn da ɓa ? Akɛ hó ta li li laa ə́ li mɛni laa a volo doloo ŋɔ liihɛlɛn gaa kiɛ pai too yɛ́. Ya pɛli kiɛ ə́ kpɔɔ maaləngɛi yɛ́ ma : ‘ Ŋaakpɔnŋaa tii da kɛ tɛɛ ləi ? Ŋaakpɔnŋaa tii dɔlɔ ɓaa lə ? Lə mɛni ɓa kpɔ maanɛɛ ŋi li ŋaakpɔnŋaa tii ɓa ? ’ Ka nu takpɛliɠaa ka kɛi ka ŋaakpɔn, pələi yili a kpɔnmaa tɛɛ la ə́ pɔ, ə lɛɛ pələi a ə́ maalɛɠɛ la Yálá ɓa, ə́ kaa pai gaai ɲaakwɛlɛi ŋɛi hu.
1. Lə mɛni ɓa Zehova ŋɔ Kəlaɠaa da di ŋaakpɔn ?
Yii kpɔ a gɛ Zehova ŋɔ Kəlaɠaa diɛ di ŋaakpɔn Biblə pɛɛnmun da ə yili ɓo. Ə mo Zehova laa mɛi yɛ ma : “ Gáá pai kɛi ə́ laa tɛi ŋaakpɔnŋaa hu ” (Maatɛnɛ 26:12). Pələ lɔ ɓə gaa la háákələi, Zehova ŋɔ Kəlaɠaa da di ŋaakpɔn ə lɛɛ di kwəinɛɛi yili kɛi. Da di ŋaakpɔn lɔwɔ kəlee diɛ Yálá ɓatoo, diɛ maatɛnɛ wələɠaa too, ə lɛɛ diɛ vɛli. Da kɛ nwɔnɔ pai ŋaakpɔn gbea-kpeaa diɛ a di kpulu tamaa kwəlan ma ə lɛɛ diɛ Yálá ɓatoo.
2. Lə ɓə ə́ kaa pai maakwɛlii ku wɔ ŋaakpɔnŋaa diɛ ?
Biblə ɓə kwa galan ku wɔ ŋaakpɔnŋaa ɓa, “ da kɛ mukulaa lɛi, mɛnii da kɛ moi nua diɛ ɉukulaa kaa ” (Néhémie 8:8 ɓo). Ya kɛi li ku wɔ ŋaakpɔnŋaa ɓa, ə́ kaa pai mɛni lɛlɛɛ tamaa kɔlɔn ɉii laa yɛ hwilɛn na Zehova ɓa da duwɔ pələɠaa. Pələi ə́ wɛli kaa la ma ə́ kaa lɔ pai kɛi gɔlɔn ɉii nwɛli yɛ too yɛ́ ə lɛɛ yɛ́ ə́ maalɛɠɛ ma kpɔ kɛnɛ. Ə lɛɛ ə́ kaa nwɔnɔ pai gɔlɔn ɉii yɛ́ ma a pɛli ə kpɔnmaa tɛɛ ə́ pɔ ə́ wɔ yɛnɛɛ ə lɛlɛ (Esai 48:17, 18).
3. Nua ə́ kaa pai di kaa ŋaakpɔn ma da pɛli kpɔnmaa tɛɛ ləi ə́ pɔ ?
Zehova kaa kɛi guɔ “ gu gu keeni mɛi kaa, guɔ gu kee lii muhəɠə wɛlikɛmaa laa pɔ pələ, da mɛni lɛlɛɛ kɛɛ. Ka gu ho kpəla gu kee ɲaakpɔnŋaa ɓa ” (Hebreu 10:24, 25). Ku wɔ ŋaakpɔnŋaa ɓa, ə́ kaa pai nua kaai diɛi da di keeni maaliihɛlɛn ɉee ə lɛɛ di kaa bɔ di di wɔ Yálá kɔlɔnŋaa ta pɛlɛ ma yɛ pələi lɔ ə́ kaa la bɔ. Ə́ kaa pai kɛi di kaai diɛ di keeni hwaŋalɔ a mɛniɠaai da kɛ galan ɉii Biblə hu (Romə 1:11, 12, ɓo). Ə lɛɛ ə́ kaa pai pɛlii nua kɔlɔn ɉii diɛi da pɛli di wɔ mɔnɔɠaa hon bələ kaai. Mɛniɠaai a gɛ Zehova yɛ kɛ guɔ gu gu ŋaakpɔn kɛlɛ-kɛlɛ daɠaa lɔ ka gwaa gaa !
