ƐLĀ Ō NWU ƆMƐ 10
Ɛgɛnyá Nɛ Ōjila Ku Ujɔ Ku Ācɛ Ocijali Ku Ujehofa Géē Ta Uwɔ Abɔ A?
É hi uwɔ igwú wa ōjila ku ujɔ ku Ācɛ Ocijali Ku Ujehofa jeeje ɛ? Ɔdaŋ ku á gā ōjila a jeeje ɛ ŋ, a lɔfu yɔ i yuufi igbo aflɛyi nɛ a gáā nyɔ a. A lɔfu da ɔka ōhī kahinii: ‘Ɔdi gē ya ipu aōjila ku ujɔ a? Ɔdiya néē cɛgbá a? Ɔdiya nɛ um cika ō nyɔ gā ōjila ku ujɔ a?’ Ipu ɛlā ō nwu nyā, a géē nwu ɛgɛ nɛ ōjila tɔha mla ācɛ ɔhá géē ya ku a tubla Ɔwɔico ajaajɛ klla ta uwɔ abɔ duu a.
1. Ɔdiya nɛ Ācɛ Ocijali Ku Ujehofa gē jila tɔha a?
Má ɛlā nɛ ɔcɛ ō ta Ubáyíbu éyi ka nōo wɛ ɔdā okpɔcii nōo ya nɛ alɔ gē jila tɔha a, ó kahinii: “N géē cɛ̄tra Óndú ā, ipú ójila kú ācɛ́ ɔlɛ nū.” (Aíjē Kú Ɛ̄gbā 26:12) Ɔwɛ ekponu ɔɔma duu, Ācɛ Ocijali Ku Ujehofa gē lɛ eeye nɛhi ō jila tɔha. Ipu oduudu ɛcɛ, é gē jila tɔha fiyɛ igbo éyi ipu alaadi kéē cɛtra Ɔwɔico, kéē gwiije klla gbɔɔkɔ lɛ ɔ. Ipu ihayi doodu, é gē jila tɔha ipu ígwu nɛhi kéē gba Ujehofa ɛ̄gbā.
2. Ɔdi nɛ a gáā nwu ŋma ipu ōjila ku alɔ a?
Ipu ōjila ku ujɔ alɔ gē nwu ɛlā ŋma ipu ɛlā ku Ɔwɔico, alɔ klla gē ‘je íne ku Ɔwɔico teyi peee.’ (Jé Unehemíya 8:8.) Ipu ōjila ku ujɔ, alɔ gē nwu ɛlā lɛyikwu Ujehofa mla aɛnɛɛnɛ uce ō ya ku nu. Abɔ a yɔ i nwu ɛgɛ nɛ ó yihɔtu ku uwɔ tōōtɔ̄ɔ̄ a, a géē tubla ɔ ajaajɛ fiyɛ. A géē wa i nwu ɛgɛ nɛ ó géē ta uwɔ abɔ lɛ ɛnɛɛnɛ oyeeyi nɛ a géē lɛ ɛbɔ.—Ayisáya 48:17, 18.
3. Ɛgɛnyá nɛ a géē lɛ itene ŋma ō piyatɔha mla ācɛ nɛ a gē má ipu ōjila ku ujɔ a?
Ujehofa da alɔ ku “ālɔ̄ gbɛlá ɔwɛ nɛ̄ alɔ í tá aɔ́mpa alɔ ɔtū kwu ɔtū, cɛ́ɛ́ ká ālɔ̄ yíihɔtū tá ācɛ ɔhá mɛ́mla o yá kéē yúklɔ́ olɔhi. Ālɔ̄ híī habɔ̄ ucē kóō tū iyī alɔ bá tɔ̄há ā tá ŋ́.” (Ācɛ Uhíbru 10:24, 25) Ipu ōjila ku alɔ, a géē má ācɛ nōo yihɔtu iyi uwa ɔkwɔɔkwɛyi klla dɔka ō nwu ɛlā lɛyikwu Ɔwɔico tōōtɔ̄ɔ̄ bɛɛka awɔ a duu. A géē po abɔ é yɔ i kɛla ō ta ɔtu kwu ɔtu mla iyi uwa ŋma ipu Ubáyíbu. (Jé Ācɛ Uróm 1:11, 12.) A géē wa i jé ācɛ ɔhá nōo lɛ ɔba amāŋ ɔnyā amāŋ ācɛ nōó lɛ ɔba amāŋ ɔnyā ɛ ŋ nōo lɛ eeye naana néē yɔ i má unwalu ɛyɛɛyɛyi a. Ɛnyā wɛ ɔdā ōhī nōo ya nɛ Ujehofa dɔka ku alɔ bēē jila tɔha eko doodu a!
