¿Ko kī atu ꞌā e te taŋata haka ꞌite o ruŋa o Iehoha mo vari ōꞌou ki te rāua piri? ¿I tuꞌu rō koe? Pēaha e haꞌamā rō ꞌā koe mo vari atu ki ira. Koiꞌite ko manaꞌu ꞌā koe, ¿he aha te rāua meꞌe aŋa ꞌi ira? ¿ꞌO te aha he meꞌe nui-nui mo rāua te rāua piri? ¿ꞌO te aha a au ana oho ki te rāua piri? Hai hāpī nei he aŋi-aŋi koe, pē hē te piri e hāꞌūꞌū atu ena mo ꞌata hāhine koe ki te ꞌAtua ꞌe he aha te hauhaꞌa ka ravaꞌa ena mo vari ōꞌou ki ira.

1. ¿ꞌO te aha te taŋata haka ꞌite o ruŋa o Iehoha e taka-taka ena ꞌi te rāua piri?

E tahi o te ŋā taŋata pāpaꞌi era i te Pipiria i kī rō ꞌi ruŋa i te puka era o Salmo, ꞌo te aha he meꞌe nui-nui mo taka-taka mo piri, pē nei e kī era: “ꞌI muri i te nūnaꞌa taŋata nui-nui a au ka haꞌamuri nei ki a Iehoha” (Salmo 26:12). Pa he hora era o muꞌa ꞌā, te taŋata haka ꞌite o ruŋa o Iehoha ꞌi ꞌaŋanīrā, he koa nō te meꞌe ŋaroꞌa e piri ena ananake. Paurō te tāpati ꞌi te henua taꞌatoꞌa e piri ena ananake mo haꞌamuri, mo hīmene ꞌe mo pure ki te ꞌAtua. Pē ira ꞌā, ꞌi roto i te matahiti e ai rō ꞌana te mahana e piri ena ananake ꞌi te piri nui-nui.

2. ¿He aha taꞌa meꞌe ka hāpī ena ꞌi te mātou piri?

Taꞌatoꞌa meꞌe hāpī ena ꞌi roto i te mātou kona piri, mai ruŋa i te Vānaŋa o te ꞌAtua e toꞌo ena ꞌe he “haka aŋi-aŋi riva-riva i te haꞌaauraꞌa” o te vānaŋa toꞌo era mai ruŋa (ka taiꞌo Nehemías 8:8). Mo vari atu ōꞌou ki te mātou kona piri, he ꞌata ꞌite ꞌe he ꞌata aŋi-aŋi o ruŋa o Iehoha ꞌe o ruŋa i tōꞌona huru haka tere. Ka aŋi-aŋi ka oho ena i te nui-nui o te haŋa o Iehoha ki a koe, he ꞌata pohe koe mo riro he repahoa ōꞌona. Pē ira ꞌā, he aŋi-aŋi koe te ara mo haꞌere riva-riva ōꞌou ꞌe mo koa mau ōꞌou (Isaías 48:17, 18).

3. ¿He aha te meꞌe riva-riva ka ravaꞌa ena e koe mo piri ki te nuꞌu o ira?

A Iehoha e kī rō mai ꞌā “e uꞌi tātou i te rāveꞌa mo hāꞌūꞌū ki a tātou ꞌā mo ꞌata pūai o te haŋa ꞌi roto i a tātou i te taina ꞌe mo aŋa i te meꞌe riva-riva. ꞌIna ko taꞌe haka taka-taka tātou mo haꞌamuri ki te ꞌAtua” (ꞌEvereo 10:24, 25). ꞌI roto i te mātou piri he māhani koe ki te nuꞌu e haŋa rō ꞌana ꞌi roto i a rāua; ꞌe pē koe ꞌā, ko haŋa ꞌā mo ꞌata aŋi-aŋi o ruŋa i te ꞌAtua. Pē ira ꞌā he haka roŋo koe i te vānaŋa toꞌo mai ruŋa i te Pipiria mo haka haŋu atu mo koa ōꞌou (ka taiꞌo Rōmano 1:11, 12). He riva takoꞌa koe mo vānaŋa ki te nuꞌu taureꞌa-reꞌa ꞌe ki te nuꞌu hāipo-ipo, mo aŋi-aŋi he aha te rāua meꞌe aŋa mo koa mo oho nō, nō atu te ꞌati mo piri. ꞌO te ŋā meꞌe riva-riva taꞌatoꞌa e ravaꞌa ena e tātou ꞌi te piri, a Iehoha e taꞌe haŋa ena mo haka rē tātou te piri te oho.

 MO MAꞌA TUꞌU ꞌITE

4. Te piri o te taŋata haka ꞌite o ruŋa o Iehoha

ꞌI te taꞌu era o Ietū e piri rō ꞌā tāꞌana nūnaꞌa mo haꞌamuri ki a Iehoha (Rōmano 16:3-5). Ka taiꞌo Kōrosa 3:16 ꞌe ꞌai ka vānaŋa rō kōrua o ruŋa i te meꞌe nei:

• ¿Pē hē te nūnaꞌa o te taꞌu era o Ietū e haꞌamuri era ki a Iehoha?

1. ꞌI te mātou piri e tātara rō ꞌā ꞌe e haka takeꞌa rō ꞌana i te vīdeo ꞌe e hāpī takoꞌa rō mai ꞌā pē hē ana haka ꞌite i te parautiꞌa ki tētahi. Te mātou piri e haꞌamata ena ꞌe e oti ena hai hīmene ꞌe hai pure.

2. ꞌI roto i te mātou piri takoꞌa, e ai rō ꞌā te hora e riva nō te taŋata mo kī i te rāua manaꞌu o ruŋa i te meꞌe e hāpī era ꞌi rā piri.

3.   Taꞌatoꞌa nō taŋata e riva nō mo oho ki te piri, mai te korohuꞌa ki te ŋā poki.

4. Mo vari atu ōꞌou ki te kona piri o te taŋata haka ꞌite o ruŋa o Iehoha ꞌina e tahi meꞌe ꞌāꞌau mo ꞌauhau ꞌe ꞌina e ko no-noꞌi atu ki te moni.

5. E ai rō ꞌā te meꞌe ꞌāꞌau mo aŋa mo vari ki te kona piri

• ¿ꞌO te aha tātou ana taꞌe haka rē te piri te oho?

 TE MEꞌE MO AŊI-AŊI O RUŊA I TE HĀPĪ NEI

Ka vari ena koe ki te piri he ꞌata aŋi-aŋi koe o ruŋa o Iehoha, he hio-hio kōrua pa he repahoa ꞌe he riva koe mo haꞌamuri ki a ia ꞌi muri i tāꞌana nūnaꞌa.

Mo taꞌe rehu

• ¿ꞌO te aha a Iehoha e haŋa ena mo taka-taka mo piri o tātou ki tāꞌana nūnaꞌa?

• ¿He aha taꞌa meꞌe ka hāpī ena ꞌi te piri o te taŋata haka ꞌite o ruŋa o Iehoha?

• ¿E ai haka ꞌou rō ꞌā te hauhaꞌa mo vari ōꞌou ki te piri?