ANG ỌJẸ́JẸ 10
Ụgbẹyị Oyina Ọjịra-jịra nya Alibeenu nya IJihova à Tị́ ka Dang Ụbwọ?
Ị wụrụng ka ọjịra-jịra nya Alibeenu nya iJihova ẹnẹhẹ lẹẹ? Kori ká ka ẹnẹhẹ lẹka, ọ ka lang abwẹbwẹhẹ la ọkaka ụka nya ọgbanyẹ myị́. À ka kụ irya myị́: ‘Ịyẹ ị tị́ kaa họ ọọjịra-jịra ịwẹ? Ịyẹ tị́ du kị baba? Ịyẹ tị́ du kam ka ka?’ A-ang ọjẹ́jẹ ọlẹ, à ka jẹ́ jaabwọ ká ọ-ka ọjịra-jịra bala angịkịla ka jẹ́-ẹ tụ́ng ju Ohe chwẹẹ bala ọ-dang ahụ ayịdang ụbwọ.
1. Ịyẹ tị́ du ká Alibeenu nya iJihova kaa la ọjịra-jịra?
Yẹ jaabwọ ká ọngọ da ịBayịbụụ ọhẹ ya ẹla ọkpọnchị ọlẹ kọ du kahị baba nyọka tọ awụlẹ: “M̀ gwogbo ha [iJihova] ẹ-ẹpwarịrị nya ọjịra-jịra nya angịnyị nyamwụ.” (Eje Ọnyịịla 26:12) Ụgbẹyị ọwọwa, Alibeenu nya iJihova kaa ye ọkẹkẹnị ọtụka bwula ọ-ka ọjịra-jịra. Ụpa nya odehe wuu, ị kaa to awụlẹ epwihi ọnyị myị́ ọnyị nyọka yogbo ha Ohe, mweje, bala ọ-raabwọ. Ụka ịmanyị-ịmanyị ẹ-ẹpwụ nya ẹka, ị kaa ka ọtụguru ịtụka nyọka gbịgba ha Ohe.
2. Ịyẹ a tị́ ka jẹ́ ọọjịra-jịra nyahị?
Ọọjịra-jịra, ahị kaa mẹ ang jẹ bwu Omyi Ẹla nya Ohe, juwa “yọọ da lọnụ dodehe” bala ọ-wụlẹ etu nyamwụ. (Wa iNehemaya 8:8.) Ọọjịra-jịra nyahị, à ka jẹ́ ang u-uhye nya iJihova bala abwụma ịnyịịla nyamwụ. Jaabwọ ká wẹẹ jẹ́ ang gụ ọwọwa u-uhye nya ọháha ọlẹ kọ la ẹ-ẹga nyang, à ka tụ́ jwoo chwẹẹ gụ ọwọwa ịnyịnyị. À ka yẹ ịnyịnyị jaabwọ kọ ka dang ụbwọ la ọhịhị ọ-la etu.—Ayịsaya 48:17, 18.
3. Ányị a tị́ ka ye apyobwuna bwula ọ-yẹjula angịkịla ọọjịra-jịra nyahị?
IJihova byihi yẹkẹẹ, ‘anụ juwa du awụlẹ ju ọháha ọlala bala ụkụrwọ ọnyịịla ọhọhọ. Anụ juwa yẹhị da ọjịra-jịra ọlala lawụlẹ nyanụ bwee kpong-kpong ka.’ (Ala iHiburu 10:24, 25) Ọọjịra-jịra nyahị, à ka ta angịlẹ kị kaa kpahị ju awụlẹ nyịlẹhị, kị tị tịtọ nyọka jẹ́ ang gụ ọọwa u-uhye nya Ohe Oluhye, lala ahụ-ahụ. À ka wo kị ka ya ẹla o-ju awụlẹ ọhụ bwu ẹpwụ nya ịBayịbụụ. (Wa Ala iRom 1:11, 12.) À ka myịmyị tọ angịkịla, angị ye ahụ bala ọ-rwọrụ bala angị họ ịnyị lẹka, ịlẹ kị kaa chị ọkẹkẹnị nanana nyori ị ka la akama juwa myị́. Ang ịhyẹ ịlẹ kị du ká iJihova tịtọ kahị ka tawụlẹ ụka myị́ ụka à wẹ lẹ!
JẸ́ GỤ ỌỌWA
Jẹ́ ang ọlẹ kị kaa họ ọọjịra-jịra nya Alibeenu nya iJihova bala ang odudu kọ há kahị ka maga nyọka ka ọjịra-jịra ịwẹ.
4. Ọjịra-jịra nya Alibeenu nya iJihova
Lụka onyogo, Angịnyị nya ịKịrayịsị kaa tọ awụlẹ ụka myị́ ụka nyọka gbịgba ha iJihova. (Ala iRom 16:3-5) Wa Ala iKolosi 3:16, kanụ ya ẹla u-uhye nya ịtọ ẹla ọlẹ:
-
Ányị Angịnyị nya ịKịrayịsị nya ọgbanyẹ à tị́ kaa gbịgba ha iJihova?
Alẹ, Alibeenu nya iJihova kaa tawụlẹ ịnyịnyị ẹ-ẹga ọgbịgba. Nyọka yẹ jaabwọ ká ọjịra-jịra nyaa kaa la, Yẹ IFIM ọwẹ. Kori ká họ ịnyị kpá, à yẹ ụrụrụ nya ọjịra-jịra ọwẹ, kanụ ya ẹla u-uhye nya ịtọ ẹla ịlẹ.
-
Ányị ẹla ọlẹ kịị họ u-Ube nya Ịpyị-Adịrahụ à tị́ me ẹla ọlẹ ká wa bwu ụpwụ nya Ala iKolosi 3:16?
