10. KAPITEL
Woo kjennen Jehova siene Zeijen äare Toopkomes fa die toom gooden sennen?
Wortst du mol no Jehova siene Zeijen äare Toopkomes jekroacht? Wan du doa noch kjeenmol jewast best, dan woascht du die veleicht meist nich doa hanwoagen. Veleicht best du nieschierich: “Woo es daut en soone Toopkomes? Wuarom sent dee soo wichtich? Waut brinjt mie daut, wan ekj doa sie?” En dit Kapitel woascht du lieren, woo de Toopkomes die kjennen toom gooden sennen un die uk halpen, een bätra Frint met Gott to sennen.
1. Woont es de gaunz ieeschta Grunt, wuarom wie Toopkomes haben?
Kjikj mol, waut een Bibelschriewa schreef, woont de ieeschte Uasoak es, sikj to vesaumlen: “Ekj well dän HARN en de Vesaumlungen lowen” (Psalm 26:12). Jehova siene Zeijen haben uk groote Freid, wan dee sikj vesaumlen. Aulawäajen oppe Welt vesaumlen dee sikj een poa Mol de Wäakj toom Gott lowen, toom sinjen un bäden. Een poa Mol daut Joa haben dee uk groote Toopkomes.
2. Waut woascht du en onse Toopkomes lieren?
En onse Toopkomes woat Gott sien Wuat kloa un vestentlich utjelajcht (läs Nehemia 8:8). Doa woascht du von Jehova lieren un enwoaren, woo goot hee es. Du woascht lieren, woo sea hee die leeft un dan woascht du die am noch dolla no aun feelen. Du woascht uk enwoaren, woo hee die halpen kaun, een tofrädnet un scheenet Läwen to haben (Jesaja 48:17-18).
3. Woo kjennen de aundre bie de Toopkomes die halpen?
Jehova sajcht, wie sellen “toophoolen un ons unjarenaunda aunspornen, en goode Woakjen, Leew to bewiesen. Vonne Vesaumlungen wajch bliewen, . . . daut well wie nich” (Hebräa 10:24-25). Bie onse Toopkomes kaust du die met Menschen aufjäwen, waut sikj unjarenaunda väl räakjnen un mea von Gott lieren wellen krakjt soo aus du. Waut dee von de Schreft vetalen, woat die väl Moot jäwen (läs Reema 1:11-12). Du woascht doa Befriede uk Onbefriede kjanen lieren, waut kjennen schaftich sennen, wan dee daut veleicht uk nich leicht haben. Dit sent bloos een poa Jrind, wuarom Jehova haben well, daut wie ons sellen räajelmässich vesaumlen!
DOLLA UNJASTONEN
Finj ut, woo daut bie de Toopkomes von Jehova siene Zeijen es un wuarom sikj daut loont, doa hantowanken.
4. De Toopkomes von Jehova siene Zeijen
De ieeschte Christen kjeemen pinkjlich toop toom Jehova aunbäden un deenen (Reema 16:3-5). Läst Kolossa 3:16 un dan got toop dise Froag derch:
-
Waut deeden de ieeschte Christen bie äare Toopkomes?
Jehova siene Zeijen komen uk pinkjlich toop, om Jehova auntobäden un to deenen. Toom seenen, woo de Toopkomes sent, kjikjt daut VIDEO. Dan beseet junt daut Bilt von een Toopkomen un got toop de Froagen derch, waut hia aunjejäft sent.
-
Waut es bie onse Toopkomes soo, aus Kolossa 3:16 sajcht?
-
Sachst du en daut Video ooda opp daut Bilt noch waut, waut du von de Toopkomes jleichst?
Läst 2. Korinta 9:7 un dan got toop dise Froag derch:
-
Wuarom woat bie de Toopkomes von Jehova siene Zeijen nich Jelt toopjekollakjt?
See mol met dienen Liera toop, waut en daut Toopkomen dise Wäakj derchjenomen woat.
-
Woon Poat von daut Toopkomen hieet sikj die moakhauftich un kaun die halpen?
Hast du daut jewist?
Opp jw.org kaust du die daut noseenen, wua un wanea onse Toopkomes aulawäajen oppe Welt aufjehoolen woaren.
-
Bie onse Toopkomes jeft daut Räden, Väafierungen un Videos. Jieda Toopkomen fangt met een Leet un Jebäd aun un hieet uk soo opp
-
Bie jewesse Poats kjennen de Toohiera uk Auntwuaten jäwen
-
Jieda eena kaun doa hankomen – de Befriede, de Onbefriede, de Elre un uk Kjinja
-
Bie onse Toopkomes brukt nuscht betolt. Jehova siene Zeijen froagen kjeenem no Jelt
5. Eena mott sikj aunstrenjen toom no de Toopkomes wanken
Denkj mol aun Jesus un siene Elren un sien Jeschwista. Wan dee jieda Joa von Nazaret no Jerusalem nom Tempel jinjen, musten dee soo bie 100 Kilomeeta (60 Miel) boajet Launt äwagonen. Läst Lukas 2:39-42 un dan got toop dise Froagen derch:
-
Jleefst du, daut dee sikj musten aunstrenjen, om dise Reis no Jerusalem to moaken?
-
Wuarom motst du die veleicht aunstrenjen toom no de Toopkomes wanken?
-
Jleefst du, daut sikj daut loont? Wuarom?
No de Schreft no es daut een wichtjet Poat von onsen Gottesdeenst, daut wie ons met aundre vesaumlen sellen. Läst Hebräa 10:24-25 un dan got toop dise Froag derch:
-
Wuarom sell wie pinkjlich no de Vesaumlungen wanken?
WAUT EENJE SAJEN: “Eena brukt sikj goanich met aundre vesaumlen. Daut rieekjt goot too, wan eena tus de Bibel läst.”
-
Woon Varsch ooda woone Jeschicht ut de Schreft wiest, woo Jehova doaräwa denkjt?
KAPITEL TOOPJEFOT
No de Toopkomes wanken woat die halpen, mea äwa Jehova to lieren un noch een jratra Frint met am to woaren un am met aundre toop to deenen.
Waut hast du jelieet?
-
Wuarom well Jehova haben, daut wie ons vesaumlen sellen?
-
Waut woascht du bie Jehova siene Zeijen äare Toopkomes lieren?
-
Woo kaun die daut noch togood komen, wan du bie de Toopkomes best?
MEA NOSIEEKJEN
Woachst du die daut meist nich, no de Toopkomes to wanken? Kjikj mol, woo een Maun, waut daut krakjt soo jinkj, de Toopkomes aunfunk to jleichen.
Kjikj mol, woo een junga Maun de Toopkomes jleicht un waut hee deed, daut hee kunn doa sennen.
See mol, waut aundre sajen äwa de Toopkomes.
“Loont sikj daut, nom Vesaumlungshus von Jehova siene Zeijen to wanken?” (Artikjel opp jw.org)
Läs von eenen Maun, waut een schlajchtet Läwen fieed un sea hunjsch wia. Kjikj, woo hee sikj endad, aus hee no een Toopkomen von Jehova siene Zeijen wankt.
“Ekj haud emma mienen Rewolwa met” (De Woaktorm, 1. Juli 2014)
Veleicht jleichst du uk dit
WAUT FOAKEN JEFROACHT WOAT
Woo es een Bibelstudium met Jehova siene Zeijen?
Wan Jehova siene Zeijen emsonst met die de Bibel studieren, dan kaust du soone Bibel brucken, aus du west. Doa kaun diene gaunze Famielje met bie sennen un uk Frind, wan du dee enloden west.
