MWAHA 10

Mithukumano sa Anamoona a Yehova Inii Sookhaviheryeeni Hai?

ORUMIHA

Apwanne montoko owompwa ntakhara mithukumano sa Anamoona a Yehova? Waakhanle wi hamutonko ophiya mmithukumano, munahaala okhala awuukhuwa nthowa na okhala ekwaha yoopacerya ophiya mmithukumano. Ophiyerya wi munahaala wiikoha: ‘Tiheeni eneereya mmithukumano seiyo? Ntakhara heeni iryaaya soochuneya? Ntakhara heeni kinnaphwanela oyawo?’ Mmwaha yoola, munahaala ohuserya ti mwawiihai othukumana ni akina oneeraaya owaacameliheeni wa Muluku ni wookhaviheryaani mukhatiinyu.

1. Ntakhara heeni Anamoona a Yehova annathukumana vamoha?

Moone mukhalelo mulipa oomurepa Piipiliya olonceiye okhweleya waya othukumana ni akina: “M’makhucheni kinarwa-kimuthamala Yehova.” (Salumu 26:12, NN) Moolikana, Anamoona a Yehova annaphwanya ohakalala otokotoko vaavaa anathukumanaaya vamoha. Orukurerya elapo, awo annathukumana esumana ti esumana wi emvuwihe Muluku, wiipa macipo, ni ovekela wa yoowo. Ikwaha vakhaani eyaakha ti eyaakha, awo annathukumana tho mmakhuuru matokweene wi emulapele.

2. Tiheeni munahaalaanyu ohuserya mmithukumano sahu?

Mmithukumano, nnahusiha orweela Mmasu a Muluku, ‘ntaphulelaka ni waaleeliha achu wi yiiweke phaama.’ (Mwaalakhanye Nehemiya 8:8.) Moorweela wa ophwanyeya mmithukumanoni, munahaala ohuserya vooloca sa Yehova vamoha ni mikhalelo sawe saphaama. Vaavaa muneeraanyu muhuserye sincipale vooloca sa osivela wawe ntakhara nyuwaano, munahaala okhala awaacameleya wa yoowo. Munahaala tho ohuserya mukhalelo oneereiye ookhaviheryeeni okhalano okumi woohakalaliha.—Isaiya 48:17, 18.

3. Mphurelo taani muneeraanyu mukhaleno moorweela wa ophwanyeya mmithukumano sahu?

Yehova onnanilamulela wi “nuupuwelelaneke mukina ni mukhwaawe, nlipisheryanaka mu osivela ni mwa miteko yaphaama.” (Ahebri 10:24, 25) Mmithukumano sahu, nyuwaano munahaala waasuwela achu anooniherya opwachana mukina ni mukhwaawe, nave, hiiha ntoko nyuwo, anooniherya wi annachuna ohuserya sincipale vooloca sa Muluku. Munahaala owiiwa elocaka miyaha ni maakhulo variyari va mithukumano ni ovaanela mithukumano ihipacenrye ni imanle. (Mwaalakhanye Aroma 1:11, 12.) Munahaala tho owerya oloca ni akina yaawo anavilela phaama ni makacamiho yaawo aciye ni atheli anahoolelaaya. Ala mathowa a vakhaani ntakhara heeni Yehova onnachuna wi niphwanyeyeke mmithukumano moohihiyererya!

OHUSERYA MWAWIISEELA

Musuwele yeeyo eneereya mmithukumano sa Anamoona a Yehova nave ntakhara heeni ti woochuneya wiilipiserya ophwanyeya mmithukumano seiyo.

4. Mithukumano sa Anamoona a Yehova

Akristu a nsana noopacerya, yaanathukumana vamoha moohihiyererya wi emulapele Yehova. (Aroma 16:3-5) Mwaalakhanye Kolosi 3:16, nave voocharela muthokororye nikoho nla:

Akristu a nsana noopacerya yaamulapela hai Yehova?

Mmahiku ahu tho Anamoona a Yehova annathukumana moohihiyererya mmapuro aya a malapelo. Wi moone yeeyo eneereya mmithukumanoni mwaya, moone EXILEMA. Voocharela, moone eruku ya mithukumano sa muloko, nave muthokororye makoho anacharela.

