KIFUNDWA 10
Mwena mu Kupwila kwa Batumoni ba Yehova
Le kodi mutanwe ku kupwila kwa Batumoni ba Yehova? Shi kwatenwe’ko, padi kutanwa’ko musunsa umbajinji kukuletelanga moyo. Pakwabo wiipangulanga’mba: ‘Le i bika biloñwanga ku kuno kupwila? Mwanda waka kudi na mvubu? Mwanda waka ñende’ko?’ Mu kino kifundwa, tusa kumona kuno kupwila muswelo okubwanya kukufwenya pabwipi na Leza ne kukukwasha abe mwine mu būmi.
1. I bubinga’ka bukatampe bulengeja tupwidile pamo?
Tala bubinga bumo bukatampe bwānenene mulembi umo wa Bible bwa kupwidila pamo na bakwabo amba: “Nkatumbijanga Yehova mu kipwilo kikatampe.” (Ñimbo ya Mitōto 26:12) Mo monka ne Batumoni ba Yehova nabo basangelanga kupwidila pamo na bakwabo. Ntanda yonso, bapwilanga yenga ne yenga mwanda wa kutumbija Leza, kwimba ñimbo, ne kulombela. Kadi kitatyi kityetye mwaka ne mwaka, baloñanga bitango bikatampe mwanda wa kutōta.
2. I bika byokefunda ku kupwila kwetu?
Ku kuno kupwila, tutanga mutyima pa Kinenwa kya Leza, ‘twikishintululanga biyampe ne kulombola buluji bwakyo.’ (Tangai Nehemia 8:8.) Shi utanwe’ko, ukefunda myanda ya Yehova ne ngikadila yandi ya kutendelwa. Kadi shi ubayukidija muswelo wakusenswe, ukamufwena. Kadi ukayuka ne muswelo wabwanya kukukwasha wikale na būmi bwa nsangaji.—Isaya 48:17, 18.
3. I muswelo’ka okamwena mu kwibunga pamo na bakwabo ku kupwila kwetu?
Yehova witusoñanya’mba: “Twitei mityima batwe bene na bene mwanda wa kwikankamikila ku buswe ne ku mingilo milumbuluke, ne kuleka’byo kwibungila pamo kwetu mpika.” (Bahebelu 10:24, 25) Ku kupwila kwetu, ukatana’ko bantu betele mutyima binebine, kadi bakimba kwifunda bivule padi Leza monka mosakila’byo ne abe. Ukebevwana besamba myanda ya mu Bible ikankamika. (Tangai Bene Loma 1:11, 12.) Ku kupwila’kwa, ukesamba na bantu babwenye kunekenya makambakano a mu bukunga ne a mu busongi atana bantu. Buno i bubinga’tu bumo butyetye bwitusakila Yehova tupwidile pamo kitatyi ne kitatyi!
LANGULUKA BININGE
Jingulula uyuke mwikadile kupwila kwa Batumoni ba Yehova ne mwanda wa bika tufwaninwe kulonga bukomo bwa kutanwa ku kuno kupwila.
4. Kupwila kwa Batumoni ba Yehova
Mu myaka katwa kabajinji, bene Kidishitu bādi bebunga pamo kyaba ne kyaba mwanda wa kutōta Yehova. (Bene Loma 16:3-5) Tangai Bene Kolose 3:16, ne kwisambila pa kino kipangujo:
-
Le bene Kidishitu babajinji bādi batōta Yehova namani?
Dyalelo, Batumoni nabo bebungilanga pa bifuko byabo bya kutōtela’po kitatyi ne kitatyi. Pa kumona mobapwidilanga, talai VIDEO. Kupwa, talai kifwatulo kilombola mobapwidila ne kwisambila pa bino bipangujo:
-
Byobya biloñwanga ku Njibo ya Bulopwe ne bino byowatanga mu Bene Kolose 3:16 i biifwane paka?
-
Le kudi kintu kikwabo kikusangaja kyowamonanga mu video nansha pa kifwatulo?
