Ebee luge ekue a kɔ o si enɔānu Pya Ekeebee Jɛhova ni? Lo o sii si wa enɔānu lɔgɔ dee, bu a dap dɔ tua sɔ̄ o si. O dap bura kɔ: ‘E na a wee lu edoo bu pya lo enɔānu a? E na anua alu ebɛɛ̄ a? E na anua m si a?’ Bu nuenɔ ama, o nɔ kɛ̄ nyɔɔnɛ pya dɔɔ̄na nɔnu dap doo kɔ o tɔɔ̄ waɛloo Bari le kɛ̄ eyerebah a nɛ doo.

1. E na anua Pya Ekeebee Jɛhova wee gbaa si enɔānu a?

Yere nukuādɛɛ̄ loo kɛ̄ ziī nɛɛ a bee ɛm Baibol baatɛ̄ nu anua alu ebɛɛ̄ kɔ i gbaaloo pya dɔɔ̄na lo enɔnu doo sɔ̄ a bee kɔ: “Bu gbɛnɛ bɔŋanaloo na m leera Jɛhova a.” (Le-yɔɔ 26:12) Bu aba lo sīdee, Pya Ekeebee Jɛhova ɛrɛ gbɛnɛ ɛɛbu sɔ̄ ba gbaaloo ziī bu enɔānu. Tɛɛ̄ ɛŋɛnɛ nyɔuwe, ba zɔ̄ŋia bu ziī ziī kaɛ lo eleera Bari, uɛ yɔɔ, sa yere kara. Taa sɔ̄ bu ziī zua, ba wee gbaa bɔŋana lo etaāŋabah Bari bu gbɛnɛ eku.

2. E na o nɔ bie pya i enɔānu a?

Bie pya i enɔānu, wee lu etɔgɛ Muɛ̄ Ue Bari, “bu sīdee pya nɛɛ dap dā, [sa] kɔ nu a kura siā.” (Buū Nehemia 8:8.) Sɔ̄ o si enɔānu, o nɔ nu akiiloo Jɛhova le pya ye lele elap dogo. Susuā kɛ̄ a a wereloo doo edoo kɔ o tɔɔ̄ ye waɛloo kaāna. O nɔnage kɛ̄ Bari a dap yerebah nɛ kɔ o ɛrɛ iīnaloo bu dum doo.—Aisaia 48:17, 18.

3. Gbaaloo pya dɔɔ̄na bie enɔānu edɔbiī a nɛ doodoo wa?

Jɛhova yere i mɛm loo kɔ “i kɛɛrɛbu ɛnia ii lo ezū wa mmɛ loo wereloo le le tam, naa le bee i lɛɛbaloo esu i loo bɔŋanaloo.” (Pya Hibru 10:24, 25) O muɛ̄ pya nɛɛ a kuūdɛɛ̄loo ɛnia aba bie pya i enɔānu, le pya nɛɛ a ɛrɛ taɛ lo enɔ nu akiiloo Bari dookɛ̄ olo doo. O dā sɔ̄ ba aa kɔ pya ue a yere mɛm loo nɛɛ aābu Baibol. (Buū Pya Rom 1:11, 12.) O dapnage nyɔɔnɛ pya a le aba aba le pya e’iya sa ii kɔnia ue, sa ba kɔ a nɛ kɛ̄ ba aa aabaloo pya wa taāŋa doo. Pio nu anua Jɛhova gbī kɔ i gbaa bɔŋana dɛ̄dɛɛ̄ sɔ̄ lo.

 NƆ YERELOO

4. Enɔānu Pya Ekeebee Jɛhova

Bu tua sɔ̄ o’oo tup zua a, pya Nɛɛ Kraist wee gbaa zɔ̄ŋia lo etaāŋabah Jɛhova. (Pya Rom 16:3-5) Buū Pya Kɔlɔsi 3:16, lɛɛ o agara ebip ama:

• Bu mɛ sīdee na pya Nɛɛ Kraist bu tua sɔ̄ o’oo tup zua wee taāŋabah Jɛhova a?

1. Pya nu a wee sira bu pya i enɔānu na, nɛ ekɔaue, tɔgɛ siā bu edoba, le vidio. Dɛ̄dɛɛ̄ i enɔānu wee bɔātɛ̄ sa kpana tɛ̄maloo yɔɔ le kara

2. Bu pio gah loo lo enɔānu, wee lu enɛ dee pya a le kɛ̄ kɔ ba a agara ebip

3.   Lu esu baɛ bah suā dɛ̄dɛɛ̄ nɛɛ, pya butɔ, pya a le aba aba, pya nama nɛɛ, le pya miɔŋɔ

4. Naa wee lu esu kpugi loo pya i enɔānu. Pya Ekeebee Jɛhova naa wee kɔ alu etɛrɛ kpugi fɛrɛ ale biaɛ kpugi yere bee nɛɛ

5. A gbī epiaga lo edap si pya i enɔānu

• E na anua i si enɔānu eree sɔ̄ loo a?

 TƐƐ̄NYƆƆ

Sisi enɔānu eyerebah a nɛ kɔ o nɔ gbɛnɛ-edo nu akiiloo Jɛhova, nyimɛ o gbanialoo ye kumaloo, le kɔ o gbaaloo pya dɔɔ̄na ye taāŋabah.

Ebip Tɛ̄ma Nyɔɔ

• E na anua Jɛhova yere i mɛm loo kɔ i gbaa bɔŋanaloo a?

• E na o nɔ bie enɔānu Pya Ekeebee Jɛhova a?

• Dɔɔ̄na mɛ sīdee na o kɛɛrɛ kɔ o dabe ɛrɛ biī aāloo pya lo enɔānu a?