CHILAYIJO 10
Mishangano yabaSumikiji baJehova Inokubhancha Chini?
Wanu kokwa na kumishangano yabaSumikiji baJehova? Kana usanu wangwina mishangano yadeni unobewha ulinolutyo. Ungazubhuza kuti: ‘Ini zunotikana pamishangano yabo? Neni ikakosha? Neni ndikwelela kuyingwina?’ Muchilayijo yechi uchalayijwa kuti kushangana nabamwe kunokubhancha mubupenyu bubo akale usendele pelyo naMwali.
1. Ndichipi chizatu chikulwana chokushangana nabamwe?
Umwe unkwali weBhayibhili wakaleba nozwechizatu chikulwana chokushanga nabamwe eti: “Ndichakuja Jehova ndilimugubungano gulwana.” (Lwimbo 26:12) Ndizo baSumikiji baJehova benakilwa nokushanga pamwempela. Munyika yose banoshangana iviki neviki bekuja Mwali, bekwimba akale benamata. Akale igole negole banosoba nemishangano mikulwana belayijwa nozwaJehova.
2. Ini zwawuchalayijwa pamishangano yedu?
Zwose zwatinolayijwa pamishangano zunova muWhi lyaMwali “linowhikana akale linolungulula zunowhikana.” (Balani Nehemiya 8:8.) Pamishangano yedu uchalayijwa nozwaJehova nozobunhu bubwe bunochenamisa. Pawuchalayijwa nozokuda kwaanokuta, uchasendela pelyo naye . Uchalayijwa kuti angakubhancha chini kuti unakilwe nobupenyu. Izaya 48:17, 18.
3. Zungakubhancha chini kulebeleka nabamwe pamishangano?
Jehova unoda kuti “tibabalilane kutila kuti timusilijane muludo nomumishingo mibuya, tisileke kushangana pamwempela.” (BaHebhelu 10:24, 25) Pamishangano yedu uchashangana nabanhu banaludo akale banachido chokuda kulayijwa zunji nozwaMwali sawi. Uchawha belebeleka nozunu zunokutayija zunova muBhayibhili. (Balani BaRoma 1:11, 12.) Uchawana unshaji wokulebeleka nabanhu bakakoma bukukutu bunoshangamijana nabalolobolwa nabasijilolobolwa. Yozu zumwe zozuzatu zunota kuti Jehova ede kuti tingwine mishangano unshaji wose!
FUNDA ZUNJI
Layijwa kuti ini zunotikana pamishangano yabaSumikiji baJehova akale kuti inokwanisa kukubhancha chini.
4. Mishangano yabaSumikiji baJehova
MaKhristo okutanga bakabeshangana unshaji wose benamata Jehova. (BaRoma 16:3-5) Balani BaKolose 3:16, akale kwejisani nombuzo yoyu:
-
MaKristo okutanga akabonamata chini Jehova?
Mazhubano baSumikiji banoshangana unshaji wose mujingumba jobushe benamata. Kuti ubone zunotikana pemishangano yeyi, yebani iVIDIYO. Musikolinga ipikicha yabanhu bapo ponshangano akale kwejisani nemibhuzo inotobela.
-
Zwatabala pana BaKolose 3:16 zunokwendelana chini nozwawabona muvidiyo?
-
Ini zwakunakilija zumomuvidiyo kana kuti pepikicha?
Balani 2 BaKolinte 9:7, akale kwejisani nombuzo yoyu:
-
Neni mishangano yabaSumikiji baJehova isinolipiswa?
Kumbila unhu umukukulayija iBhayibhili ekutondeje zuchalayijwa pamishangano inotobela.
-
Ndichipi chikamu chemishangano chawabona chakunakilija?
Wabezuziba na?
Ungongwina pejw.org, uchawana unshaji nendawo inotiwa mishangano yedu.
-
Pamishangano yedu panosoba nenyaya jinova muBhayibhili pesikoba nabamwe banoti tondeja kuti tingalayija chini bamwe nozweBhayibhli akale namavidiyo. Mishangano yedu inotanga nolwimbo nonamato isikopela nenzila imwempela
-
Panomwe nshaji bawhilili panopiwa chibaka chokushanganyila
-
Unhu wose ulosupuka kungwina mishangano—jingaba jimhuli, basijilolobola nabasijilolobolwa, bakwegula nabatukutuku
-
Mishangano yedu ayitolipiswa. Apana kansangwa kanokwendeswa
5. Kunoda kuzupila kungwina mishangano
Yeyesesa zwakabetiwa nobomumhuli yaJesu. Kuti bengwine mishangano yakabetiwa gole negole bakabekwelela kukwenda makilomita 100 betana matunu bebhuda kuNazareta benda kuJerusalema. Balani Luka 2:39-42, akale kwejisani nemibhuzo yeyi:
-
Ubweni sokuti lwendo lokunda kuJerusalema lwakabeli lulelu na?
-
Neni ukwelela kushinga nesimba kuti ungwine mishangano?
-
Ubweni sokuti kungwina mishangano kunokubhancha na? Neni udalo?
IBhayibhili linoti kulokosha kushangana pamwempela tinamata. Balani BaHebhelu 10:24, 25, akale kwejisani nombuzo yoyu:
-
Neni tikwelela kungwina mishangano unshaji wose?
BAMWE BANOTI: “Kushangana nabamwe akutobhancha. Unokwanisa kuzubalile iBhayibhili kungumba.”
-
Ndiyipi vesi kana inyaya imomuBhayibhili inotondeja zunodiwa naJehova kuti tite?
INI ZWAWAFUNDA
Kungwina mishangano yedu kuchakubhancha kulayijwa zunji nozwaJehova, kuba nobukwayina bupopelyo naye akale zunotipa chibaka chokuunkuja nabamwe.
Kubwilulula
-
Neni Jehova etikutayija kushangana pamwempela nabamwe?
-
Uchalayijwani ponshangano yabaSumikiji baJehova?
-
Ubweni sokuti ndizupi zumwe zungakubhancha nokungwina mishangano yedu?
PAMIJA PANA ZWAWAWANA
Zunowini kana ulinolutyo lokungwina mishangano yedu? Bona kuti umwe nhulume wakopejeleja eda kungwina mishangano kojoba wakabelinolutyo.
Bona kuti umwe mbisana wakanakilwa chini nokungwina mishangano yedu akale kuti ini zwaakata kuti endilile mbeli.
Layijwa kuti bamwe banowha chini nokungwina mishangano.
“Kungani Kumele Ungene Imihlangano EWolu YoMbuso?” (Inyaya ipo peintaneti)
Bala uwhe kuti umwe nhulume wakachincha chini bupenyu bubwe yopo paakatanga kungwina mishangano yabaSumikiji baJehova.
“Ngangihlala Ngithwele Umbhobho” (INqabayokulinda, July 1, 2014)
