LƐSIN 10

Aw Jiova Witnɛs dɛn Mitin dɛn Go Bɛnifit Yu?

PLE

Jiova Witnɛs dɛn dɔn ɛva invayt yu na dɛn mitin? If yu nɔ wande atɛnd dɛn mitin yet, sɔntɛm dat go mek yu wɔri smɔl. Sɔntɛm yu go de wɔnda: ‘Wetin kin apin na dɛn mitin dɛn ya? Wetin mek dɛn impɔtant? Wetin mek a fɔ atɛnd?’ Insay dis lɛsin, yu go lan aw we yu de atɛnd mitin wit ɔda pipul dɛn go mek yu kam nia Gɔd ɛn aw dat go ɛp yu.

1. Wetin na di men rizin we mek i impɔtant fɔ atɛnd mitin wit ɔda pipul dɛn?

Wan pan di man dɛn we rayt di Baybul bin tɔk bɔt wetin na di men rizin we mek wi fɔ atɛnd mitin wit ɔda pipul dɛn. I bin se: “A go prez PAPA GƆD [“Jiova,” NWT] usay bɔku pipul de.” (Sam 26:12) Semweso, Jiova Witnɛs dɛn kin rili gladi we dɛn de atɛnd mitin togɛda. Ɔlsay na di wɔl, dɛn kin gɛda ɛni wik fɔ prez Gɔd, fɔ siŋ, ɛn fɔ pre. Sɔm tɛm dɛn insay di ia, dɛn kin gɛda fɔ atɛnd big program dɛn fɔ wɔship Gɔd.

2. Wetin yu go lan na wi mitin dɛn?

Na di mitin dɛn, wi kin yuz Gɔd in Wɔd fɔ tich ɛn “ɛksplen di minin” klia wan. (Rid Nɛimaya 8:8.) We yu atɛnd wi mitin dɛn, yu go lan bɔt Jiova ɛn in wɔndaful kwaliti dɛn. As yu de lan mɔ bɔt aw i lɛk yu, dat go mek yu kam nia am mɔ. Yu go lan bak bɔt aw i go ɛp yu fɔ gɛt tru tru kolat.—Ayzaya 48:17, 18.

3. Aw yu go bɛnifit we yu tɔk to pipul dɛn na wi mitin dɛn?

Jiova tɛl wi fɔ “de tink bɔt wi kɔmpin dɛn so dat wi go ɛp dɛn fɔ sho lɔv ɛn du fayn tin dɛn, ɛn mek wi nɔ lɛf fɔ de mit togɛda.” (Ibruz 10:24, 25) Na wi mitin dɛn, yu go mit pipul dɛn we rili bisin bɔt ɔda pipul dɛn ɛn we want fɔ lan mɔ bɔt Gɔd jɔs lɛk yu. Yu go yɛri we dɛn de tɔk bɔt di fayn fayn tin dɛn we dɛn dɔn lan frɔm di Baybul. (Rid Romans 1:11, 12.) Yu go ebul fɔ tɔk bak to pipul dɛn we mared ɛn pipul dɛn we nɔ mared we gladi pan ɔl we sɔntɛm dɛn gɛt prɔblɛm dɛn. Dis na sɔm pan di rizin dɛn we mek Jiova want wi fɔ de atɛnd mitin ɔltɛm!

LAN MƆ

Lan mɔ bɔt wetin kin apin na Jiova Witnɛs dɛn mitin dɛn ɛn wetin mek wi fɔ tray tranga wan fɔ de atɛnd dɛn mitin dɛn de.

4. Jiova Witnɛs dɛn mitin dɛn

Trade trade, Kristian dɛn bin de mit togɛda ɔltɛm fɔ wɔship Jiova. (Romans 16:3-5) Rid Koloshians 3:16, dɔn una tɔk bɔt dis kwɛstyɔn:

Aw di fɔstɛm Kristian dɛn bin de wɔship Jiova?

Insay wi yon tɛm, Jiova Witnɛs dɛn bak kin mit togɛda na Kiŋdɔm Ɔl dɛn fɔ wɔship Gɔd. Fɔ si wetin de apin na dɛn mitin dɛn, ple di VIDIO. Dɔn una luk di pikchɔ we de sho di mitin ɛn tɔk bɔt di kwɛstyɔn dɛn we de dɔŋ.

VIDIO: Wetin Kin Apin na Kiŋdɔm Ɔl? (2:12)

Wetin yu notis se de apin na Kiŋdɔm Ɔl we yu go kɔmpia to Kolosians 3:16?
Yu notis ɛni ɔda tin na di fim ɔ pikchɔ bɔt di mitin dɛn we yu lɛk?

Rid 2 Kɔrintians 9:7, dɔn una tɔk bɔt dis kwɛstyɔn:

Wetin mek Jiova Witnɛs dɛn nɔ de aks fɔ kɔlɛkshɔn na dɛn mitin dɛn?

Luk wetin dɛn gɛt fɔ tɔk bɔt na wan pan di mitin dɛn insay dis wik wit yu Baybul ticha.

Us pat na di mitin we yu rili lɛk ɔ we go bɛnifit yu?

Yu bin no?

Na jw.org, yu go fɛn usay ɛn ustɛm wi kin gɛt wi mitin dɛn ɔlsay na di wɔl.

Wi mitin dɛn kin gɛt tɔk dɛn, fim dɛn, ɛn wi kin lan aw fɔ prich ɛn tich. Di mitin dɛn kin bigin ɛn ɛnd wit siŋ ɛn prea
Insay di mitin, sɔm pat dɛn de we dɛn kin aks di ɔdiɛns fɔ gi kɔmɛnt
Ɔlman wɛlkɔm—famili dɛn, di wan dɛn we nɔ mared, di wan dɛn we dɔn ol, ɛn ivin pikin dɛn
Wi mitin dɛn na fri. Jiova Witnɛs dɛn nɔ de aks fɔ kɔlɛkshɔn

5. Yu nid fɔ tray tranga wan fɔ atɛnd di mitin dɛn

Jizɔs in famili bin sɛt fayn ɛgzampul. Fɔ atɛnd di program we dɛn bin de gɛt ɛni ia, dɛn bin nid fɔ waka fɔ lɛk tri dez na ples dɛn we gɛt il frɔm Nazarɛt to Jerusɛlɛm. Rid Lyuk 2:39-42, dɔn una tɔk bɔt dɛn kwɛstyɔn dɛn ya:

Yu tink se dɛn bin nid fɔ tray tranga wan fɔ travul go na Jerusɛlɛm?
Wetin mek yu tink se yu fɔ tray tranga wan fɔ atɛnd di mitin dɛn?
Yu tink se i gud fɔ yu fɔ atɛnd di mitin dɛn pan ɔl we i nɔ izi? Wetin mek yu tink so?