Ta mé laa toŋo wou na tso tchouʼté Pakuié Ntang Jéova? A lôôn ngouo yié o laa zôôn nkouou tso tchouʼté yôb wô, mba ngouo o naʼa ntchʉôʼ lé too wo na mvôg mvfo lékwo. Ndièʼè tso o né nzèté two jou: «Mé zôôn ngʉo kô na métchouʼté môb? É gwiée tʉnzuing nti kô? Mélaʼa kô a zaté ngié méng gʉa yôôn wo?» O gé gʉa tsaa sôôn léziʼi, ngia ngié ngouo lékouou métchouʼté gʉo o suièʼté nnè né léjʉng Jéova, mbing nkuiété wou tsaa wou léwô.

1. Mélaʼa kô Pakuié Ntang Jéova gʉo métchouʼté?

Taʼ gning na pʉa pié é la ŋwéʼé Biible la gôôn no na mmo yié a pou ngouo tʉnzuing, ayié a gʉo ngié pégé tchouʼté: «N gé gouʼté Jéova tsèe maamaa tchouʼté» (Zôbô ntsé 26:12). Ndésém pouʼou, Pakuié Ntang Jéova gwiée maa lékag lé gʉo métchouʼté. A gʉa tsaa njʉo ntsém, po tchouʼté méngaba laʼ ntsém lé gouʼté Ssé, lé zôb, mboo lé gʉo préya. Po ying ngʉo mémaa métchouʼté ngʉa mbʉa, ka ngʉa ta wôô na ngouʼou laʼ lé lôg ngouʼté Ssé.

2. O gé ziʼi kô na métchouʼté még?

A gʉa na métchouʼté môb, Pakuié Ntang Jéova néŋé two na Ŋwaʼné Ssé, «ntchouoŋo nkièʼté mbing ngʉo na nti yié mé gé jouʼ» (Toŋo Néhémi 8:8). O lôôn nkouou métchouʼté môb, mba o gé kuiʼi ziʼi choum na Jéova, mboo na méma mé mié é pou si tèʼ. O gé né njouʼou nti yié a kouoŋo wou pouʼou, ayèe tsoté wou lé kuiʼi suièʼté nnè né léjʉng yé. O gé ying jouʼ ngié ngouo a kuiété wou lé jouʼ mboŋo tsèe wou léwô (Ésaya 48:​17, 18).

3. Ô gé jʉo yèe pi na lékouou métchouʼté még?

Jéova né ngôôn né pégé ngié: «Ta gning wégé gouaʼa lʉôg a lé lié fè wé, a ying ndié yé yé, nzsé ngié pégé gé lôg pouʼou, kuingté mémboum mégé na légwiée nkouoŋé mbôô na léfaʼ méfaʼ mboŋo. Ta pégé gnié lé ké nné ntoo métchouʼté mégé too» (Héber 10:​24, 25). O gé too na métchouʼté még giè pʉa pié po kouaʼ ndié pétso pʉa paʼ two mboum yôb, épʉa pié po né faʼa lé zsé Ssé paʼ wou jou. O gé jouʼ paʼ po laʼté nti yié Biible né nkuingté wôb pouʼou (Toŋo Roma 1:​11, 12). O gé too wo giè pʉa pié é zôôʼ, mboo pié é gnié té zôʼ, pié po né nkaga mboo paʼ po gwiée méngôʼ paʼ maagning ntsém. Sôôn ée tso méntong na métso ta ngiôôn, mié é gʉo Jéova né nkouoŋo ngié pégé néŋé nkouou métchouʼté.

 YING NKUIʼI NZIʼI

4. Métchouʼté Pakuié Ntang Jéova

A laa na mvôg mvfo ngouʼ nkʉo, Mékréeté lôôn ntchouʼté fʉʼ ntsém lé gouʼté Jéova (Roma 16:​3-5). Toŋo Kolosia 3:​16, ndéen ké chouŋé na yôôn nzèté:

• Mékréeté pé fʉʼʉ mvfo lôôn ngouʼté Jéova lékô?

1. Mé gʉa na métchouʼté még nna métwo chouŋé, ngʉo médémonstration mbing ngiè mévidéo. Métchouʼté zhiété mbing mmag né zôbô ntsé po préya.

2. Mé gʉo tchouʼté ta nkouou tso fʉʼ, ngouo yié o lôôn nkouong o kouéʼé pwo jou ngôôn no.

3.   Mé naa zsé léto mbwo maawôôwôô: pambaŋa, panzuiée, pʉa pié é naʼa ntchʉôgté, ngouachoum, ta mboo pénkʉ.

4. Mé té péen ta nkou métchouʼté még wô. Mé té na nkab ta nkouou nda tchouʼté wô, nké té maʼ nkab fʉʼé mé née ngʉo tchouʼté wô.

5. A zèté lé kag métʉ ta nkou métchouʼté

• Nti kô a zaté ngié pégé néŋé nkou métchouʼté fʉʼ ntsém?

 TA O ZIʼII KÔ?

Lékouou métchouʼté gé kuiété wou lé tchouoŋo nzsé Jéova, ngʉo léchou si yé kuiʼi ntʉté, éping nkuiété wou lé gouʼté yé né pétso pʉa.

Ta o né nkimté?

• Nti kô Jéova kuingté wégé lé néŋé nkou métchouʼté?

• O gé ziʼi kô na métchouʼté Pakuié Ntang Jéova?

• O né ngiè ngié ngouo lékouou métchouʼté ying nkuiété wou lékô?