Tangai 2 Bene Kodinda 9:7, ne kwisambila pa kino kipangujo:
-
Mwanda waka ku kupwila kwa Batumoni ba Yehova ke kulombwangapo lupeto?
Mwisambilei pa bipindi bimo bisa kupita ku kupwila kwa uno yenga pamo na yewa ukufundija.
-
Le i kipindi’ka kya ku kupwila kyowamona na mvubu bininge kodi nansha kyakusangaja?
Le wadi uyukile?
Pa jw.org, ukatana’po bifuko ne bitatyi bya kupwila bya ntanda yonso.
-
Ku kupwila kwetu kudi mīsambo, bya kumwena’ko, ne mavideo. Kupwila konso kushilulanga ne kufula na lwimbo ne milombelo
-
Kudi bipindi bimo bya ku mpangiko bibwanya kulondolola’ko muntu ense
-
Ku kupwila kwetu tutundailanga’ko bantu bonso, bisaka, bankunga, banunu, ne bana
-
Ku kupwila kwetu kekulombwangapo lupeto. Batumoni ba Yehova kebalombangapo boba bapwila bafute nansha kupityija nsāni wa kulomba mulambu, mhm
5. Bilomba kwielela’ko pa kutanwa ku kupwila
Tala kisaka kyādi’mo Yesu. Pa kukatanwa mwaka ne mwaka ku kitango, bādi benda lwanshi kintu kya makilometele 100, bapita mu ngulu kutamba ku Nazala kufika ku Yelusalema. Tangai Luka 2:39-42, ne kwisambila pa bino bipangujo:
-
Le ulanga lwendo lwa ku Yelusalema lwādi lulomba kwielela’ko?
-
Mwanda waka bikulomba nobe kwielela’ko pa kutanwa ku kupwila?
-
Ulanga bidi na mvubu? Mwanda waka?
Bible unena’mba kupwidila pamo mwanda wa kutōta kudi na mvubu bininge. Tangai Bahebelu 10:24, 25, ne kwisambila pa kino kipangujo:
-
Mwanda waka tufwaninwe kupwila kyaba ne kyaba?
BANTU BAMO BANENANGA’MBA: “Kebidipo na mvubu kukapwila, kya mvubu i kwifunda’tu Bible kobe ku njibo, kubapu.”
-
Le i kisonekwa’ka nansha i kimfwa’ka kya mu Bible kilombola byobya bisaka Yehova pa uno mwanda?
MU KĪPI
Kupwila kukakukwasha wifunde myanda mivule padi Yehova, ukomeje bulunda bobe nandi, kadi umutōte pamo na bantu bakwabo.
Pitulukai’mo
-
Mwanda waka Yehova witukankamika tupwile?
-
I bika byokefunda ku kupwila kwa Batumoni ba Yehova?
-
Mungya abe, i kamweno’ka kakwabo kobwanya kumwena mu kupwidila pamo?
KIMBA
Le ukalonga namani shi wivwana moyo wa kukapwila? Tala muntu umo wadi wivwana moyo, ino ku mfulo wasanswa kupwila.
Tala nsongwalume umo mwaasanshidilwe kupwila ne byaalongele pa mwanda wa kwendelela na kupwila.
Tala muswelo umonanga bantu bakwabo kupwila.
“Mwanda Waka Tukapwile ku Njibo ya Bulopwe?” (Kishinte kya pa Entelenete)
Tala mwashintyile būmi bwa kipolapola umo pa kupwa kutanwa ku kupwila kwa Batumoni ba Yehova.
“Nkyadipo Ñenda Pantu Kwakubulwa Buta Bwami” (Kiteba kya Mulami, 1 Kweji 7, 2014)
Tala'po Bidi ne Bino:
BIPANGUJO BIPANGULWANGA DIVULE
Le Kifundwa kya Bible Kīfundanga Batumoni ba Yehova na Bantu I Bika?
Mu mpangiko ya kwifunda Bible ku bitupu na Batumoni ba Yehova, ubwanya kwingidija’mo bwalamuni bo-bonso bwa Bible. Ita kisaka kyobe kyonso nansha balunda nobe batanwe’po.