JÉ GƆBU
Nwu ɔdā nōo gē ya ipu ōjila ku Ācɛ Ocijali Ku Ujehofa a mla ɔdā nōo ya ɛɛ nōó wɛ ɔdā olɔhi ku alɔ ceyitikwu ō bēē wa ōjila ku ujɔ a.
4. Ōjila ku Ācɛ Ocijali Ku Ujehofa
Eko ikee a, Ācɛ O Yɛce Ukraist gē jila tɔha ojigogo kéē gba Ujehofa ɛ̄gbā. (Ācɛ Uróm 16:3-5) Jé Ācɛ Ukólōsi 3:16, cɛɛ ku aa kɔka lɛyikwu ɔka nyā:
-
Ɛgɛnyá nɛ Ācɛ O Yɛce Ukraist ku eko aflɛyi a gba Ujehofa ɛ̄gbā a?
Icɛ, Ācɛ Ocijali Ku Ujehofa gē jila tɔha ipu Agbla ku Ajɔɔcɛ kéē gba ɛ̄gbā tɔha. O ya ɛɛ ku a má ɛgɛ nɛ ōjila a wɛ a, lɛ UVIDIO nyā mafu. Oŋma ɔɔma a, leyi má ifoto ku ōjila ku ujɔ cɛɛ ku aa kɔka lɛyikwu aɔka nōo ba nyā.
-
Ɔdi gē ya ipu Agbla ku Ajɔɔcɛ nɛ a má nōo cɛtɔha mla ɛlā nɛ a jé ŋma ipu ɔkpá ku Ācɛ Ukólōsi 3:16 a?
-
Ipu uvidio amāŋ ifoto a, a má ɔdā duuma ɔhá lɛyikwu ōjila a nōo he uwɔ ɔtu?
Jé 2 Ācɛ Ukɔ́rīnti 9:7, cɛɛ ku aa kɔka lɛyikwu ɔka nyā:
-
Ɔdiya nɛ Ācɛ Ocijali Ku Ujehofa i gē miyɛ ije ipu ōjila ku uwa ŋ ma?
Awɔ mla ɔcɛ nōo yɔ i klɔcɛ mla uwɔ a kóō kɔka tɔha lɛyikwu ɔdā néē géē kɛla lɛyikwu ɔ ipu ōjila ku ujɔ alaadi nyā.
-
Aya ku ōjila a nyá nɛ a gbɛla ka ō géē he uwɔ ɔtu fiyɛ duu amāŋ ɛ̄nɛ̄ a gbɛla ka ō géē tiile gā uwɔ a?
A jé?
Ipu jw.org, a lɔfu má ɛga mla eko néē gē ya ōjila ipu oduudu ɛcɛ a.
-
Ōjila ku alɔ lɛ ō ya mla ɛlā ō ka tɛɛcɛ ŋma Ubáyíbu, ocabɔ mafu mla uvidio ɛyɛɛyɛyi. Ōjila a gē gbɔɔ mla ijé mla ɔkɔ ō gba. Ó kē i ŋmɛyi mla ijé mla ɔkɔ ō gba duu
-
Ɛpleeko nɛ ōjila a yɔ i gɔbu a, ó lɛ aya ōhī néē gē jɛga lɛ ācɛ nōo yɔ ipu ōjila a kéē ta ohi
-
Ɛjɛɛji ācɛ lɔfu wa gla, kwu ācɛ apɔlɛ, ācɛ nōó lɛ ɔba amāŋ ɔnyā ɛ ŋ, ācɛ nōo le hilokplici mla ayipɛ nɛ̄ŋcɛ́ duu
-
Ōjila ku alɔ wɛ alaha. Ācɛ Ocijali Ku Ujehofa i gē miyɛ ije ŋma ɛgiyi ācɛ gbɔbu ɛɛ kéē wɛ ōjila amāŋ gē lɛ ogo kwu abɔ gē miyɛ ije ŋ
5. A cɛgbá ō ceyitikwu o ya ɛɛ ku a gā ōjila ku ujɔ
Leyi yɛ ocabɔ ku apɔlɛ ku Ujisɔsi. Ihayi doodu, é cɛgbá ō yɛ iyawu bɛɛka ukilomita ofu ɛhɔ (100) a bu ɛyi ɛfu ŋma Unasareti gā Ujerusalɛm o ya ɛɛ kéē gā agbliihɔ a. Jé Ulúku 2:39-42, cɛɛ ku aa kɔka lɛyikwu aɔka nōo ba nyā:
-
A gbɛla ka iyawu ku uwa gā Ujerusalɛm a cɛgbá ō ceyitikwu?
