XØRꞸ 10
¿Pjekja na joo ri maa nu ja jmurꞹji yo testigo e Jehová?
¿A mbitatsʼꞹji na paa ri jmurꞹ ko yo testigo e Jehová? Ma ni ri dʼa paa a bi maa, bʼꞹma gi su̱u̱ ri maa. Bʼꞹma gi øntsjɇ: “¿Pje kjaji yo Testigo e Jehová nu ja jmurꞹji? ¿Pjenga dya jɇziji ra jmurꞹji? ¿Ni jyodʼꞹ xo ra magø?”. Kja ne xørꞹ ri pjechi ke ma ri maa nu ja jmurꞹji yo testigo e Jehová mazi ri chɇzhi ko e Mizhokjimi ñe ra mbøxkʼꞹ ri mimi na joo.
1. ¿Pjenga ra jmurꞹji?
Na kʼꞹ go dyopjꞹ ne Biblia o mama pjenga na joo ra jmurꞹji: “Nu ja jmurꞹji na punkjꞹ ntee ra matrʼkʼꞹ Jehová” (Salmo 26:12). Yo padya, yo testigo e Jehová xo jmurꞹji, nuyo kjaa ke me ra to̱jiaji. Kja texe ne xoñijomꞹ, ngoma ngoma jmurꞹji ngekʼua ra matrʼꞹji Mizhokjimi, to̱mpꞹji ñe kjaji oración. Ñe janzi paa kja nu kjɇɇ xo jmurꞹji me na punkjꞹji.
2. ¿Pje søø ri pjechi ma ri maa nu ja ri jmurgøjme?
Nu ja ri jmurgøjme jizhiji yo mama ne Biblia, ñe manji pje nee ra mama (xørꞹ Nehemías 8:8). Ma ri mage xe ri pjechi kjo ngeje e Jehová ñe ja ga kjaa angeze. Ma ri unꞹ nguenda ke me sʼiyatsʼꞹ, me ri nee ri jobi ko angeze. Xo ri pjechi ja rga mbøxkʼꞹ ngekʼua me ri mⱥjⱥ rgi mimi (Isaías 48:17, 18).
3. ¿Ja rga mbøxkʼꞹ kʼo ntee kʼo ri pa̱ra̱ nu ja ri jmurgøjme?
Jehová nee ke “ra pøtꞹ rga zopjꞹji yo mi kjuarmaji, ngekʼua ra sʼiyaji yo nin minteji i ra pjøskʼøjiyo, ni jyodʼꞹ ra jmurꞹgøji” (Hebreos 10:24, 25). Nu ja ri jmurgøjme ri pa̱ra̱ ntee ke me potka sʼiyaji, nzakjatsʼkʼe me nee ra mba̱ra̱ji Mizhokjimi. Nujnu ri dyⱥrⱥ yo mama ne Biblia ke ra mbøxkʼꞹ na punkjꞹ (xørꞹ Romanos 1:11, 12). Xo søø ri ñaa ko yo ntee yo dya bʼe chjꞹntꞹ ñe yo a chjꞹntꞹ ke o kjogꞹji nrrumꞹ, ra xitsiji pje go tsjaji ngekʼua ro jokꞹji o ja ba sɇchiji. Ngekʼua e Jehová nee ke ra jmurgøji, akjanu texeyo ra mbøxkꞹji.
TEXE YO JÑAA KE ME NI MUBI RA PA̱RA̱JI
Ra nuji pje kjaji yo testigo e Jehová ma jmurꞹji ñe pjenga na joo xo ra jmurgøji.
4. Pje kjaji ma jmurꞹji yo testigo e Jehová
Kja nu siglo dʼaja kʼo mi sꞹtʼꞹji e Cristo mi jmurꞹji ngekʼua ro matrʼꞹji e Jehová (Romanos 16:3-5). Xørꞹbi Colosenses 3:16 ñe ri chjꞹrꞹbi ne trʼønꞹ nu ba e̱je̱:
-
¿Ja ma matrʼꞹji e Jehová kʼo mi sꞹtʼꞹji e Jesús kja nu siglo dʼaja?
Yo padya yo Testigo e Jehová dya xo jɇziji ra jmurꞹji. Ma gi nee ri pa̱ra̱ pje kjaji ma jmurꞹji, jñanrrabi ne VIDEO. Kjanu ri ñubi na pjoto nu ja jmurꞹji yo testigo e Jehová, ñe ri chjꞹrꞹbi yo trʼønꞹ yo ba e̱je̱:
-
¿Ja ga chjenjui kʼo ri kjajme nu ja ri jmurꞹjme ko yo mama kja Colosenses 3:16?
-
Ma gi janrra ne video o ne pjoto, ¿pje nge kʼo me gustatsʼꞹ ma ri jmurgøjme?
Xørꞹbi 2 Corintios 9:7 ñe ri chjꞹrꞹbi ne trʼønꞹ nu ba e̱je̱:
-
¿Pjenga dya ørꞹji merio nu ja jmurꞹji yo testigo e Jehová?
