LECCIÓN 10
¿Nakú ɨn ja vaʼa kuu nu̱u̱ maa-ní ja ndutútú-ní jín nda Testigo Jeová?
¿A ka kána-de maa-ní tágua ndutútú-ní jín nda testigo Jeová? Nú nduu kuiti̱ ndutútú-ní jín nda testigo Jeová, sanaa kuyu̱ʼú-ní jaku ta kiʼin-ní xinañuʼun ji̱chi. Sanaa katuʼun-ní maa-ní: “¿Naguá ka saʼa nda testigo Jeová nu̱u̱ nda reunión-ji? ¿Nakú kánuu tuni nu̱u̱ nda-ji? ¿A suni jiniñuʼun kiʼin-sa?”. Nu̱u̱ lección yaʼa kutuʼva-ní ja nda reunión yaʼa saʼa kutú ka ja kitaʼan-ní jín Yandios ji suni chíndeé nu̱u̱ maa-ní.
1. ¿Na jáʼa kuu ja ndutútú-yo?
Ɨn teé ja ni te̱e̱ Biblia ni kachi-de na jáʼa kuu ja ndutútú-yo: “Nu̱u̱ ndutútú kuaʼa ñayí chiñuʼun-ni Jeová” (Salmo 26:12, TNM). Nda kɨvɨ mita, suni nda testigo Jeová ka ndutútú-ji, de ka kusii tuni ini-ji sɨkɨ ja yaʼa. Nu̱u̱ níí ñuuyɨvɨ́, ka ndutútú-ji nda̱ká semana tágua ka chiñuʼun-ji Yandios, ka ka̱ta-ji yaa̱ ji ka saʼa-ji sáʼan. De sava ji̱chi nu̱u̱ kuiya suni kandutútú-ji nu̱u̱ ɨn asamblea.
2. ¿Naguá kutuʼva-ní nu̱u̱ nda reunión-sa?
Nu̱u̱ nda reunión niini kaʼan sɨkɨ Tuʼun Yandios, de suni steʼen ka̱jí naguá kúni kaʼan (kaʼvi-ní Nehemías 8:8, TNM). De suni nú ndutútú-ní jín nda-sa, kutuʼva ka-ní sɨkɨ Jeová ji nda ja vaʼa ini ja nevaʼa-Ya. Ta kutuʼva ka-ní na̱sa kutoo Ya̱a̱-ní kuu ini ka-ní kitaʼan ini-ní jín-Ya. Suni kutuʼva ka-ní na̱sa chindeé Ya̱a̱-ní tágua kundee vaʼa ka-ní (Isaías 48:17, 18, TNM).
3. ¿Na̱sa kuu chindeé nu̱u̱-ní nda ñayí ja kuni-ní nu̱u̱ nda reunión?
Jeová kachi-Ya “de ná nácani ini̱ o̱ na̱sa sndíʼvi̱ ta̱ʼán ini̱ o̱ ja̱ cundáʼví ca̱ ini̱ o̱ táʼán ó, jíín ja̱ sa̱ʼá ó tiñu váʼa. De níní ná ndútútú ó ja̱ chiñúʼún ó ya̱” (Hebreos 10:24, 25). Nu̱u̱ nda reunión-sa, kuni-ní ñayí ja ka kutoo taʼan ndija-ji, de tanu maa-ní, ka kúni-ji ka kutuʼva ka-ji sɨkɨ Yandios. Suni kunini-ní tuʼun ja vaji nu̱u̱ Biblia ja chindeé nu̱u̱-ní (kaʼvi-ní Romanos 1:11, 12). Suni kuu ndatuʼun-ní ji nda ñayí na̱sa ni ka kundeé-ji nu̱u̱ tundoʼo ja kenda nu̱u̱-ji, vaʼa-ni̱ nu̱u̱ kuu-ji ñayí ja iyo matuʼun-ji axi ni ka tánda̱ʼá-ji. De sɨkɨ ja ndɨʼɨ ja yaʼa Jeová kúni-Ya ja niini ndutútú-yo.
NÁ KUTUʼVA KAYO SƗKƗ TUʼUN YAʼA
Ná kundeʼe-yo na̱sa kuu nda reunión nda testigo Jeová ji nakú kánuu chuʼun ini-yo ndutútú-yo.
4. Nda reunión nda testigo Jeová
Nu̱u̱ siglo xinañuʼun, nda cristiano ni ka ndutútú-ji tágua chiñuʼun nda-ji Jeová (Romanos 16:3-5). Ka kaʼvi-ní Colosenses 3:16, TNM de ka ndatuʼun-ní sɨkɨ nda tuʼun yaʼa:
-
¿Na̱sa ni ka chiñuʼun nu̱u̱ Jeová nda xinañuʼun cristiano?
Kɨvɨ mita, nda Testigo ka ndutútú-ji nɨkani nu̱u̱ nda Salón del Reino. Tágua kuu kuni-ní na̱sa kuu nda reunión nda-ji, ka kundeʼe-ní VIDEO. Ñukua de ka kundeʼe-ní dibujo na̱sa kuu nu̱u̱ ɨn renión de ka ndatuʼun-ní sɨkɨ nda tuʼun yaʼa.
-
¿Na̱sa kaa inuú ja kuu nu̱u̱ ɨn reunión ji ja kachi nu̱u̱ Colosenses 3:16, TNM?
