ISAMBILILO 10
Uzye Ukulongana na ya Nte Yakwe Yeova Kungamwazwa Uli?
Uzye yatala yamwamapo ku kulongana kwakwe ya Nte Yakwe Yeova? Ndi cakuti mutatala mwayako, mungauvwa intete zya kuyako pa muku wa kutandikilako. Limwi mungaelenganya ukuti: ‘I vyani vikacitika pa kulongana kuu? U mulandu ci uno kwacindamila? U mulandu ci uno ndinzile kuyilako?’ Umwi sambililo lii, mumasambilila vino ukulongana pamwi kungalenga mupalame kuli Leza na vino kungamwazwa.
1. U mulandu ci uno ya Nte Yakwe Yeova yakalonganila pamwi?
Uvwini vino kalemba wakwe Baibo umwi walanzile pa mulandu ucindame uno tukalonganila pamwi. Watile: “Mu ukongano wa antu yakwe namalumbanyanga Yawe.” (Masamu 26:12) Vikwene avino na ya Nte Yakwe Yeova yakacita, yakaipakizya sana ukulonganila pamwi. Umu nsi yonsi, yakakongana pamwi cila mulungu ku kulumbanya Leza, ukwimba inyimbo alino nu kupepa. Nupya pa nsita zimwi umu mwaka, yakakongana pamwi ku maukongano ku kusambilila pali Yeova.
2. I vyani vino mulasambilila pa kulongana?
Pa kulongana, tukaika mano ku kusambilila ivyaya umwi Izwi lyakwe Leza, nu kulondolwela ningo antu “Lupapulo lwa Masunde yakwe Leza.” (Belengini Neemiya 8:8.) Nga mwatandika ukuya umu kulongana, mulasambilila pali Yeova ni miyele isuma ino wakwata. Nga mwasambilila ivingi pali vino wamutemwa, mulapalama kuli aliwe. Nupya mulasambilila na vino angamwazwa ukuya nu umi usuma.—Ezaya 48:17, 18.
3. Uzye antu yano mulazana ku kulongana yalamwazwa uli?
Yeova watunena ukuti “twasakamalana pakuti twacincizyanya umu kutemwa nu kuomba milimo isuma, tutaatazyela ukulongana kwitu.” (Aebele 10:24, 25) Ku kulongana, mulazana antu aakasakamalana nupya atemwa ukusambilila pali Leza wakwe mwemwe. Muluvwa yakukomelezyanya ukuomvya Baibo. (Belengini Loma 1:11, 12.) Nupya mulamanyana na yauze, asimbe, na atwale nanti atwalwe aaya ni nsansa asi mulandu ni ntazi zino yakakwata. Vii ali vimwi vyalenga Yeova aalonda ukuti twalonganila pamwi.
LONDELEZYINI NA VYUZE
Sambililini ivikacitika pa kulongana kwakwe ya Nte Yakwe Yeova nu mulandu uno cacindamila ukwezya na maka ukuzanwako.
4. Kulongana kwakwe ya Nte Yakwe Yeova
Aina Klistu aliko mu manda ya kutandikilako, yakongananga pamwi ku kupepa Yeova. (Loma 16:3-5) Belengini Kolose 3:16, alino mulanzyanye iuzyo lii:
-
Uzye aina Klistu ya kutandikilako yacitanga uli pa kupepa Yeova?
Ndakai, ya Nte Yakwe Yeova nayo kwene yakalonganila pamwi mu Mang’anda ya Wene. Pakuti mumanye vino ukulongana kuko kukaya, tambini VIDYO. Lyene, mulole icikope cikulangilila vino ukulongana kukaya alino mulanzyanye mauzyo atiyalondelelapo.
-
I vyani vikolaneko vino imwalola pali vino vikacitika pa Ng’anda ya Wene na vino itwabelenga pali Kolose 3:16?
-
Muli vidyo nanti pa cikope, uzye imwalolako vimwi vikacitika pa kulongana vino imwatemwa sana?
