EHONGWA 10
Hapo ozombongarero zOvahongonone va Jehova maze ku vatere vi?
Hapo wa rora okuṋangwa kombongarero yOvahongonone va Jehova? Indu tje ri otjikando otjitenga okuyenda ku zo ove mape ya o kara nondira. Mape ya o ripura kutja: ‘Pe tjitwa tjike pozombongarero nḓa? Ongwaye tji ze ri ozonanḓengu? Ongwaye tji mba sokukara pu zo?’ Mehongwa ndi, mo rihongo kutja omomuano uṋe okukara pu na varwe tji maku ku vatere okutumbuka popezu na Mukuru nokukuvatera kourike woye.
1. Ongwaye Ovahongonone va Jehova tji ve worongana pamwe?
Tara komuano omutjange wOmbeibela tja raisa ounanḓengu wokuworongana pu na varwe indu tja tja: “Mombongo yotjiwaṋa tje me tanga Muhona.” (Epsalme 26:12) Momuano otjingewo, Ovahongonone va Jehova ve kara nenyando tjinene tji mave worongana pamwe. Mouye auhe, ve worongana otjivike atjihe okutanga Mukuru, okuimbura nokukumba. Povikando tjiva mombura aihe owo wina ve yenda komaworonganeno omanene.
2. Ovikwaye mbi mo yenene okurihonga pozombongarero zetu?
Pozombongarero zombongo, tu honga okuza mEmbo ra Mukuru nu tu “mangurura kutja otjiwaṋa tji zuve nawa.” (Lesa Nehemia 8:8.) Pozombongarero zetu zombongo, mo kerihonga ohunga na Jehova novikaṋena vye oviwa. Otja pu mo rihongo ovingi ohunga norusuvero rwe kove, mo tumbuka popezu na ye. Ove wina mo rihongo omuano mu me ku vatere kutja u kare nehupo ewa.—Jesaja 48:17, 18.
3. Ovandu mbu ma mu hakaene pozombongarero zetu zombongo mave ku vatere vi?
Jehova u tu rakiza kutja tu ‘rikenderasane mokupandiparisasana morusuvero na moviungura oviwa, nu atu ha isa okuyenda kozombongarero zombongo.’ (Ovaheberi 10:24, 25) Pozombongarero zetu, mo hakaene ku novandu mba suverasana tjiri nu mbe nonḓero tjimuna ove okurihonga ovingi ohunga na Mukuru. Ove mo ve zuu amave haṋasana omambo omayanḓiparise okuza mOmbeibela. (Lesa Ovaroma 1:11, 12.) Ove wina mo yenene okuhungira ku na varwe, ovakombe poo mba kupasana mbe nondjoroka nandarire kehi yomauzeu. Inga omapu tjiva Jehova nge vangera kutja tu worongane pamwe aruhe.
KONḒONONA OUKOTO
Konḓonona kutja pe tjitwa tjike pozombongarero zOvahongonone va Jehova nokutja omena raye tji wa sokuyenda ku zo.
4. Ozombongarero zOvahongonone va Jehova
Meserewondo etenga, Ovakriste aave worongana pamwe aruhe okurikotamena ku Jehova. (Ovaroma 16:3-5) Lesa Ovakolose 3:16, nu okuzambo hungirira kepuriro ndi:
-
Ovakriste veserewondo etenga aave rikotamene vi ku Jehova?
Ndino, Ovahongonone va Jehova wina ve worongana pamwe pomatuwo wawo womerikotameneno. Tji mo vanga okumuna kutja pe tjitwa tjike pozombongarero zawo, nyanda OKAVIDIO. Okuzambo tara kotjiperendero tjombongarero yombongo nu hungirira komapuriro ngu maye kongorere kehi mba.
-
Ovikwaye mbya sana pokati ka imbi mbi wa munu pEtuwo rOmerikotameneno na imbi mbi wa lese mOvakolose 3:16?
-
Mokavidio poo motjiperendero, hapo wa munu otjiṋa tjarwe ohunga nozombongarero zetu tji matji ku tjatere?
Lesa 2 Ovakorinte 9:7, nu okuzambo hungirira kepuriro ndi:
-
Omena raye, pozombongarero zombongo zOvahongonone va Jehova tji pe ha purwa otjimariva?
