KALABO 10

Jehova Na Seeleitiɛ Ta Ɣaalɛ-Baitiɛ Ta Ɓɔ E Va Ɣɛ Le?

TƐ GÁ

E lia dɛ Jehova Na Seeleitiɛ ta ɣaalɛ-bai ta zu? Ani ɛ lɛ dɛ liini gaalɛ-bai nii ta zu, ɣeeta ya ɣɛ luozu ya ʋolo maa wũgi ya liila na. ‘Ɣeeta ya ɣɛ ɣi-gaa-ziɛzu ga: Zɛɓɛi ya ɣɛ gaalɛ-bai niitiɛ zu? Zɛɓɛi e kɛɛ te ga faa ɓi? Zɛɓɛi e kɛɛ manɛɛ gè li na?’ Kalabogi nii zu, ya vaazu faa lamaa wɛ̃ɛsu e vile velei gaalɛ-bai niitiɛ ta ɓɔ la e va e lɔtɔ Gala ba. Na ɣa ɣɛɛna velei wɔnɔ ta ɓɔ la e va ya ŋeteai zu.

1. Zɛɓɛi e kɛɛ Jehova Na Seeleitiɛ ta ɣaalɛ-ba?

Wɛlɛ velei Gala Kɔlɔ wonɛ nui nii zaɓui lɛɛni la e kɛɛ manɛɛ diɛ ɣaalɛ-ba: “Gà Jehova laa-maa-lɛ kuuwu walai zu.” (Psalms 26:12) Vele ɣana Jehova Na Seeleitiɛ te la. Te wuuzu ɣa nɛɛ ga ʋikee ga te ɣaalɛ-ba. Zui wɔlɔ-kɔlɔ ma, ta ɣaalɛ-ba dɔwɔ nɛpɛ ga te Gala daa-maa-lɛ, te gui loo, na ɣa ɣɛɛna te Gala feli. Kwena nɛpɛ ta gaalɛ-ba walanigaa ɣɛ ga te Gala daa-maa-lɛ.

2. Ya vaana ga ɣaalɛ-bai zu, zɛɓɛi e vaazu maa wolizu?

Ga ɣaalɛ-baitiɛ zu, ga faa lamaa maa woli Gala Kɔlɔi zu, “ta su wulo ɓɔɔ ga pagɔ na ɣa ɣɛɛna tiɛ su ʋai ɣaa wodo.” (Nehemiah 8:8 lodo.) Ya vaana ga ɣaalɛ-bai zu, ya faa lamaa maa woli e vile Jehova va e vɛɛ na tuɓo-veleitiɛ va. Ya faa lamaa maa woli na e vile velei wõila la Jehova ya e ʋaa ma, towa ɓɔ e va e lɔtɔ ba. Ya vaazu kwɛ̃ɛsu wɔnɔ velei towa ɓɔ la e va e kuuzu nɛɛ ɓɔɔɓɔɔ sɔlɔwo ya ŋeteai zu.—Isaiah 48:17, 18.

3. Taitiɛ ta va gaalɛ-bai niitiɛ zu ta ɓɔ e va ɣɛ le?

Jehova bogɛ de ma ga “de ɣi gaa ziɛ ga velei da ɣiini zii wu ziɣi la ga wõila ɣɛ de ya diɛ tii vagɔ ɣɛ, a de mɛ lɛ ɓe wũi faa va ŋada ɣila.” (Hiiɓuluitiɛ 10:24, 25) Gaalɛ-bai niitiɛ zu, ya vaazu wɛlɛzu numaa va wõila ɓɔɔɓɔɔ ge te ya ɣiini faa ma. Ya vaazu wɛlɛzu te va ta ɓalaa tiɛ ɣaa-ɓaa ga te faa maa woli e vile Gala ba e ɣɛ velei e kɛɛzu la. Ya vaazu wɛlɛzu te va tiɛ yɛpɛ e vile faa vapagaa va kuloai Gala Kɔlɔi zu. (Loomɛitiɛ 1:11, 12 lodo.) Ya vaazu yɛpɛzu numaa wɔ kuuzu nɛɛ te ya, velei ɓalaa te levesu la faa ɓaasu. Zaɓui taniga ɣa te dɛɛ ga Jehova wõini diɛ ɣaalɛ-ba siɛ nɛpɛ ma!

FAA LAMAA MAA WOLI

Faa maa woli e vile velei va Jehova Na Seeleitiɛ ta ɣaalɛ-bai ɣa ɣɛɛ la. Wɛlɛ nii va e kɛɛ manɛɛ e ɣaa-ɓaa yiɛ li gaalɛ-bai niitiɛ su.

4. Jehova Na Seeleitiɛ ta ɣaalɛ-baitiɛ

Wɔlɔ-wɔlɔi zu, Kolai Maa Veaitiɛ tɔ ɣaalɛ-ba siɛ nɛpɛ ma ga te Jehova ʋeli. (Loomɛitiɛ 16:3-5) A Kolasaitiɛ 3:16 lodo, wo gaa-zaɣa-kɛɛ nii ɣaa wote:

Kolai Maa Veaitiɛ tɔ Jehova ʋeli ɣɛ le ta ɣaalɛ-baitiɛ zu?

