Ni ro ká ndrŭ nzirie b’lo Yova dzá Dimu dhó njudha dho? Rie nzá ni ro d’erie si ri ró, ni ka ni é do na ya kwanza ni ro si nari dho. Ni ka ni dhuri ni tso: ‘Fø njudha dhi ngana ká ngbá lo adi da? Fø njudha ká kʉ mana na bbo addudho? Madho ká ringani ma si fø ga addudho?’ I somo nǎ, ni si lochu ngbaribbai ma ddinga ni njuni nja ndrŭ na nari ka ndi liri ni é Mungu dzá kau ndirigoti ngbaribbai ma ri ka ndi kó ni tsotso nari djo.

1. Yova dzá Dimu ká adi njuni ddi ngana addudho?

Anja Biblia ndingʉe ná ddikpa ke pongʉe addudho ma ri kʉ bblo le njuni nja ndrŭ na nari: “Bbo njudha dhi ngana, ma si madha bbʉ Yova dho.” (Zaburi 26:12) Føri bbai Yova dzá Dimu e hwè na ddi ngana ndima njuni nari dho. Dz’ djolu gble krʉ yenga ddo ró, kpa adi njuni ndima má Mungu, ndima ngo dyi ndirigoti ndima nji sala. Krʉ cho ró, kpa adi ndima tso nju bbobbo njudha dho maddi.

2. Kodhó njudha dhi ngana ká ni si ngbá lochu?

Kodhó njudha dhi ngana le adi Biblia nǎ loddi, le adi “ri nanga tu pʉlʉpʉlʉ ndirigoti nì nanga rrni nari bbai.” (Azø Nehemia 8:8.) Føga ni si nari na, ni si lochu Yova djo bbo ndirigoti kedhó bblo kʉ ná sifa djo maddi. Ni di lochu bbo kedhó jidha djo ró, ni si ngʉ kedzá kpakpa kau. Ni si ngbaribbai ma ke ka ndi kó ni tsotso nari chu ndiro nidhó maisha é bblo d’e.​—Isaya 48:17, 18.

3. Nja ndrŭ na ni njuni nari ká ka ndi kó ni tsotso ngbaribbai?

Yova rinzi ko tso “ko ddinga ko djo ko kana, ndiri cho ko ronga jidha kana bblo njí njidha dho d’e, nzá ko bba ddi ngana ko njuni nari tso ro.” (Waebrania 10:24, 25) Kodhó njudha dhi ngana ni si ngbà jini ndima kana ná ndrŭ ro, ndirigoti ngbà jiri ndima chulo bbo Mungu djo ná ndrŭ ro. Ni si Biblia nǎ kpakpa ka ndi li le ná lo kpa ti nari ma rr ddi. (Azø Waroma 1:11, 12.) Ni si nja ndrŭ ma chu ddi, fø ndrŭ kana sie nzá d’e ndoa chi ná ndrŭ ma, dza dhi ndrŭ ma, hwè na dhé ndima kʉ ro njati rie kpakpalo kana ma kpa kʉ ri ró. Føri dzá lo dho Yova jiri ko di si njudha dhi ngana krʉ ddo ró!

 ANE LONANGA BBO

4. Yova dzá Dimu dhó njudha

Mitume dhó saa na, Wakristo ngʉ adi njuni krʉ ddo ró ddi ngana ndiro ndima má Yova d’e. (Waroma 16:3-5) Azø Wakolosai 3:16, ndirigoti anitilo i ngadhudha djo:

• Anziro ngʉe ná Wakristo ká ngʉ Yova má ngbaribbai?

1. Kodhó njudha dhi ngana le adi hotuba ma bbʉ, le adi onyesho ma nji, ndirigoti le adi video ma nja. Njudha tso adi ngani ndirigoti ri tso adi dyani dyi na ndirigoti sala na

2. Nja saa na, le adi rinzi programu rr ná ndrŭ ma bbʉ jibu ddi

3.   Krʉ kʉ ná ndrŭ ka ndima sisi njudha dhi ngana, føri kʉ dza dhi ndrŭ ma, nzá d’e ndoa chi ná ndrŭ ma, ngó ngʉ ná ndrŭ ma, ndirigoti nzø ma na

4. Kodhó njudha dhi ngana le adi tsu pa. Yova dzá Dimu dhó njudha dhi ngana le nzɨ adi da sadaka dhi no na ndrŭ kalu ri

5. Njudha dhi ngana ni si nari dho, ringani ni njí kpakpanga

• Ri ká ngani ko di si njudha dhi ngana krʉ ddo ró addudho?

 LO DZÁ DɄNGA

Njudha dhi ngana ni si nari si ni tsotso ko ni chulo bbo Yova djo, ni é kedzá kpakpa kau ndirigoti ni bbʉ madha ke dho nja ndrŭ ma na.

Lo djolu le ngʉ nari

• Yova ká ko li kpakpa ko njuni ddi ngana addudho?

• Yova dzá Dimu dhó njudha dhi ngana ká ni si ngbá lo chu?

• Ni ká riddi njudha dhi ngana ni si nari ka ndi kó ni tsotso nja chu nǎ maddi?