DILONGESHA DIA 10
Mudi bisangilu bia Bantemu ba Yehowa mua kukuambuluisha
Bakadiku bakubikile mu bisangilu bia Bantemu ba Yehowa anyi? Wewe kuyi muanji kubuelamu, udi mufuane kumvua kabuôwa bua kubuelamu bua musangu wa kumpala. Udi mua kutuadija kudiebeja ne: ‘Ntshinyi tshitu tshienzeka mu bisangilu abi? Bisangilu abi bidi ne mushinga kayi? Bua tshinyi mbimpe ngikale mbuelamu?’ Mu dilongesha edi neumone mudi kudisangisha ne Bantemu ba Yehowa mua kukusemeja pabuipi ne Nzambi, ne mudiku mua kukuambuluisha.
1. Mbualu kayi bua mushinga mukole butu butusaka bua kudisangisha?
Mufundi kampanda wa Bible uvua muleje bualu bua mushinga mukole bua kudisangishila ne bakuabu pakambaye ne: “Mu tshisumbu tshinene tshia bantu, meme nentumbishe Yehowa.” (Misambu 26:12) Bia muomumue, Bantemu ba Yehowa batu ne disanka dia bungi patubu badisangisha. Pa buloba bujima batu badisangisha lumingu luonso bua kutumbisha Nzambi, kuimba misambu, ne kusambila kabidi. Misangu mikese ku tshidimu, batu benza masangisha manene bua kutendelela.
2. Mmalu kayi awalonga mu bisangilu?
Mu bisangilu batu batamba kuimanyina pa Dîyi dia Nzambi, ‘badiumvuija bimpe menemene ne badijinguluila bantu.’ (Balayi Nehemiya 8:8.) Mu bisangilu, neumanye malu adi atangila Yehowa ne bikadilu biende bilenga. Pawikala wenda umanya ne: mmukunange, neubange kusemena kabidi pabuipi nende bikole. Neumanye kabidi mudiye mua kukuambuluisha bua kuikala ne nsombelu wa nsongo.—Yeshaya 48:17, 18.
3. Kubuela ne bakuabu mu bisangilu bietu kudi mua kukuambuluisha mushindu kayi?
Yehowa udi utuambila bua ‘kuelelangana kabidi meji bua kusakangana ku dinanga ne ku bienzedi bimpe, katuyi tulekela kudisangisha kuetu pamue to.’ (Ebelu 10:24, 25) Mu bisangilu bietu neutuilangane ne bantu badi bushuwa batabalelangana, ne badi basue kumanya malu a bungi adi atangila Nzambi anu bu wewe. Neumvue mudibu bakankamijangana ne ngenyi mimpe ya mu Bible. (Balayi Lomo 1:11, 12.) Neuyukile kabidi ne bantu bakadi basele ne batshidi bajike badi bafike ku ditshimuna ntatu yabu. Aa ngamue a ku malu adi Yehowa utulombela bua tuikale tudisangisha pa tshibidilu.
BUELA MU BUONDOKE
Mona tshitu tshienzeka mu bisangilu bia Bantemu ba Yehowa ne bua tshinyi mbimpe kudienzeja bua kubuelamu.
4. Bisangilu bia Bantemu ba Yehowa
Mu bidimu lukama bia kumpala, bena Kristo bavua badisangisha pa tshibidilu bua kutendelela Yehowa. (Lomo 16:3-5) Balayi Kolosayi 3:16, pashishe nuandamune lukonko elu:
-
Bena Kristo ba mu bidimu lukama bia kumpala bavua batendelela Yehowa mushindu kayi?
Lelu, Bantemu ba Yehowa batu pabu badisangishila pa tshibidilu mu miaba yabu ya kutendelela. Bua kumona mutu bisangilu biabu bienzeka, tangilayi FILME. Tangilayi kabidi tshimfuanyi tshidi tshileja bana betu mu bisangilu, ne nuandamune nkonko idi ilonda eyi:
-
Ndipetangana kayi diudi mumone pankatshi pa tshitu tshienzeka ku Nzubu wa Bukalenge ne malu audi mubale mu Kolosayi 3:16?
-
Mu filme utudi tufuma ku dimona eu anyi mu tshimfuanyi atshi, ntshinyi tshiudiku pebe mumone mu bisangilu bietu ebi tshidi tshikusankisha?
