ĨSOMO YA 10
Maũmbano ma Ngũsĩ sya Yeova Matonya Kũũtethya Ata?
We waathokwʼa ũmbanonĩ wa Ngũsĩ sya Yeova? Ethĩwa ndwaathi ũmbanonĩ o na ũmwe, no wĩthĩwe ũyĩwʼa wia kũthi ya mbee. No wĩthĩwe ũyĩkũlya-ĩ: ‘Nĩ kyaũ kĩendeeaa maũmbanonĩ asu? Nĩkĩ nĩ ma vata? Nĩkĩ naĩle kũthi? Ĩsomonĩ yĩĩ nũkwĩmanyĩsya ũndũ kũmbana na andũ ala angĩ kũtonya kũtuma ũmũthengeea Ngai, na ũndũ we mwene ũtonya kũtetheka.
1. Nĩ ũndũ wĩva wa vata ũtumaa Ngũsĩ sya Yeova syũmbana vamwe?
Sisya wone ũndũ mũandĩki ũmwe wa Mbivilia woonanisye kĩtumi kĩla kĩnene kya kũmbanaa vamwe. Aisye atĩĩ: “Maũmbanonĩ ngamũtaĩaa Yeova.” (Savuli 26:12) Ngũsĩ sya Yeova nitanaa mũno yĩla syakomana vamwe. Kĩla kyumwa ĩũlũ wa nthĩ yonthe, nĩmombanaa nĩ kana mamũtaĩe Ngai, mamwinĩe, na maimũvoya. O na ĩngĩ, mavinda meana ũna kĩla mwaka, nĩmombanaa kwondũ wa maũmbano manene.
2. Ũtonya kwĩmanyĩsya kyaũ maũmbanonĩ maitũ?
Yĩla twathi maũmbanonĩ, nĩtũsomeawa Ndeto ya Ngai na tũyĩelewʼa nĩ kana ‘tũmanye ũndũ twasomewa.’ (Soma Neemia 8:8.) Wooka maũmbanonĩ maitũ, ũkeemanyĩsya ĩũlũ wa Yeova na nguma syake sya kwendeesya. O ũndũ waendeea kũmanya kana nũkwendete, nowʼo ũkenda kũmũthengeea mũnango. O na ĩngĩ ũkamanya ũndũ Yeova ũtonya kũũtetheesya nĩ kana wĩkale wĩ mwĩanĩe.—Isaia 48:17, 18.
3. Ũtonya kũtetheka ata waea ngewa na ala angĩ maũmbanonĩ?
Yeova atwĩĩte “tũendeee kũthĩnĩkĩa ala angĩ nĩ kana tũmathuthye methĩwe na wendo na meko maseo, tũte kũeka kũmbana vamwe.” (Aevelania 10:24, 25) Maũmbanonĩ maitũ ũkeethĩana na andũ mathĩnĩkĩaa ala angĩ, na me na wendi wa kwĩmanyĩsya maũndũ maingangĩ ĩũlũ wa Ngai o taku. Ũkeewʼa maiweta maũndũ ma kwĩkĩa vinya ala maumĩte Mbivilianĩ. (Soma Alomi 1:11, 12.) O na ĩngĩ, ũkeethĩwa ũtonya kũneena na amwe masindĩte mathĩna ala makwataa ala me mũtwaanonĩ na ala mate mũtwaanonĩ. Isu no itumi imwe syonanasya nĩkĩ Yeova wendaa tũmbanae vamwe kĩla ĩvinda!
ĨMANYĨSYE MŨNANGO
Sisya ũmanye kĩla kĩendeea maũmbanonĩ ma Ngũsĩ sya Yeova, na nĩkĩ nĩ ũndũ wa vata twĩke kyonthe kĩla tũtonya tũthi maũmbanonĩ asu.
4. Maũmbano ma Ngũsĩ sya Yeova
Ĩvindanĩ ya atũmwa, Aklĩsto nĩmombanaa vamwe nĩ kana mamũthaithe Yeova. (Alomi 16:3-5) Somai Akolosai 3:16, na ĩndĩ mũineenea ĩkũlyo yĩĩ:
-
Aklĩsto ma ĩvinda ya atũmwa mamũthaithaa Yeova ata?
Ũmũnthĩ, o nasyo Ngũsĩ sya Yeova nĩsyũmbanaa kĩla ĩvinda nyũmbanĩ syoo sya ũthaithi. Wenda kũmanya ũndũ maendeeasya maũmbano moo, ĩloelei VITIO. Ĩtina wa ũu, sisyai visa wonanĩtye maũmbano ma kĩkundi na mũineenea makũlyo aa maatĩĩe:
-
Nĩ maũndũ meva woona nthĩnĩ wa vitio ĩsu mavwʼanene na ala wasoma ĩandĩkonĩ ya Akolosai 3:16?
-
Nthĩnĩ wa vitio kana visa ũla twoona, we nĩwoona ũndũ ũngĩ ũkonetye maũmbano ũkwĩwʼa waũkiita?
Somai 2 Akolintho 9:7, na ĩndĩ mũineenea ĩkũlyo yĩĩ:
-
Nĩkĩ Ngũsĩ sya Yeova mataĩvĩthasya andũ nĩ kana malike maũmbanonĩ moo?