Zaa Jehova Na Seeleitiɛ ta ɣaalɛ-ba ta Ɣala feli vɛlɛitiɛ la siɛ nɛpɛ ma. Ga e kwɛ̃ɛ velei ta gaalɛ-baitiɛ ɣɛɛ la, ƲILIOGI nii lɛ ga. Wɛlɛ gaalɛ-ba ʋootei nii va, wo gaa-zaɣa-kɛɛ niitiɛ ɣaa wote.

ƲILIOGI: Zɛɓɛi Ga Kɛ Kĩidɔ̃ Hɔɔgi La? (2:12)

Nii Kolasaitiɛ 3:16 boga, ta nii ga kɛ Kĩidɔ̃ Hɔɔgi la, ta ga faa gila ɣɛ le?
Ʋiliogi nii ɔɔ footei nii e wɛlɛɛ ba, e wɛlɛvɛ faa ta ɓalaa ba e wõini la e vile ga ɣaalɛ-baitiɛ va?

A 2 Kɔlĩitiɛ 9:7 lodo, wo gaa-zaɣa-kɛɛ nii ɣaa wote:

Zɛɓɛi e kɛɛ Jehova Na Seeleitiɛ tɛ lɛ naʋolo wuloa numaa ya ta ɣaalɛ-baitiɛ zu?

Wa nui e e ɣalabosu a wɛlɛ nii va te vaazu yɛpɛzu e vile ba dɔwɔi nii ma ɣaalɛ-bai ta zu.

Velei gaalɛ-bai nii ɣaa wɛɛ la su, ma zɛɓɛ ɣa ɓɔɔ ya wulo su-nu-ma?

E ɣɛni nii wõni?

Ya liina jw.org ma, ya zoo e ŋadavɛtiɛ wɛ̃ɛ ta siɛgi ta gaalɛ-baitiɛ ɣɛ ma zui wɔlɔ-kɔlɔ ma.

Gaalɛ-baitiɛ zu ga wuito zɛpɛ taniga ma, ge wɛlɛ po-kɔ̃ɔ-ma taniga va e vɛɛ ʋilio taniga va. Gá gaalɛ-bai lɔɔ-zei ge da wulo ga gui ɓɔga Gala-feliai
Siɛgi ta ɣa ziiti na ta gaa-zaɣa-kɛɛ vili ga numaa te gaa wote
Nu ɓɔgapɛ ka va gaalɛ-bai nii zu—ŋazaa, zinaa, lopaitiɛ, nu niinɛitiɛ e vɛɛ sa nu wɔlɔ-zaɣagitiɛ va
Naʋolo ʋaa lɛ ga ɣaalɛ-baitiɛ va. Jehova Na Seeleitiɛ tɛ lɛ naʋolo wuloa numaa ya ta ɣaalɛ-baitiɛ zu, ɔɔ nɔ ɣɛ ga te ŋɛni leve ga numaa te naʋolo loo-su

5. Manɛɛ de ɣaa-ɓaa ani de wõini diɛ li gaalɛ-bai niitiɛ zu

Wɛlɛ po-kɔ̃ɔ-mai nii va pilegɛi Ziizɛ na kaalai va. Ga te ɣɛ gaalɛ-ba niitiɛ zu, tɔ folo saagɔ ziɛ wo, tɔwɔ gizigi lamagɛi e ɣɛni pelei nii ma e ziɣi Nazɔi e li Yɛlusulɛɛ. A Luki 2:39-42 lodo, wo gaa-zaɣa-kɛɛ niitiɛ ɣaa wote:

E ɣisu siɛi tɔ bo ga te li Yɛlusulɛɛ e ɣɛni ga soloya ʋaa?
Zɛɓɛi e kɛɛ manɛɛ e ɣaa-ɓaa yiɛ li gaalɛ-baitiɛ zu?
E ɣisu maa nɛɛvɛ e ɣaa-ɓaa yiɛ li gaalɛ-baitiɛ zu ani ɓalaa na ɓaavɛ? Zɛɓɛ e kɛɛ yiɛ na wo?

Gala Kɔlɔi dɛɛvɛ ga tɔ ga faa ɓi ga diɛ ɣaalɛ-ba, diɛ Jehova laa-maa-lɛ. A Hiiɓuluitiɛ 10:24, 25 lodo, wo gaa-zaɣa-kɛɛ nii ɣaa wote:

Zɛɓɛi e kɛɛ manɛɛ de ɣaa-ɓaa diɛ li gaalɛ-baitiɛ zu?

NUMAA TANIGA TE ƔƐ: “Ɛ lɛ ga faa ɓi ga de ɣaalɛ-ba ŋada gila, maa nɛɛvɛ nɔ diɛ Gala Kɔlɔi lodo da vɛlɛitiɛ la.”

Po-kɔ̃ɔ-ma sɛɓɛi e Gala Kɔlɔi zu, e dɛɛzu ga nii Jehova wõini ga de kɛ?

NII SA È MAA WOLIA

Yana liizu gaalɛ-baitiɛ zu towa ɓɔ e va e faa lamaa maa woli e vile Jehova va. Towa ya ziɛ-pului zu-ɓaa wo yɔɔzu wa Jehova. Ya zoo wɔnɔ e vɛɛ feli veaitiɛ va wiɛ feli kii-ma.