Balayi 2 Kolinto 9:7, pashishe nuandamune lukonko elu:
-
Bua tshinyi kabatu bafutshishangana makuta mu bisangilu bia Bantemu ba Yehowa?
Wewe ne mulongeshi webe, konkononayi malu atualonga mu bisangilu bia lumingu elu.
-
Ntshitupa kayi tshia malongesha a mu bisangilu tshikala mua kukusankisha anyi kukuambuluisha bikole?
Udi mumanye anyi?
Mu site wa jw.org, mudi mêba ne miaba yonso idibu benza bisangilu pa buloba bujima.
-
Mu bisangilu bietu batu benza miyuki, manaya a bilejilu, balejamu kabidi filme. Bitu bituadija ne musambu ne disambila, bijika kabidi ne musambu ne disambila
-
Misangu mikuabu batu balomba bantu bua kuandamuna
-
Bonso badi babuelamu: bena mêku, bajike, bakulakaje, ne bana
-
Bisangilu bietu ki mbia kufutshisha to. Bantemu ba Yehowa kabena balomba makuta bua kubuelamu anyi bendesha tshibondo bua kusangamu makuta to
5. Bidi bikengela kudienzeja bua kubuela mu bisangilu
Tuangate tshilejilu tshia dîku dia ba Yezu. Bavua benza luendu lua matuku ndambu bapitshila mu mikuna, kumbukila ku Nazaleta too ne ku Yelushalema, bua kubuela mu tshibilu tshia ku tshidimu. Balayi Luka 2:39-42, pashishe nuandamune nkonko eyi:
-
Udi wela meji kayi: Luendu lua ku Yelushalema elu luvua lupepele anyi?
-
Bua tshinyi bidi mua kukulomba bua kudienzeja pebe bua kubuela mu bisangilu?
-
Udi wela meji kayi: Kudienzeja nanku kudi ne mushinga anyi? Bua tshinyi?
Bible udi uleja ne: kudisangisha pamue bua kutendelela kudi ne mushinga wa bungi. Balayi Ebelu 10:24, 25, pashishe nuandamune lukonko elu:
-
Bua tshinyi mbimpe tuikale tubuela mu bisangilu pa tshibidilu?
BAMUE BATU BAMBA NE: “Kabiena anu bilomba kudisangisha ne bakuabu to. Kulongela Bible kumbelu nkukumbane.”
-
Mmvese kayi anyi ntshilejilu kayi tshia mu Bible tshidi tshileja mudi Yehowa yeye musue?
TSHIA KUKUATA
Kubuela mu bisangilu nekukumanyishishe malu a bungi a Yehowa, nekukoleshe bulunda buenu nende, nekukuambuluishe bua kumutendelela pamue ne bakuabu.
Diambulula
-
Bua tshinyi Yehowa udi utukankamija bua kudisangisha pamue?
-
Ntshinyi tshiwalonga mu bisangilu bia Bantemu ba Yehowa?
-
Kubuela mu bisangilu kudi mua kukuambuluisha kabidi mushindu kayi mukuabu?
BIA KUTANGILA KABIDI
Ntshinyi tshiudi mua kuenza wewe umvua kabuôwa bua kubuela mu bisangilu? Mona muvua muntu mukuabu uvua mumvue pende nanku mulue kunanga bisangilu.
Mona muvua nsonga kampanda muanyishe bisangilu ne tshivuaye muenze bua kutungunuka ne kubuelamu.
Mona mutu bantu bakuabu bumvua bua dibuela mu bisangilu.
“Bua tshinyi mbimpe kubuela mu bisangilu ku Nzubu wa Bukalenge?” (Tshiena-bualu tshia mu jw.org)
Mona muvua bisangilu bia Bantemu ba Yehowa biambuluishe ntomboji kampanda bua kushintuluka.
“Tshitu muanji kuya pa muaba tshiyi ne katshingoma kanyi” (Tshibumba tshia Nsentedi tshia 1/7/2014)
Mona bikuabu:
NKONKO ITU BANTU BATAMBA KUELA
Programe wa dilongeshangana Bible wa Bantemu ba Yehowa ntshinyi?
Programe wa nuenda nuyukila wa kuyi ufuta wa Bantemu ba Yehowa eu udi mua kumulonga ne nkudimuinu kayi yonso wa Bible uudi nende. Bikila nansha dîku dienu dijima anyi balunda bebe bonso baudi musue bua nuikale nulonga nabu tshiapamue.