Sisyai wĩ na mwalimũ waku maũndũ ala makaneenewa maũmbanonĩ ala maatĩĩe.
-
Nĩ kĩlungu kĩva kya maũmbano asu ũkwĩwʼa kyakwendeesya?
We nĩwĩsĩ?
Walika nthĩnĩ wa jw.org/kam, no ũsisye ũkamanya ĩũlũ wa nthĩ yonthe maũmbano maitũ mekawa va, na ĩndĩĩ.
-
Maũmbanonĩ maitũ nĩkumawʼa maũvoo, kũkethĩwa na mawonanyʼo, na kũkonanwʼa vitio. O na ĩngĩ, twambĩĩaa na tũiminĩĩa maũmbano maitũ na wathi na mboya
-
Ilungunĩ imwe sya maũmbano maitũ ethukĩĩsya nĩmathokawʼa maumye maelesyo
-
Kĩla mũndũ ethĩawa e mũthokye—ala me na mĩsyĩ, ala mate atwae kana matatwaanĩte, ala akũũ, o na syana
-
Mũndũ ndaĩvaa kĩndũ nĩ kana oke maũmbanonĩ maitũ, o na nthembo iyosanawʼa
5. Kĩthito nĩkyendekaa nĩ kana mũndũ athi maũmbanonĩ
Kwatata kũsũanĩa mũsyĩ wa Yesũ. Nĩ kana mavike ũmbanonĩ ũla weekawa kĩla mwaka, maaĩlĩte kuma Nasaleti na maithi Yelusaleme, mũendo wa maili ta 60 mesĩle nzĩa yĩ iĩmanĩ. Somai Luka 2:39-42, na ĩndĩ mũineenea makũlyo aa:
-
We nũkwona kyalo kĩu kya kũthi Yelusaleme ta kyendaa mũndũ ekĩe kĩthito kingĩ?
-
Wĩona nĩkĩ waĩle kwĩkĩa kĩthito nĩ kana ũvike maũmbanonĩ?
-
We nũkwona ũtonya kũtetheka wathi maũmbanonĩ? Na nĩkĩ wasũngĩa ũu?
Mbivilia yonanĩtye kana nĩ ũndũ wa vata mũno kũmbanaa vamwe kwondũ wa ũthaithi. Somai Aevelania 10:24, 25, na ĩndĩ mũineenea ĩkũlyo yĩĩ:
-
Nĩkĩ twaĩle kũendaa maũmbanonĩ tũte kũtĩĩa?
ANDŨ AMWE MAASYA: “Ti nginya ũkombana na andũ ala angĩ. Mũndũ no esomee Mbivilia e mũsyĩ.”
-
Nĩ ĩandĩko yĩva kana ngelekanyʼo yĩva yĩ Mbivilianĩ yonanĩtye kĩla Yeova wendaa?
KĨLA TWEEMANYĨSYA
Kũthi maũmbanonĩ kũkaũtetheesya wĩmanyĩsye maũndũ maingangĩ ĩũlũ wa Yeova, ũlũlũmĩĩlye ũnyanya waku vamwe nake, na ũimũthaitha wĩ na andũ ala angĩ.
Makũlyo ma Kũsyokeleela
-
Nĩkĩ Yeova ũtwĩkĩaa vinya tũmbanae vamwe?
-
Ũkeemanyĩsya kyaũ wathi maũmbanonĩ ma Ngũsĩ sya Yeova?
-
Wĩona ũtonya kũtetheka kwa nzĩa ĩngĩ yĩva wathi maũmbanonĩ?
MAŨNDŨ ANGĨ MA KWĨMANYĨSYA
Nata ethĩwa wĩĩwʼa wĩ na wia wa kũthi maũmbanonĩ? Ĩloele wone ũndũ mũndũũme ũmwe waĩ na thĩna ũsu wesie kwenda maũmbano mũno.
Ĩloele wone ũndũ mũndũũme ũmwe wa mũika watanĩie maũmbano, na kĩla weekie nĩ kana ndakatĩae.
Soma wone ũndũ angĩ mewʼaa ĩũlũ wa maũmbano.
“Nĩkĩ Waĩle Kũthi Maũmbano Nyũmbanĩ ya Ũsumbĩ?” (Ũvoo wĩ kĩsesenĩ)
Soma wone ũndũ mũndũũme ũmwe wendete ũngʼendu wavĩndũkie yĩla waendie maũmbanonĩ ma Ngũsĩ sya Yeova.
“Kĩla Vandũ Naendaa Nĩkuĩte Ĩvuti Yakwa” (Mũsyaĩĩsya, Ĩtukũ 1, Mwei wa 7, 2014)
No Wendeewʼe Nĩ Ii
MAKŨLYO MAKŨLAWʼA MAVINDA MAINGĨ
Mũvango wa Ngũsĩ sya Yeova wa Kũmanyĩsya Andũ Mbivilia Ũtwaĩĩawʼa Ata?
Mũvango ũũ wa masomo ma Mbivilia ũseũvĩtwʼe nĩ Ngũsĩ sya Yeova ndwĩ ndĩvi, na no ũtũmĩe Mbivilia ĩla ũkwenda. Ĩwʼa wĩ mũthasye kũthokya mũsyĩ waku wʼonthe kana mũnyanya ũla ũkwenda.
