WOTO 10
Un wini joo feni te i nango a dee komakandi u dee Jehovah Kotoigi?
De bi kai i wan daka kaa fii go a wan komakandi u dee Jehovah Kotoigi ö? Ee ja go a wan u dee komakandi u dee Jehovah Kotoigi jeti, nöö kandë joo ta fëëë pikisö te joo go di fosu pasi. Kandë i ta hakisi iseei taa: ’Andi de ta du a dee komakandi? Faandi mbei dee komakandi dë fanöudu? Faandi mbei mi musu go a dee komakandi?’ A di woto aki joo lei faandi mbei di ko di joo ta ko makandi ku wotowan sa mbei i ku Gadu ko dë mati, söseei joo si un wini joo feni.
1. Andi da di möön fanöudu soni mbei u nango a dee komakandi?
Luku andi wan Bëibel sikifima bi taki faandi mbei a dë fanöudu u ta ko makandi ku wotowan. A bi taa: „Mi o gafa Jehovah te mi dë a hia sëmbë dendu dee ko makandi a wan kamian” (Psalöm 26:12). Sö nöö dee Jehovah Kotoigi ta piizii te de ko makandi. A hii di goonliba de ta ko makandi hiniwan wiki u gafa Gadu, u kanda, söseei u begi. Wantu pasi a wan jaa de ta abi gaan komakandi tu, ka möön hia sëmbë ta ko makandi u dini Gadu.
2. Andi joo lei a dee komakandi fuu?
A dee komakandi de ta puu di Wöutu u Gadu da u fuu sa fusutan ën gbelingbelin. (Lesi Nehemia 8:8.) Te joo ko a dee komakandi, nöö joo lei soni u Jehovah, söseei joo ko sabi dee fasi fëën. Te i ko sabi unfa a lobi i tjika, nöö i ku ën o ko dë mati. Joo ko sabi tu taa a sa heepi i fii ko abi wan möön bunu libi.—Jesaaja 48:17, 18.
3. Unfa dee sëmbë dee joo miti a dee komakandi o heepi i?
Jehovah ta piki u taa u musu ’buta mëni a di fa u sa du heepi useei fuu libi bunu ta lobi useei makandi. Wa musu disa u ta miti makandi.’ (Hebelejën 10:24, 25) A dee komakandi fuu joo miti woto sëmbë di ta booko de hedi ku wotowan, söseei di kë sabi möön soni u Gadu leti kuma i. Joo jei de ta taki soni u Bëibel di ta da sëmbë taanga. (Lesi Loomë 1:11, 12.) Joo miti sëmbë tu di tööu ku di an tööu, nöö joo si taa de ta dë waiwai hii fa de abi bookohedi. Disi da so u dee soni di mbei Jehovah kë fuu ta ko makandi hiniwan juu!
WOTO SONI DI I SA LEI
Boo luku andi de ta du a dee komakandi u dee Jehovah Kotoigi, söseei boo luku faandi mbei a dë fanöudu fii nango a dee komakandi aki.
4. Dee komakandi u dee Jehovah Kotoigi
Na awooten, dee Keesitu sëmbë bi ta ko makandi hiniwan juu u dini Jehovah (Loomë 16:3-5). Lesi Kolosën 3:16, nöö piki di hakisi aki:
-
Unfa dee fesiten Keesitu sëmbë bi ta dini Jehovah?
A di ten aki dee Kotoigi ta komakandi hiniwan juu u dini Gadu tu. Ee i kë si andi de ta du a dee komakandi nöö, pëë di FËLÖN. Baka di dë, luku di peentje u wan komakandi, nöö piki dee hakisi aki.
-
Un soni i si ta pasa a dee Könuköndë zali, di ta kai ku di soni di u lesi a Kolosën 3:16?
-
Un woto soni i bi si a di fëlön nasö di peentje di ta kai ku i?
Lesi 2 Kolenti 9:7, nöö piki di hakisi aki:
-
Faandi mbei de an ta pii möni a sëmbë a dee komakandi u dee Jehovah Kotoigi?
I ku di sëmbë di ta lei i soni u Bëibel sa luku andi woo lei a wan u dee komakandi di ta ko.
-
Un pisi u di komakandi i möön lobi?
I bi sabi di soni aki ö?
A jw.org, i sa feni naasë ku na un ten dee komakandi ta hoi a hii së u goonliba.
-
A dee komakandi fuu de ta hoi taki, demo, söseei u ta luku fëlön. Dee komakandi fuu ta bigi ku wan kanda ku begi, nöö de ta kaba ku wan kanda ku begi
-
A so pisi u dee komakandi dee haikama sa ta da piki
-
Hii sëmbë sa ko a dee komakandi, sëmbë u wan wosudendu, sëmbë di an tööu, sëmbë di ko gaandi kaa ku miii seei tu
-
An dë fii paka u ko a dee komakandi. Dee Jehovah Kotoigi an ta pii möni a sëmbë
5. I musu ta mbei möiti fii nango a dee komakandi
Luku di woto u dee sëmbë u Jesosi. Te de bi nango a wan u dee komakandi di de bi ta hoi hiniwan jaa, nöö de bi musu ta waka sömëni daka longi ta pasa a kuun kamian u kumutu a Nazalëti go a Jelusalen. Lesi Lukasi 2:39-42, nöö piki dee hakisi aki:
-
I si kuma a bi dë wan kösökösö soni u waka go a Jelusalen u?
-
Andi da so soni di sa mbei a taanga da i u go a dee komakandi, nöö andi i sa du u dee soni dë an tapa i?
-
I si kuma a dë fanöudu fii go a dee komakandi ö? Faandi mbei i taki sö?
Di Bëibel ta taki taa a dë fanöudu fuu ta ko makandi u dini Gadu. Lesi Hebelejën 10:24, 25, nöö piki di hakisi aki:
-
Faandi mbei u musu nango hii juu a dee komakandi?
SO SËMBË TA TAKI TAA: „An dë fanöudu fii ta ko makandi ku wotowan. A tjika kaa ee i ta lei soni u Bëibel a i pisi.”
-
Un tëkisi nasö un woto a Bëibel ta lei u andi Jehovah kë te a nama ku dee komakandi?
Andi i lei?
Te i nango a dee komakandi, nöö a o heepi i fii ko sabi möön soni u Jehovah, a o heepi i fii ku ën sa ko dë möön gaan mati, söseei joo sa dini ën makandi ku wotowan.
Andi i bi o piki?
-
Faandi mbei Jehovah ta da u taanga fuu ta ko makandi?
-
Andi joo lei a dee komakandi u dee Jehovah Kotoigi?
-
Un woto wini i sa feni te i nango a dee komakandi?
WOTO SONI DI I SA LUKU
Ee i ta fëëë u go a wan komakandi, nöö luku unfa wan womi di bi ta fii di wan seei fasi bi ko lobi dee komakandi.
Luku di fëlön aki u si unfa wan njönku kijoo bi ta fii bunu seei te a bi nango a dee komakandi, söseei luku andi a bi du faa bi sa nango a de hii juu.
Lesi di woto aki u si unfa woto sëmbë ta fii te de nango a dee komakandi.
„Fu san ede mi ben o go na den komakandra fu Yehovah Kotoigi?” (Woto a di website fuu)
Lesi di woto aki u si unfa wan hogiduma bi tooka libi baka di a bi go a wan u dee komakandi u dee Jehovah Kotoigi.
„Noiti mi ben e waka sondro mi gon” (A Waktitoren, 1 u baimatu-liba 2014)