Sanas vroiechdata ca iech întrunirea le Martorenghi le Iehovasche? Dacă ci sanas, daștil-pe că si tuche lajiav te jias i dintuni data. Daștil-pe că pușes-tu: „Sar si ca le întruniri? Sostar sile importanto? Sostar trebulas te jiav ca le întruniri?”. Ande cadai lecția, va avela te sichios sar le întruniri daștin te ajutin-tu te pașios le Devlestar hai sar daștin te ajutin-tu ande chi viața.

1. Sostar le Martori le Iehovasche chiden-pe ca le întruniri?

Iech scriitoro la Bibliaco phendea savo si o mai baro motivo sostar trebul te încăras le întruniri: „Va avela te așarav le Iehovas andi bari congregația”. (Psalmo 26:12) Anda le Martori le Iehovasche si iech bari bucuria te aven ande iech than ca le întruniri. Pe sea i phuv, von jian ca le întruniri ande fiesavo curco caște așaren le Devles, te ghilaban hai te manghen-pe lesche. Mai butivar po bărș, von încăren vi întruniri mai bare caște anen închinarea le Devlesche.

2. So va avela te sichios ca amare întruniri?

Ca amare întruniri folosisaras o Cuvânto le Devlesco hai ‘sicavas claro sar trebul hachiardo’. (Citisaren Neemia 8:8.) Dacă aves vi tu, va avela te sichios vi mai but șucar buchia anda o Iehova. Cana hachiares mai mișto ce cuci san ande lesche iacha, va avela te pașios vi mai but lestar. Mai but, va avela te diches sar daștil te ajutil-tu o Iehova te avel-tu iech viața șucar. (Isaia 48:17, 18)

3. So miștimata va avena-tu cana aves ca le întruniri hai des duma le manușența cothar?

O Iehova phenel amenghe „te las sama iech averestar caște îndemnosaras-ame ca iubirea hai buchiande lașe hai te na mechas amari întrunirea”. (Evrei 10:24, 25) Ca amare întruniri va avela te prinjianes manușa cai iubin-pe ciaces iech averes hai camen te sichion mai but buchia anda o Del, cadea sar vi tu cames. Va avela te diches sar zuriaren-pe iech averes prin so phenen andai Biblia. (Citisaren Romani 1:11, 12.) Va daștia te des duma mai bute manușența: phure, tărne, murșa hai jiuvlea, cai sile fericime chiar dacă nachen prin pharimata. O Iehova camel te jias ca le întruniri de fiesavi data, caște aven-ame sa cadal miștimata, hai vi mai but.

 HACHIAR MAI MIȘTO

4. Le întruniri le Martorenghe le Iehovasche

Ando iechto secolo, le creștini chidenas-pe ande iech than sea o timpo, caște anen închinarea le Iehovasche. (Romani 16:3-5) Citisaren Coloseni 3:16 hai pala codoia den duma:

• Sar anenas închinarea le Iehovasche le dintune creștini?

1. Ca amare întruniri încăren-pe cuvântări, demonstrații hai dichas materialea video. Co începuto hai co sfârșito iecha întrunireache ghilabas iech ghili hai mangas-ame le Devlesche

2. Ca unele părți anda o programo, le manușa andai sala daștin te den răspunsuri

3.   Oricon silo mișto primime– familii, manușa corcore, phure hai șiave

4. Ca le întruniri le Martorenghe le Iehovasche o udar si pâtărdo hai ci chiden-pe love

5. Caște jias ca le întruniri trebul te des chi zor

• Sostar trebul te jias de fiesavi data ca le întruniri?

 SO SICHILEAM

Dacă jias ca le întruniri, prinjianes mai mișto le Iehovas, zuriares chio amalimos leia hai anes lesche închinarea averența.

So dichleam

• Sostar phenel amenghe o Iehova te jias ca le întruniri?

• So va avela te sichios ca le întruniri le Martorenghe le Iehovasche?

• So aver miștimata pachias că va anena tuche le întruniri?