-
Bwu ẹpwụ nya ifim ọwẹ lee ifoto ọwẹ, à yẹ ịngịhyẹ ọkịla ọlẹ kọ kpụng ịpyọ u-uhye nya ọjịra-jịra?
Wa 2 Ala ịKọrịntị 9:7, kanụ ya ẹla u-uhye nya ịtọ ẹla ọlẹ:
-
Ịyẹ tị́ du kịị da angịnyị okpoko ọọjịra-jịra nya Alibeenu nya iJihova ka?
Ahụ bala ọngọmẹjẹ nyang a kụ ẹhị yẹ ẹla ọlẹ kị wẹẹ ka jẹ́ ọọjịra-jịra nya epwihi ọlẹ.
-
Ụpa nya ọjịra-jịra oyina bwu ẹpwụ nya ịwẹ a tị́ me irya kọ ka kpịpyọ lee o-ju apyobwuna hang?
À jẹ́ ẹla ọlẹ?
Ịị jw.org, à ka jẹ́-ẹ jẹ́ ẹga bala ụka ọlẹ kị kaa họ ọjịra-jịra ụpa nya odehe wuu.
-
Ọọjịra-jịra nyahị, ahị kaa ke ụrụ wo ẹla oyaya, yẹ ọ-họ mẹjẹ bala ifim. Ọjịra-jịra kaa dọmwụ bala ocheju la eje bala abwọ ọrịrị
-
Ụka ọhẹ ọọjịra-jịra, ị kaa ya iwe da ká angịnyị ka wẹ ịtọ ẹla
-
Ahị da ọng myị́ ọng wuu ọwụraba—ugbiyegu, angị ji lụbwaa, angịgbahị, bala anjwo
-
Ịị nwuri nyọka wẹ ọjịra-jịra nyahị ka. Alibeenu nya iJihova á tị kaa da angịnyị okpoko lee ọ-kpa ẹja nya ọhaha tụ́ angịnyị da ka
5. Ọjịra-jịra ọkaka ju aga ọmama ẹ-ẹpwụ
Kụ ẹhị yẹ ọ-chụ pwokwita nya ugbiyegu nya iJisọsị wẹẹ. Nyọka ka ube ịgọgọ ẹka ọnyị myị́ ọnyị, ị kaa jẹdịyẹ bwu uhye nya ịgbọdọ lala ịmayịlị 60, bwu ịNasareti ka iJerusalẹm. Wa iLuku 2:39-42, kanụ ya ẹla u-uhye nya ịtọ ẹla ịlẹ:
-
À me irya ká ẹdịyẹ ọ-ka iJerusalẹm ọwẹ ju aga ọmama ẹ-ẹpwụ?
-
Ịyẹ tị́ du kọ ka lang ahụ ujwo myị́ nyọka wẹ ọjịra-jịra?
-
À me irya kọ há nyọka ka kori kọ dọmwụ lang ujwo? Ịyẹ tị́ du?
ỊBayịbụụ ya nyori nyị baba káahị nyị ka tawụlẹ nyọka gbịgba ha Ohe. Wa Ala iHiburu 10:24, 25, kanụ ya ẹla u-uhye nya ịtọ ẹla ọlẹ.
-
Ịyẹ tị́ du kahị ka ka ọjịra-jịra ụka myị́ ụka?
ANGỊHYẸ KAA YẸKẸẸ: “Á baba nyọka tụguru bala angịkịla ka. Ọ-jẹ́ ịBayịbụụẹ-ẹpwa nyịlọng nwà lẹ.”
-
Ụpwụ Ịgọgọ lee oja ọlẹpwụ nya ịBayịbụụ oyina à tị́ mẹ ẹla ọlẹ ká iJihova tịtọ jẹ?
ẸLỊYẸ A TỊ́ JẸ́?
Ọjịra-jịra ọkaka ka dang ụbwọ jẹ́ ang gụ ọọwa u-uhye nya iJihova, ju igu oriri nyang balọọ ọngịrị, bala ọ-gbịgba họọ ịnyịnyị bala angịkịla.
Ẹlịyẹ A Tị́ Yụbwọ Chị?
-
Ịyẹ tị́ du ká iJihova juhi ọhụ nyori ahị nyị tawụlẹ bala angịkịla?
-
Ịyẹ a tị́ ka jẹ́ ọọjịra-jịra nya Alibeenu nya iJihova?
-
À me irya ká ọjịra-jịra ka jẹ́-ẹ dang ụbwọ a-agbẹyị ịkịla?
JẸ́ ANG ỊLẸ DỌỌ U-UHYE
Kori ká ọjịra-jịra ọkaka á lang uhihi bẹẹ? Yẹ jaabwọ ká ọjịra-jịra wẹ ka há ọlẹng ọhẹ ọlẹ kọ la irya ọlịịwẹ ene-ene wẹẹ.
Yẹ jaabwọ ká ọjịra-jịra kpụ ọnyị ọlẹng ọhẹ ịpyọ bala ang ọlẹ kọ họ nyọka kịnyaa la ọwẹwẹ.
Jẹ́ irya ọlẹ ká angịkịla la u-uhye nya ọjịra-jịra ọkaka.
“Ịyẹ Tị́ Du Kahị ka Tawụlẹ u-Ube nya Ịpyị-Adịrahụ?” (Ụpwụ ọla intanẹtị)
Yẹ jaabwọ ká olukpilo ọhẹ yẹ ọhịhị nyamwụ da nyọlẹ kọ ka ọjịra-jịra nya Alibeenu nya iJihova.
“Ḿ Kaa Ka Ẹgẹgẹhẹ Hi Ọkọnị Nyam ka” (Ẹpwang ọ-Kụ Gbeji nya ahyẹẹnụ 1 nya Ọya Ọharwiye, 2014)