Ove nomundu ngu mu ri honga pamwe tareye kutja pombongarero yombongo ndji mai kongorere ko, mape kahungirwa ye.
-
Orupa ruṋe rwombongarero ndu maru ku nana ombango poo orunahepero kove?
Hapo ove oo tjiwa?
Ko jw.org, ove mo yenene okumuna kutja opi nu oruṋe ozombongarero zombongo pu ze hitira mouye auhe.
-
Ozombongarero zetu ze kamburira mo omahungi, ovihorera vyovitjitwa nouvidio. Ozombongarero ze uta nokupata neimburiro nongumbiro
-
Motupa tjiva twoprograma, ovapuratene ve ningirwa okuyandja omaziriro
-
Ovandu avehe mave yakurwa, kutja omaṱunḓu, omundu kourike we, ovakurundu novanatje
-
Ozombongarero zetu otjari. Ovahongonone va Jehova kave wongo otjimariva pozombongarero zawo
5. Pe hepa ongondjero okuyenda kozombongarero zombongo
Tara kotjihorera tjeṱunḓu ra Jesus. Kutja ve kare povitjitwa mbyaavi tjitwa ombura aihe, owo aave sokukayenda omikato vyozokilometa 100 okukapitira mozondundu okuza ko Nasaret okuyenda ko Jerusalem. Lesa Lukas 2:39-42, nu okuzambo hungirira komapuriro nga:
-
Hapo mo munu kutja ouyenda okuyenda ko Jerusalem aau hepa ozongondjero?
-
Omena raye tji wa sokukondja nomasa okuyenda kozombongarero zombongo?
-
Hapo mo munu kutja ounanḓengu okuyenda kozombongarero zombongo nandarire kutja ouzeu okutjita nao? Omena raye?
Ombeibela i tja okuworongana pamwe okurikotamena ku Jehova otjiṋa otjinanḓengu. Lesa Ovaheberi 10:24, 25, nu okuzambo hungirira kepuriro ndi:
-
Omena raye tji twa sokuyenda kozombongarero zombongo aruhe?
OVANDU TJIVA VE TJA: “Kahepero okuworongana pu na varwe. Okurihonga Ombeibela ponganda kwa yenene.”
-
Etjangwa riṋe poo otjihorera tjiṋe okuza mOmbeibela tji tji raisa oviṋa Jehova mbye vanga?
OKUYARUKIRA PO OUSUPI
Okuyenda kozombongarero zombongo maku ku vatere okurihonga ovingi ohunga na Jehova, okukurisa oupanga woye ku na ye nokurikotamena ku ye pu na varwe.
Okurizemburukisa
-
Ongwaye Jehova tje tu ningira kutja tu worongane pamwe?
-
Ovikwaye mbi mo kerihonga pozombongarero zOvahongonone va Jehova?
-
Omomuano uṋe warwe ozombongarero zombongo mu maze yenene okukuvatera?
RIHONGA OVINGI
Hapo tjike indu tji mo tira okuyenda kozombongarero zombongo? Tara kutja omurumendu ngwa ri noumune mbwo wa uta vi okusuvera ozombongarero zombongo.
Tara komuano omurumendu omutanda ma yorokera ozombongarero zombongo na imbi mbya tjita kutja ma kare pozombongarero zombongo aruhe.
Rihonga kutja varwe ve noumune uṋe ohunga nokuyenda kozombongarero zombongo.
Tara kutja omurumendu ngwa ri motjimbumba otjinaumba wa rundurura vi ehupo re indu tja ya kombongarero yombongo yOvahongonone va Jehova.
“Ami hee i kwarwe nokuhina ondjembo yandje” (Oruhungu, 1 ku Juli, 2014)
Mo yenene okutara ku imbi wina
OMAPURIRO NGE PURWA i yovandu OVENGI
Ovahongonone va Jehova ve yandja omerihongero wOmbeibela momuano uṋe?
Ove mo yenene okuungurisa Ombeibela ngamwa aihe indu tji mo rihongo Ombeibela otjari pu nOvahongonone va Jehova. Mo yenene okuṋanga eṱunḓu roye arihe poo omapanga woye okukara pomerihongero woye wOmbeibela.
