LYNNONG 10

Kumno ki Jingïalang jong ki Nongsakhi U Jehobah ki Lah Ban ai Jingmyntoi ïa Phi?

TEM

Hato la ju don ba khot sngewbha ïa phi sha ki jingïalang jong ki Nongsakhi U Jehobah? Lehse phin sngew lehraiñ ban leit, ne phi lah ban pyrkhat: ‘Ka long kumno ha kine ki jingïalang? Balei kine ki jingïalang ki long kiba donkam? Balei nga dei ban leit sha kine ki jingïalang?’ Ha kane ka lynnong, phin sa tip kumno ka jingïakynduh lang bad kiwei ka lah ban ïarap ïa phi ban kham jan sha U Blei bad kumno ka lah ban ïarap ïa ka jingim jong phi.

1. Kaei ka daw kaba kongsan ba ki Nongsakhi U Jehobah ki ïakynduh lang?

Peit kumno uwei u nongthoh Baibl u la pynpaw ïa ka daw bakongsan tam ban ïakynduh lang bad kiwei: ‘Ïaroh ïa U Jehobah. . . ha ka jingïalang.’ (Salm 111:1) Kumjuh ruh ki Nongsakhi U Jehobah ha satlak ka pyrthei ki ïalumlang ban ïaroh ïa U Blei, ban rwai bad ban duwai. Ki ïakynduh lang man la ka taïew bad kane ka wanrah jingkmen shibun ïa ki. Man la u snem, ki ju ïakynduh lang ruh katto katne sien ban ïamane lang ha ki jingïaseng heh.

2. Phin ïoh jinghikai aïu ha ki jingïalang jong ngi?

Baroh ki jinghikai kiba ngi ïoh ha ki jingïalang, ki dei na ka Baibl bad la ‘pule shai . . . bad ai ïa ka jingmut.’ (Pule Nehemaïah 8:8.) Phin sa ïoh jinghikai shaphang U Jehobah bad ki jinglong jong u. Katba phi nang tip shaphang ka jingieid jong u, katta phin nang kham jan sha u. Phin sa ïohi ruh kumno u lah ban ïarap ïa phi ban im ka jingim kaba kmen.—Isaïah 48:17, 18.

3. Kumno ki briew ha ki jingïalang ki lah ban ïarap ïa phi?

U Jehobah u ong ïa ngi ban ïa ieid bad ban leh bha “khlem da iehnoh ïa ki jingïaseng lang jong ngi” bad ban “ïakyntu paralok.” (Hebru 10:24, 25) Ha ki jingïalang, phin sa ïakynduh ïa ki briew kiba ieid shisha iwei ïa iwei bad kiba kum ma phi, ki thrang ban tip shuh shuh shaphang U Blei. Phin sa ïohsngew ba ki ai jingpynshlur na ka Baibl. (Pule Rom 1:11, 12.) Phi lah ruh ban sngap kumno ki la ïaleh bad la ki jingeh ne ban long kiba kmen wat hapdeng ki jingeh. Kine ki dei tang katto katne ki daw ba balei U Jehobah u kwah ïa ngi ban ïakynduh lang man la ka por!

WAD SHUH SHUH

Peit ki jingïalang jong ki Nongsakhi U Jehobah ki long kumno bad balei ngi dei ban pyrshang katba lah ban wan sha kine ki jingïalang.

4. Ki jingïalang jong ki Nongsakhi U Jehobah

Naduh ba sdang ka niam Khristan, ki Khristan ki ju ïakynduh lang man la ka por ban ïamane ïa U Jehobah. (Rom 16:3-5) Pule Kolossai 3:16, bad nangta sa ïa peit lang ïa kane ka jingkylli harum:

Kumno ki Khristan banyngkong ki ïamane ïa U Jehobah?

Mynta, ki Nongsakhi U Jehobah ruh ki ju ïakynduh lang man la ka por ha ki jaka mane ba khot ki Ïing Hima. Ban tip ka jingïalang jong ki ka long kumno, peit ïa kane ka VIDEO. Hadien, peit ïa ka dur jong ka jingïalang bad nangta sa ïa peit lang ïa kine ki jingkylli harum.

VIDEO: Jia aïu ha ka Ïing Hima? (2:12)

Kiei ki jingïasyriem kiba phi ïohi hapdeng ka Ïing Hima bad kaei kaba la thoh ha Kolossai 3:16?
Phi ïohi aïu ha ka video ne ka dur, kaba phi itynnad shaphang ki jingïalang?

Pule 2 Korinth 9:7, bad nangta sa ïa peit lang ïa kane ka jingkylli harum:

Balei ki Nongsakhi U Jehobah kim ju lum jingkynshew ha ki jingïalang jong ki?

Peit lang bad i nonghikai Baibl jong phi ïa kaei kaba ngin sa ïa pule ha kawei na ki jingïalang mynta ka taiew.

Kano ka bynta jong ka jingïalang kaba phi sngew kan sngewtynnad tam ne kan myntoi ïa phi?

Hato phi tip?

Ha ka website jw.org, phi lah ban shem hangno bad lano la pynlong ïa ki jingïalang ha kylleng ka pyrthei.

Ki jingïalang ki kynthup ïa ki jingkren, ki video, bad ki jingai jinghikai shaphang kumno ban ïalap bad ban hikai ïa kiwei. Ki jingïalang ki sdang bad kut da ki jingrwai bad jingduwai
Don ki bynta ha ki jingïalang ha kaba mano mano ruh ki lah ban ai jubab
La pdiang sngewbha ïa baroh—ki longïing longsem, ki khynnah, ki samla, bad kiba la tymmen
Ki Nongsakhi U Jehobah kim ju lum jingkynshew ha ki jingïalang

5. Donkam ban ïaleh shitom ban wan sha ka jingïalang

Peit ïa ka nuksa jong ka longïing u Jisu. Man la u snem, ban leit sha ki jingïaseng heh, ki hap ban ïaid kumba lai sngi eiei lyngba ki lum bad ki them, na Nasaret sha Jerusalem. Pule Loukas 2:39-42, bad nangta sa ïa peit lang ïa kine ki jingkylli harum:

Hato phi tharai ki la donkam ban leh shitom ban poi sha Jerusalem?
Kiei ki jingeh kiba lah ban khanglad ïa phi ban wan sha ki jingïalang bad kumno pat phin leh ban ïoh wan sha kine ki jingïalang?
Hato phi tharai ka don jingmyntoi ban trei shitom kumne? Balei?

Ka Baibl ka ong ba ka jingïalumlang kumne ban mane ïa U Jehobah ka long kaba kongsan tam. Pule Hebru 10:24, 25, bad nangt sa ïa peit lang ïa kane ka jingkylli harum:

Balei ngi dei ban leit tista sha ki jingïalang?

DON KIBA ONG: “Phim donkam ban ïakynduh lang bad kiwei. Ka la biang tang ban shu ïa pule Baibl ha ïing.”

Ka dkhot ne ka nuksa aïu na ka Baibl phi lah ban pyndonkam ban pyni ïa kaei kaba U Jehobah u kwah?

KI MAT BAKONGSAN

Ka jingleit sha ki jingïalang kan ïarap ïa phi ban tip shuh shuh shaphang U Jehobah, ban pynkhlaiñ ïa ka jingïadei jong phi bad u, bad ban mane ïa u ryngkat bad kiwei.