Jñanrrabi kʼo ra xørꞹji yo testigo e Jehová ma ra jmurꞹji ne ngodya.
-
Kʼo ra xørꞹjme ma ra jmurgøjme, ¿pje nge kʼo gustatsʼꞹ ñe gi nuu ke ra mbøxkʼꞹ?
¿Mi pa̱rge?
Kja jw.org, søø ri chotrʼꞹ jango ñe jingua ri jmurgøjme yo testigo e Jehová kja texe ne xoñijomꞹ.
-
Nu ja ri jmurꞹjme unꞹji jñaa ke pjøxkꞹjme ra mimijme na joo, ri janrrajme escenificación ñe video. Ma ri pjꞹrꞹjme ñe ma ri kjuarꞹjme ri kjajme oración ñe ri to̱njo̱jme.
-
Ma kjaji trʼønꞹ, yo bʼꞹnjinu ma neji søø ra nrrꞹrꞹji.
-
Texe kʼo neji søø ra moji: bʼɇzo, nrrinxu, yo a lande ñe yo tsʼitrʼi...
-
Ma ri maa nu ja jmurꞹji yo testigo e Jehová dya pje ri tsjontrʼꞹ.
5. Zø na sʼɇzhi ri maa nu ja jmurꞹji yo testigo e Jehová me na joo ke ri maa
Ra kjijñiji kʼo mi kjaa o familia e Jesús. Angezeji mi ka̱ra̱ji a Nazaret, ñe texe kʼo kjɇɇ mi poji kja kʼe templo a Jerusalén, pa ro søø ro zⱥtʼⱥjinu mi kjapꞹji jñii paa nangeje kʼe ñiʼi kʼꞹ mi sⱥtrʼⱥnu mi kjogꞹ kja kʼo trʼeje. Xørꞹbi Lucas 2:39-42 ñe ri chjꞹrꞹbi yo trʼønꞹ yo ba e̱je̱:
-
¿Gi kjijñige ke ma sʼɇzhi kʼo mi kjaji angezeji ngekʼua ro moji a Jerusalén?
-
Natsʼkʼe, ¿pje nge kʼo ri tsjaa ngekʼua ri søø ri maa nu ja jmurꞹji yo testigo e Jehová?
-
¿Gi kjijñi ke na joo ma ri tsjayo? ¿Pjenga?
Ne Biblia mama ke ni jyodʼꞹ ra jmurꞹji ngekʼua ra matrʼꞹji e Jehová. Xørꞹbi Hebreos 10:24, 25 ñe ri chjꞹrꞹbi ne trʼønꞹ nu ba e̱je̱:
-
¿Pjenga dya ra jɇziji ra jmurꞹji?
BʼꞸBʼꞸ KʼO MANJI: “Dya ni jyodʼꞹ ja ra jmurꞹji ngekʼua ra matrʼꞹji Mizhokjimi. Nzi dʼazꞹji ri juajnꞹji kjo ra pɇsʼiji religión”.
-
¿Pje mama ne Biblia ke jitsʼkøji pje nee e Jehová ke ra kjaji?
KʼO YA RO NUJI
Ma ri maa nu ja ri jmurgøjme mazi ri pa̱ra̱ ja ga kjaa e Jehová, ri chɇzhi ñe ri matrʼꞹ angeze ko yo ntee ke kjaji akjanu.
Pje gi mbeñege
-
¿Pjenga e Jehová nee ke ra jmurꞹji?
-
¿Pje ri pjechi ma ri maa nu ja jmurꞹ yo testigo e Jehová?
-
¿Ja xi rga mbøxkʼꞹge ma ri jmurꞹ ko yo testigo e Jehová?
XE SØØ RI PA̱RA̱
Ma gi kjijñi ri maa nu ja jmurꞹji yo testigo e Jehová, ¿gi su̱u̱? Na bʼɇzo kʼꞹ mi søʼø akjanu ma go maa dya kja go jyɇzi o maa. Jñanrra pjenga o tsjaa akjanu.
Jñanrra na trʼii ke mi nee ro jmurꞹ ñe pje go tsjaa ngekʼua dya ro jyɇzi ro jmurꞹ.
Xørꞹ pje kjijñiji janzi ntee ja ga mbøsʼꞹji kʼꞹ jmurꞹji.
“¿Pjenga na joo ra jmurꞹji ko yo testigo e Jehová?” (Xørꞹ kja jw.org)
Ñuu ja ba potꞹ o zakꞹ na bʼɇzo kʼꞹ me mi kjaa kʼo na sʼoo ma go jmurꞹ ko yo testigo e Jehová.
“Nu ja mi pagø mi jꞹnkʼø in arma” (La Atalaya, 1 de julio de 2014)
Puede que también le interese
KʼO ME ØNꞸJI
¿Ja ga kjaa ne curso bíblico kʼꞹ unꞹji yo testigo e Jehová?
Kja ne curso interactivo søø ri xørꞹge ne Biblia kʼꞹ gi nege. Dya pje ri tsjontrʼꞹ. Søø ri zojnꞹge kja ne curso texe ni pjamiliage ñe yo ntee yo gi joge.