-
Ta ni ndeʼe-ní video axi dibujo, ¿a ni iyo ɨn ja ni taʼa̱n ka ini-ní ja kuu nu̱u̱ reunión nda-sa?
Ka kaʼvi-ní 2 Corintios 9:7 de ka ndatuʼun-ní sɨkɨ nda tuʼun yaʼa:
-
¿Nakú nduu jikan xu̱ʼún nu̱u̱ nda reunión nda testigo Jeová?
Kundeʼe-ní, jín ñayí steʼen nu̱u̱-ní, naguá kuu ja skuaʼa nu̱u̱ reunión semana yaʼa.
-
¿Na tuʼun ja skuaʼa nu̱u̱ reunión yaʼa kuu chindeé nu̱u̱-ní axi taʼa̱n ka ini-ní?
¿A jíni̱-ní?
Nu̱u̱ jw.org ndaniʼi-ní ndenu ji na kɨvɨ ndutútú nda-sa nu̱u̱ siin siin ñuu.
-
Nu̱u̱ nda reunión-sa ya̱ʼa ja kachi Biblia, ja steʼen na̱sa kaʼan-yo Tuʼun Yandios ji nda video. Ndɨʼɨ kejaʼa de jinú-ji jín yaa̱ ji ɨn sáʼan.
-
Nu̱u̱ nda reunión yaʼa, ñayí iyo kuu kachi-ji nda tuʼun ja ni jakuʼun ini-ji.
-
Ndɨʼɨ ñayí kuu kiʼin: teé ji ñaʼan, ñayí ñaʼnu ji nda suchí kua̱chi...
-
Nu̱u̱ nda reunión nda testigo Jeová nduu jiniñuʼun chunaa-ní. Nduu jikan xu̱ʼún de suni ma chunaa-ní ta kɨ́vɨ-ní.
5. Jiniñuʼun chuʼun ini-yo tágua ndutútú-yo
Ná kani xini-yo sɨkɨ nda taʼan Jesús. Ni kandee-de nu̱u̱ ñuu Nazaret, de tágua kiʼin-de veñuʼun ñuu Jerusalén kuiya jín kuiya, ni jiniñuʼun kaka-de uni kɨvɨ ma̱ʼñú nda yukú. Ka kaʼvi-ní Lucas 2:39-42 de ka ndatuʼu-ní sɨkɨ nda tuʼun yaʼa:
-
¿A káʼá-ní ja ni jiniñuʼun ka chuʼun ini-de tágua kiʼin koo-de ñuu Jerusalén?
-
De maa-ní, ¿naguá jiniñuʼun saʼa-ní tágua kuu kiʼin-ní nu̱u̱ nda reunión?
-
¿A jani ini-ní ja jiniñuʼun chuʼun ini-ní tágua kiʼin-ní? ¿Nakú?
Biblia steʼen ja kánuu tuni ja ndutútú-yo tágua chiñuʼun-yo nu̱u̱ Jeová. Ka kaʼvi-ní Hebreos 10:24, 25 de ka ndatuʼun-ní sɨkɨ nda tuʼun yaʼa:
-
¿Nakú kánuu ka̱an-yo ja kiʼin-yo nu̱u̱ nda reunión?
JA KACHI SAVA NDA ÑAYÍ: “Nduu jiniñuʼun ndutútú-yo jín ñayí tágua chiñuʼun-yo Yandios. Chi ɨn ɨn-yo ka̱ji nu̱u̱ koo-yo nu̱u̱ ɨn religión”.
-
¿Na texto axi ejemplo ja vaji nu̱u̱ Biblia steʼen nu̱u̱-yo ja ndetu Jeová ja saʼa-yo?
JA NI KUTUʼVA-YO
Nú ndutútú-ní jín nda-sa nu̱u̱ reunión kutuʼva ka-ní sɨkɨ Jeová, saʼa kutú ka-ní ja kitaʼan-ní jín-Ya ji ja nda chiñuʼun-ní Ya̱a̱ jín sava ka ñayí.
Tuʼun núku̱ʼun ini
-
¿Nakú kána Jeová yoʼo ja kiʼin-yo nu̱u̱ nda reunión?
-
¿Naguá kutuʼva-ní nu̱u̱ nda reunión nda testigo Jeová?
-
¿Na̱sa kuu chindeé ka nda reunión nu̱u̱ maa-ní?
NU̱U̱ NDANIʼI KA-NÍ TUʼUN
¿A yu̱ʼú-ní jaku ta jani ini-ní kiʼin-ní nu̱u̱ nda reunión? Ɨn teé ja ni ndoʼo ini sukua ni taʼa̱n tuni ini-de nda reunión. Kundeʼe-ní nakú.
Kuni-ní ɨn suchí kua̱chi ja ni taʼa̱n tuni ini-ji nda reunión de kundeʼe-ní naguá ni jiniñuʼun saʼa-ji tágua kuu kiʼin-ji ndɨʼɨ nda reunión.
Kaʼvi-ní ja jani xini sava nda ñayí sɨkɨ nda reunión.
“¿Nakú iyo vaʼa ja kiʼin-yo nda reunión nu̱u̱ Salón del Reino?” (Artículo nu̱u̱ jw.org)
Kundeʼe-ní na̱sa ni sa̱ma ɨn teé ni iyo xée̱n tuni ta ni kejaʼa-de ni ndutútú-de jín nda testigo Jeová.
“Niini ni jika-sa jín tuji-sa” (La Atalaya, 1 yo̱o̱ julio 2014)