-
Ɔdiya nɛ a géē cɛgbá ō ceyitikwu o ya ɛɛ ku a gā ōjila ku ujɔ a?
-
A gbɛla kóō wɛ ɔdā olɔhi ō bēē gā ōjila ku ujɔ kpɔ, naana nōó tɔɔtɛ gā uwɔ ŋ ma a? Ɔdiya nɛ a ka lɛ a?
Ubáyíbu ka ō jila tɔha ku alɔ gba Ujehofa ɛ̄gbā wɛ ɔdā nōo cɛgbá nɛhi. Jé Ācɛ Uhíbru 10:24, 25, cɛɛ ku aa kɔka lɛyikwu ɔka nyā:
-
Ɔdiya nɛ alɔ cika ō gā ōjila ku ujɔ ojigogo a?
ĀCƐ ŌHĪ GĒ KA: “Ku á cɛgbá ō jila tɔha mla ācɛ ɔhá ŋ. Ó jɛ ō klɔcɛ ku Ubáyíbu ɔlɛ.”
-
Ɛga ku Ubáyíbu nyá amāŋ ocabɔ ku Ubáyíbu nyá mafu ɔdā nɛ Ujehofa dɔka a?
ƆDI NƐ A NWU A?
Ō bēē gā ōjila géē ta uwɔ abɔ nwu ɛlā tōōtɔ̄ɔ̄ lɛyikwu Ujehofa, ó géē ya ku ɛma ku uwɔ mla anu kóō lɔfu iyē fiyɛ klla ta uwɔ abɔ gba ɔ ɛ̄gbā mla ācɛ ɔhá duu.
Aɔka ō tu alɔ ɛlá kwu ɔdā nɛ alɔ nwu
-
Ɔdiya nɛ Ujehofa gē ta alɔ ɔtu kwu ɔtu ku alɔ bēē jila tɔha a?
-
Ɔdi nɛ a géē nwu ipu ōjila ku Ācɛ Ocijali Ku Ujehofa a?
-
A gbɛla kóō lɛ ɔwɛ duuma ɔhá nōo gā ōjila ku ujɔ a lɔfu ta uwɔ abɔ?
JILA ƐLĀ NYĀ MÁ TŌŌTƆ̄Ɔ̄
Ɔdaŋ ku a kéē yɔ i yuufi ō gā ōjila ku ujɔ bɛɛ? Má ɛgɛ nɛ ɔcɛnyilɔ éyi nōó ya ɔ lɛ a gbɔbu gā gbɔɔ ō yihɔtu ku ōjila a.
Má ɛgɛ nɛ ɔcɛnyilɔ éyi jɔɔnyɛ ōjila a mla ɔdā nɛ ó ya o ya ɛɛ kóō yɔ i nyɔ ōjila a gɔbu a.
Nwu ɛlā lɛyikwu ɛgɛ nɛ ɔtu gē ya ācɛ ōhī lɛyikwu ōjila a.
“Ɔdiya Nɛ A Cika Ō Yɔ I Gā Ōjila Ipu Agbla Ku Ajɔɔcɛ A?” (Web article)
Má ɛgɛ nɛ ɔcɛnyilɔ éyi nōo gē ya ɔdobɔbi klla wɛ ipu ígwu obɔbi a piya oyeeyi ku nu abɔ igbihi nɛ ó gā ōjila ku ujɔ ku Ācɛ Ocijali Ku Ujehofa a.
“I Never Went Anywhere Without My Gun” (The Watchtower, July 1, 2014)