EXILEMA: Tiheeni Eneereya mu Empa ya Omwene? (2:12)

Ichu taani soolikana monnaanyu wa yeeyo eneereya mu Empa ya Omwene ni yeeyo mwaalakhannyaanyu mu Kolosi 3:16?
Mu exilema naari mu eruku, apwanne mohoona echu vyakala vooloca sa mithukumano yoosivenleeni?

Mwaalakhanye 2 Korinto 9:7, nave voocharela muthokororye nikoho nla:

Ntakhara heeni mmithukumano sa Anamoona a Yehova honavekiwawo ikhorowa?

Vamoha ni muhusiha anyu, muthokororye yeeyo enahaala ohuseryiwa mmithukumano sa esumana enacharela.

Makupa taani a mithukumano munoonaanyu wi anahaala okhala a mphurelo wa nyuwo?

Nyuwaano mwaanasuwela?

Mu jw.org, munanwerya ophwanya nipuro ni elukuluku mithukumano inapakiwaaya orukurerya elapo yoothene.

Mithukumano sahu inaphitaanyerya miyaha, sawooniherya, ni ixilema. Mithukumano inapacerya nave inamala ni ncipo vamoha ni nivekelo
Variyari va makupa makina a mithukumano, alipa oowiriyana annawompwa wi evahe maakhulo aya
Oothene annaakheliwa phaama—imusi, aciye, awunnuwelavo, ni anamwane
Mithukumano sahu hasinaliveliwa. Anamoona a Yehova hanaveka ikhorowa naari oviriha eparatho wi iheliwemo ikhorowa

5. Mwiilipiserye wi mphwanyeye mmithukumanoni

Muthokororye yootakiherya ya emusi ya Yesu. Wi ephwanyeye va mithukumano sa vayaakhani, awo yaaneeca ikiloometru 100 eviraka mmiyaakoni ovinyerya o Nasareti eyaaka o Yerusalemu. Mwaalakhanye Luka 2:39-42, nave voocharela muthokororye makoho ala:

Munoona wi mukwaha yoola wa oya o Yerusalemu waanachuneya wiilipiserya?
Ntakhara heeni nyuwaano munnaphwanela wiilipiserya wi mphwanyeye mmithukumanoni?
Munoona wi ti woochuneya othukumana naamwi okhalaka woovila? Ntakhara heeni?

Piipiliya onaloca wi othukumana vamoha wi nimulapele Yehova ti woochuneyaxa. Mwaalakhanye Ahebri 10:24, 25, nave voocharela muthokororye nikoho nla:

Ntakhara heeni ninnaphwanela othukumana moohihiyererya?

ACHU AKINA ANI: “Nyuwaano hamunaphwanela othukumana ni akina. Ennaakhwanela omuhuserya Piipiliya muri owaani.”

Yoorepa taani naari yootakiherya ya Mpiipiliyani enooniherya wi Yehova onaweherya wi nithukumaneke?

MUKWASU

Ophwanyeya mmithukumanoni onahaala wookhaviheryaani ohuserya sincipale vooloca sa Yehova, olipiha onthamwene anyu ni yoowo, ni omulapa vamoha ni akina.

Makoho awuuluulela

Ntakhara heeni Yehova onnanceenyerya othukumanaka vamoha?
Tiheeni munahaalaanyu ohuserya mmithukumano sa Anamoona a Yehova?
Munuupuwela wi mithukumano inanwerya wookhaviheryaani mmukhalelo mukina?

Mwaha kimalinhe:

Yoolakelela

Mphwanyeye va muthukumano nave mwaasuwele achu akina yaawo eni ephwanyeye vaava.

Ekina:

Yoolakelelaanyu ekina

OTHOLATHOLA

Hanka wakhala wi muri awuukhuwa vooloca sa ophwanyeya va muthukumano? Moone ti mwawiihai mulopwana iisoona mmukhalelo yoowo aapacenryeiye osiveliwano mithukumano.

Nunca vamos esquecer como nos receberam (4:16)