Ə́ WƆ MƐNIKƆLƆNŊAA TA PƐLƐ MA
Gaa lə ɓə a tɛɛ Zehova ŋɔ Kəlaɠaa di wɔ ŋaakpɔn gɛi, ə lɛɛ lə mɛni ɓa maanɛɛ gu gu sə-mɛni kəlee kɛ yii yaan guɔ li ŋaakpɔnŋaa tii ɓa.
4. Zehova ŋɔ Kəlaɠaa di wɔ ŋaakpɔnŋaa
Kilistalea tolooɠaa di wɔ lowai, kilistalea di kɛi di ŋaakpɔn kɛlɛ-kɛlɛ diɛ Zehova ɓatoo. (Romə 16:3-5) Kolɔsə 3:16 ɓo, ə lɛɛ ka lono kɛ gɛɛmaalən ŋɛi mɛi :
-
Kilistalea tolooɠaa di kɛi Zehova ɓatoo ləi ?
Háákələi, Zehova ŋɔ Kəlaɠaa diɛ kpɛliman da di ŋaakpɔn kɛlɛ-kɛlɛ di wɔ ŋaakpɔn gɛ pɛlɛɠaa mu. Ya kɛ bɔ ə́ gaa pələi da di wɔ ŋaakpɔnŋaa kɛ la, VIDIO kaa. Yili pulu votoi ŋɛi a ŋaakpɔn gɛ pɛlɛ lɛ ə́ ɲɛi pili ɉu, ə lɛɛ ka lono kɛ gɛɛmaalənŋaa ŋɛi mɛi.
-
Yii a tɛɛ Zehova ŋɔ Kəlaɠaa di wɔ ŋaakpɔn gɛ pɛlɛ mu, da yii ŋɛi yaa mo Kolɔsə 3:16 hu a li ləi gee pɔ ?
-
Ə́ mɛni takpɛli kaa voto hu awala kɛtii vidio hu vilɛnŋaa ŋaakpɔnŋaa diɛ yii nwɛli ə́ too yɛ́ kpɔ kɛnɛ ?
Korɛntə veelɛ 9:7 ɓo, ə lɛɛ ka lono kɛ gɛɛmaalən ŋɛi mɛi :
-
Lə mɛni ɓa Zehova ŋɔ Kəlaɠaa di hwa wali kulɔ nua diɛ di wɔ ŋaakpɔn gɛiɠaa ?
Ŋaakpɔn hiɛhu di kaa pai gɛi, nui ka yaa ka kɛ Biblə kalan ɉii ka lono kɛ mɛi.
-
Mɛniɠaa di kaa pai ɉukulɔi ŋaakpɔn ma nɛlɛ kpɔ ɓə nwɛli aa too yɛ́ kɛnɛ awala kɛtii nɛlɛ kpɔ ɓə ya pɛli dɔlɔ kulɔi kpɔ a neelee ?
Ə́ kili kaa ɉu ?
Ɓɛiɠaa da ŋaakpɔnŋaa kɛ laa lɔi mɛi naa kəlee ə ma kɛ gɛi lowaiɠaa, ya pɛli ə́ gaa, jw.org ɓa.
-
Ku wɔ ŋaakpɔnŋaa ɓa kwa kɛ pələɓoɠaa mɛn ɉii, kuɔ vidioɠaa kaa. Kuɔ Yálá Lawoo laahəli pələ maakwɛli ə ma kɛ kalan gɛ pələ. Ŋaakpɔn a gɔwɔtɔɔ ə lɛɛ ə naakulɔ a wələtoɔ da Yálá hwɛliɛ.
-
Ŋaakpɔn gɛi lowai nuai ŋaakpɔn ma, da pɛli diɛ kɛɛmaalənŋaa mukulɔ a lowai taɠaa.
-
Nu kəlee təliɛi laa—nuai daa húlulɔ, yiiɠaai di ho nii húlulɔ li, nu maapɔlɔɔɠaa, ə ma kɛ leapɛlɛɛ.
-
Di hwa wali kulɔ nua diɛ ku wɔ ŋaakpɔnŋaa ɓa. Ya kɛi lɔ ŋaakpɔn gɛ pɛlɛ mu di hwa kɛ yɛ́ ə́ wali hala, ə lɛɛ ya lɔ ya hee di hwa pa a hɛnda di ho ɉee ə́ liila diɛ kɛ yɛ́ ə́ wali too ɉu.
