Yac oasr pacl kom wi ke sie miting luhn Mwet Loh luhn Jeova uh? Fin soenna, sahp kom ahlohloh mweyen pacl se emeet kom in wi ke miting. Sahp kom nuhnkuh: ‘Meac orek ke miting se inge? Efuh kuh ma inge yohk srihpac? Efuh nga enenuh in wi kac?’ Ke mwe lutlut se inge, kom ac fah lotwelah lah fuhkah tuhkweni inge kuh in kahsruh in ahkfototoye kom nuh sin God ac kuh in kahsre kom ke moul lom sifacna.

1. Efuh kuh Mwet Loh luhn Jeova uh tuhkweni nuh sie?

Sie sin mwet sihm in Bible uh ahkkahlwemye srihpac yohk emeet in tuhkweni nuh sie wi mwet sahyac: ‘Nga ac fah kaksakihn kom [Jeova] ke pacl in tuhkweni uh.’ (Psalm 22:22) Oacpacna, Mwet Loh luhn Jeova uh puhla engan yohk ke elos tuhkweni nuh sie. Fin facluh nohfohn, elos tuhkweni nuh sie kais sie wik in kaksakihn God, in onkihn on, ac in puhruhe. Ac ke kais sie yac, elos oruh pac toeni luhlahp lalos.

2. Meac kom ac fah lotwelah ke miting lasr uh?

Ke pacl in miting, Kahs luhn God uh lutiyuck ac ‘ahkuhtweyucki tuh mwet uh in kuh in kahlwem kac.’ (Riti Nehemiah 8:8.) Ke miting lasr uh, kom ac fah lotwelah kacl Jeova ac ke ohiyac wowo pucspucs lal. Ke yohkwelihk etwacack lom ke luhpan luhngse lal nuh sum, kom ac fah fototoyang nuh sel. Kom ac fah lotwelah pac lah fuhkah el kuh in kahsre kom in oasr moul insewowo.​​—Isaiah 48:17, 18.

3. Mwet suc kom sramsram nuh se ke miting lasr uh kuh in kahsre kom fuhkah?

Jeova el sapkihn kuht in “nuhnkuh ke sie sin sie, ac akacsruhi in ahkkahlwemye luhngse lasr nuh sin sie sin sie ac in oruh ma wo . . . kuht in tiac fuhlweack tuhkweni lasr nuhke pacl in alu.” (Hebrew 10:24, 25) Ke miting lasr uh, kom ac fah ohsun nuh sin mwet suc luhngse na pwacye sie sin sie ac mwet suc oacna kom, suc luhngse in eis etwacack yohk ke God. Kom ac fah lohngohlos ke elos sramsramkihn kahs in ahkkweye ma tuhkuh in Bible. (Riti Rome 1:11, 12.) Kom ac fah etwaclah pac mwet sahyac, kewana mwet lolacp ac mwet pahyuck, suc insewowo finne oasr ma upac lalos. Pa inge kuhtuh sin srihpac lah efuh Jeova el luhngse kuht in tuhkweni nuh sie pacl nuhkewa!

AHKYOHKYE LUTLUT LOM

4. Miting luhn Mwet Loh luhn Jeova

In pacl luhn mwet sap ah, mwet Christian uh kwacna tuhkweni nuh sie in alu nuh sin Jeova. (Rome 16:3-5) Riti Colossae 3:16, ac tohkohyang sramsramkihn kihsen siyuck se inge:

• In pacl meet ah mwet Christian uh alu fuhkah nuh sin Jeova?

1. Ma weacng miting lasr uh pa sramsram, video, ac mwe ahkpah in fahkwack ac luti. Miting uh muhtwacwacack ac sahflah ke on ac puhruhe

2. Kuhtuh ip ke program, suliyuck mwet in walihl uh in wi sang top

3.   Mwet nuhkewa sukohsohk in wi​—sucu, mwet lolacp, mwet mahtuh, ac mwet fuhsr weacng tuhlihk

4. Wacngihn molin miting lasr uh. Mwet Loh luhn Jeova uh tiac eis molin utyak luhn mwet uh, kuh wacngihn pac aluh in mani ma ac pahsiyuck

5. Kwacfeacng uh enenweyuck in wi ke miting uh

• Efuh kuh kuht enenuh in wi nuhke miting pacl nuhkewa?

 MA KUHT LOTWELAH

Wi ke miting ac fah kahsre kom in eis etwacack yohk kacl Jeova, in ahkkweye fototo lom nuh sel, ac in alu nuh sel wi mwet sahyac.

Kalweni

• Efuh kuh Jeova el ahkkweye kuht in tuhkweni nuh sie?

• Meac kom ac fah lotwelah ke miting luhn Mwet Loh luhn Jeova?

• Kom nuhnkuh muh miting uh kuh in kahsre kom ke kuhtuh pac inkacnek sahyac?