Belengini 2 Kolinto 9:7, alino mulanzyanye iuzyo lii:
-
U mulandu ci uno ya Nte Yakwe Yeova yasilengela impiya pa kulongana?
Pamwi na kasambilizya winu, pitulukini muli vino tulasambilila mulungu uu pa kulongana konga.
-
I ciputulwa ci ca kulongana cino mukulola ukuti mulaipakizya nanti icilamwazwa?
Uzye imumanya?
Pajw.org, mungazana kuno ukulongana kukayela ni nsita umu nsi yonsi.
-
Pa kulongana kwitu pakaya malyasi, vilangililo alino na mavidyo. Kulongana kukatandika nu kusila nu lwimbo ni ipepo
-
Mu viputulwa vimwi vya kulongana amwi umba yakalandapo
-
Aliwensi angazwanwako—amu lupwa, asimbe, akoloci alino na ana
-
Ku kulongana kwakwe ya Nte Yakwe Yeova kutaya ukulipila nanti ukupeela imituulo
5. Mulinzile ukuombesya pakuti muzanwe umu kulongana
Elenganyini pali vino ulupwa lwakwe Yesu lwacitanga. Pakuti yakazanwe uku kulongana ukwayangako cila mwaka, yapitanga intamfu itali umu myamba ukufuma uku Nazaleti ukuya uku Yelusalemu. Belengini Luka 2:39-42, alino mulanzyanye mauzyo yaa:
-
Uzye mukwelenganya ukuti ulwendo luu ulwa kuya uku Yelusalemu lwalondekwanga ukuombesya?
-
U mulandu ci uno mulinzile ukuombesya pakuti muzanweko uku kulongana?
-
Uzye mukwelenganya ukuti icicindama ukuzanwa umu kulongana nanti cakuti icitale ukucita vivyo? U mulandu ci?
Baibo ikalanda ukuti cacindama ukulongana pamwi uku kupepa Yeova. Belengini Aebele 10:24, 25, alino mulanzyanye iuzyo lii:
-
U mulandu ci uno tulinzile ukuzanilwa umu kulongana lyonsi?
YAMWI YAKALANDA UKUTI: “Utalinzile ukulonganila pamwi na yauze. U kubelenga sile Baibo uku ng’anda ale casila.”
-
I lembo ci nanti i lyasi ci ilyaya muli Baibo ilikalondolola vino Yeova akalonda?
VINO TWASAMBILILA
Ukuya umu kulongana kulamwazwa ukusambilila ivingi pali Yeova, kukomya ucuza winu na aliwe alino nu kupepela pamwi na yauze.
I vyani vino mwasambilila?
-
U mulandu ci uno Yeova akatukomelezezya ukuti twalongana pamwi?
-
I vyani vino mulasambilila pa kulongana kwakwe ya Nte Yakwe Yeova?
-
Uzye mukwelenganya ukuti ukulongana kulamwazwa umu nzila imwi?
LONDELEZYINI
Mungacita uli ndi cakuti mukuvwa intete zya kuya uku kulongana? Lolini vino umonsi umwi uuvwanga vivyo, wizile atemwa ukulongana.
Lolini vino uwacance umwi waipakizye ukulongana na vino wacisile pakuti atwalilile ukulazanwako.
Sambililini vino yauze yakayuvwa pa kuzanwa uku kulongana.
“U Mulandu ci Uno Ndinzile Ukuyila Umu Kulongana Uku Ng’anda ya Wene?” (Cipande ca pa intaneti)
Sambililini vino umonsi umwi uwali icipondo wizile asenuka pa cisila ca kuzanwa uku kulongana kwakwe ya Nte Yakwe Yeova.
“Nasendanga Imfuti Konsi Kuno Nkuya” (Lupungu Lwa Mulinzi, Julai 1, 2014)
Limwi Mungatemwa Ukulolako na Vii
MAUZYO YANO ANTU YAKAUZYA SANA
Uzye Isambililo Lya Baibo Ali Cani?
Zanini masuko ku mauzyo pali vino tukasambilizya antu Baibo ukwaula ukuyalipilisya.