5. Ə gɛ nu yɛ pɛli lii ŋaakpɔn ma, maanɛɛ ə ɲaawala
Ka gu Zesu kaanua di wɔ kɔɔmaa kaa. Ə həɠə Nazarɛtə yɛ li Ɉerusalɛmə di kɛi holo haaɓa hiɛ kɛ, yii yaan diɛ li di wɔ kwəlan ɉɛli ɓa. Yeeɠaa di kɛ bələi tii hu kpɔ kɛnɛ. Lukə 2:39-42 ɓo, ə lɛɛ ka lono kɛ gɛɛmaalənŋaa ŋɛi mɛi :
-
Ə́ wɔ kili ɓa ɉiɛi tii di kɛi gulɔ diɛ li Ɉerusalɛmə gɛ laa nɛɛ kɛ ?
-
Ə gɛ yɛ́ pɛli pai ŋaakpɔnŋaa ɓa, mɛni ləkɛɛɠaa ɓə yaa gaa yɛ́ ma gɛ laa ho pai kɛi a nɛɛ yii maanɛɛ ə́i ɲaawala ɉu ?
-
Ə́ wɔ kili ɓa mɛni lɛlɛɛ ɓaa ə́i ɲaawala yɛ́ li ŋaakpɔnŋaa ɓa ə ma kɛ gɛ laa hwa kɛ a nɛɛ ? Lə mɛni ɓa ə́ kaa kɛi ma ee ?
Gwa kɛi gu ŋaakpɔn yii yaan guɔ Zehova ɓatoo, Biblə a nɛ yɛ ma yili maamɛni wala-walaa kpɔ kɛnɛ. Hebreu 10:24, 25 ɓo, ə lɛɛ ka lono kɛ gɛɛmaalən ŋɛi mɛi :
-
Lə mɛni ɓa maanɛɛ guɔ pa ŋaakpɔn ma kɛlɛ-kɛlɛ ?
NUTAƓAA DA KƐ KƐI MA : “ Nu ya kɛi Biblə kalan yɛ́ tɔnɔ bɛlɛ laaləi yili pɛliɛ ɉu ə́ ma wala kɛ lii kalan ma. ”
-
Da mo tii yɛ́ vɛlisɛɛ ləkɛɛ ɓə, awala kɛtii kɔɔmaa ləkɛɛ ɓə ya pɛli ɉəɠəi Biblə hu yii a Zehova kiliŋahiɛ pələ lɛ ?
YII GU GALAN
Ya kɛi pa ŋaakpɔn ma ə́ kaa pai ə́ wɔ mɛnikɔlɔnŋaa ta pɛlɛi ma yɛ hwilɛn na Zehova ɓa, ka yaa ka wɔ ɓəlannaa hu ə wala-wala, ə lɛɛ ə́ pɛli matooi ka nu takpɛliɠaa.
Nɛɛ ə́ kili pɔ
-
Lə mɛni ɓa Zehova a kɛ guɔ, guɔ gu ŋaakpɔn ?
-
Mɛni ləkɛɛɠaa ɓə ə́ kaa pai maakwɛlii ya kɛi pa Zehova ŋɔ Kəlaɠaa di wɔ ŋaakpɔn ma ?
-
Tɔnɔ takpɛli ləkɛɛɠaa ɓə nwɔnɔ ə́ kaa pai ɉɔlɔɓoi ya kɛi pa ŋaakpɔnŋaa ɓa ?
MƐNI TAKPƐLIƓAA
Akɛ ə́ pa mɛni ŋaakpɔn ma yili a liihɛlɛn doo yɛ́, gaa lə mɛni ɓə gɛ ŋaakpɔnŋaa wɛli yɛ too hulɔnu ta ɓa yii ni mɛni laa toloo ə kɛi liihɛlɛn doo ma.
Pələi di ku laakwiɛn na ku ho pai leai ma kpɔ tɔnɔ kpɛli (4:16)
Gaa yii gɛ ŋaakpɔnŋaa wɛli yɛ too hulɔnon da ɓa, ə lɛɛ mɛniɠaai ə pɛli gɛi yii yaan yɛ pa ŋaakpɔn ma.
Gaa pələi nu takpɛliɠaa da kɛ di kiliŋahiɛi la yɛ hwilɛn na ŋaakpɔnŋaa ɓa.
“ Lə mɛni ɓa maanɛɛ guɔ pa ŋaakpɔnŋaa ɓa ? ” (Hɛɓɛ yii gaa gwɛli yɛli ɓa)
Gaa pələi hulɔnu ta yii kɛi too nua mɛi yɛ hɛnŋaa kulɔ di yəi ŋɔ yɛnɛɛ maa ə hwalən na, ɓɛlowai ə pa la Zehova ŋɔ Kəlaɠaa di wɔ ŋaakpɔn ma.
“ Ɓɛi lɔpee ŋi kɛi li laa kwa ŋɔ́ gbalaan lɔ ɓə kɛ ” (La Tour de Garde, 1er juillet 2014)
