LESN 10

Wen Yu Go A Di Jeuova Witnis Miitn Dem, Wa Dat Kyan Du Fi Yu?

PLIE

Yu eva go a wan Jeuova Witnis miitn yet? Ef yu neva go a wan miitn bifuo, yu mait-a fiil fried fi go. Yu mait-a a wanda wa apm a di miitn dem. Wa mek dem kip dem miitn ya? Wa mek wi fi go a dem miitn ya? Wen yu stodi da lesn ya, yu a-go si ou di miitn dem kyan elp yu fi jraa nier tu Gad an ou dem kyan elp yu iina yu laif.

1. Wa a di bigis riizn wa mek wi fi go a miitn?

Si wan a di bigis riizn ya wa mek wi fi go a wi miitn dem. Iina Saam 26:12, it tel wi se: “Mi tan op mongks yu piipl we gyada op tugeda fi worship yu. Mi naa go tap priez Jeuova.” A siem so di Jeuova Witnis dem we de aal uova di worl, api fi de a miitn wid dem wan aneda a wiik taim fi sing an prie an priez Gad. An somtaim iina di ier dem av som big miitn we dem go fi worship Gad.

2. Wen yu kom a wi miitn dem, wa’a som a di sitn dem we yu a-go lorn?

Wen wi go a di miitn dem, wi a-go stodi Gad Wod “iina wan wie” we piipl kyan “get klier klier” wa it a se. (Riid Niimaiya 8:8.) Wi a-go lorn muor bout Jeuova an di gud wiez dem we im av. Wen yu get fi si umoch im lov yu, it a-go mek yu fiil kluosa tu im, an yu a-go si ou im kyan elp yu fi av wan gud laif rait ya nou.—Aizaiya 48:17, 18.

3. Wa gud kyan apm wen yu spen taim wid di piipl dem we de a wi miitn dem?

Jeuova a tel wi se wi fi ‘tingk bout ou wi kyan gwaan push wi wan aneda fi shuo lov an fi du di gud sitn dem. Mek wi gwaan miit tugeda an no tap.’ (Iibruu 10:24, 25) Wen yu kom a wi miitn dem, yu a-go get fi nuo piipl we riili lov dem wan aneda an piipl we riili waahn fi nuo muor bout Gad jos laka yu. Yu a-go ier piipl taak bout tingz fram di Baibl we kyan go elp yu fi bil op yu fiet. (Riid Ruoman 1:11, 12.) Yu a-go get fi taak tu aal kain-a piipl—som we marid an som we no marid. An yu a-go si ou iivn duo dem av prablem, dem stil api. So yu si wa mek Jeuova riili waahn wi fi go a di miitn dem?

LORN SOM MUO

Fain out wa gwaan a di Jeuova Witnis miitn dem an wa mek yu fi chrai an du evriting fi go a dem miitn de.

4. Di Jeuova Witnis miitn dem

Di fos set a Kristiyan dem we did de bout yuus tu worship tugeda. (Ruoman 16:3-5) Riid Koloshan 3:16, an den wi a-go taak bout da kwestiyan ya:

A ou dem Kristiyan de yuus tu worship Jeuova?

A siem so tide, di Jeuova Witnis dem worship tugeda a dem Kindom Aal. Plie di VIDIYO fi si wa gwaan a dem miitn de. Afta dat, luk pan di picha dem we shuo wa gwaan a di miitn dem, an den wi a-go taak bout dem kwestiyan ya:

VIDIYO: Wa Apm A Wan Kindom Aal? (2:12)

Wen yu riid Koloshan 3:16, ou di miitn dem we dem yuus tu kip komiin laik di wan dem we wi a kip tide?
Iina di vidiyo ar di picha, yu did si notn els we yu laik bout di miitn dem?

Riid 2 Korintiyan 9:7, an den wi a-go taak bout da kwestiyan ya:

Wa mek di Jeuova Witnis dem no tek op kalekshan a dem miitn?

Yu an di sumadi we a stodi wid yu kyan luk pan som a di sitn dem we a-go gwaan a wan a di miitn dem fi da wiik ya.

Wich wan a dem sitn de we a-go gwaan a di miitn yu riili waahn fi ier bout ar yu tingk kyan elp yu?

Yu did nuo se?

Yu kyan go pan jw.org fi fain out wich paat dem kip di miitn dem an wa taim dem staat aal uova di worl.

Wen yu kom a di miitn dem, yu a-go get fi ier som Baibl taak, yu a-go get fi wach som vidiyo, an yu a-go si piipl a shuo ou wi kyan priich an tiich. Wi sing an prie fi di miitn staat, an wi sing an prie wen it don
Iina som paat a di miitn, di wan dem we de de kyan put op dem an, an ansa kwestiyan ef dem waahn
Enibadi we waahn fi kom kyan kom—pikni kyan kom, piipl we op iina iej, fambili, an piipl we no marid
Yu no afi pie notn fi go a di Jeuova Witnis miitn dem, an wi no tek op no kalekshan niida

5. Yu fi du evriting yu kyan du fi go a di miitn dem

Tingk bout Jiizas fambili. Evri ier dem did afi waak bout 60 mail uova som il an mountn, fram Nazaret tu Jeruusilem, fi go a wan big miitn. Riid Luuk 2:39-42, an den wi a-go taak bout dem kwestiyan ya: