AISISIAET NA 10

Epone bo Ani Epedoriata Airiamununeta Nuka Ajenak Luka Yawe Aingarakin Ijo?

KOBOLIAK

Inyaraunitere kereka jo airiamununeta nuka Ajenak Luka Yawe? Arai mam ber jo ilositor, aticepak ikuriana jo ajaun airiamununeta ngun kapak nasodit. Ipedori ijo aomoom ebe: ‘Anyoika bo nuiswamasi kotoma airiamununeta kangun? Inyoin bo ajokisikec? Kanuinyo ibusakinitor eong ajaun airiamununeta ngun?’ Kaisisiaet kana, ijenuni ijo epone loepedoria airiamunun kaluce aingarakin ijo aimedaun ka aikunyakin neejai Edeke.

1. Ani bo akirot naepol kakere naibusakinitor oni airiamunun nepepe?

Koany epone loabu ewadikan Ebaibuli itodunia akirot naepol kakere naibusakinitor oni airiamunun nepepe: “Eturenenei EJAKAIT kotoma okodeta.” (Isabulin 26:12) Kwape kwangin da, edumununete Ajenak Luka Yawe ailel naepol kotoma airiamunun nepepe. Anatar akwap kere, iriamununos kesi kangolisabiiti kanu aiturit Edeke, ayoere, ka ailip. Atenak adis kangolikaru, ejaununos kesi toma airiamununeta nuepolok nuka aima Edeke.

2. Anyoika bo nuibuni jo aisisiaun kotoma airiamununetakosi?

Kotoma airiamununeta, isisianakinio Akirot Naka Edeke, ido itetemio jokan ka aitejenun “apolou.” (Kosiom Nekemia 8:8.) Ijaun jo toma airiamununeta, isisiauni jo nuikamunitos Yawe ka iponesioke. Nainyikokinia jo ajenun nuipu nuikamunitos epone loeminar ngesi ijo, iyatakini jo aikunyakin neejai ngesi. Ibuni bobo jo aisisiaun epone loingarakinia ngesi jo adumun alosikinet kotoma aijar.—Isaia 48:17, 18.

3. Epone bo ani imedaunia jo kaneejaas luce kotoma airiamununeta?

Icorakinit Yawe oni ‘aisinyikonokin bonik ka bonik amin ka aswam nuejokuka, kenyeis apalun atukonokin nepepe.’ (Iburanian 10:24, 25) Kotoma airiamununetakosi, idumuni ijo itunga luejaas kamin nakabeit ido kwape kajo, eminasi kesi aisisia nuikamunitos Edeke. Ipupuni jo kesi inerasi akiro nuesisiautu kotoma Obaibuli ido nuisinyikokinete. (Kosiom Iromayon 1:11, 12.) Ipedori bobo jo ainerakin ka luapedosi atitingikin atiokisio nuetereikina ngul lumam edukokina ka luedukokina da. Nu kesi ace kotoma akiro nuekotor Yawe oni akokakinit airiamunun nepepe!

KISISIAU NUIPU

Kisisiau nuiswamasi kotoma airiamununeta nuka Ajenak Luka Yawe, ido kanuinyo ibusakinitor jo aswam kagogong ajaunun airiamununeta ngun.

4. Airiamununeta nuka Ajenak Luka Yawe

Kotoma acaasa nasodit, atapit Ikristayon airiamunun nepepe aima Yawe. (Iromayon 16:3-5) Kosiom Ikolosain 3:16, kosodete aimor aingiset nata:

Epone bo ani amaiata Ikristayon lukolo sek Yawe?

Lolo, iriamununos Ajenak Luka Yawe nepepe kotoma aiboisiokec nuka aima nuenyaritai Kingdom Hall. Koany epone loejaatar airiamununetakec, koboliak EBIDIO. Ido koany aputo naitodunit airiamununeta nuka atukot kosodete aimor aingiseta nuetupakinete.

EBIDIO: Anyoika bo Nuiswamasi Kokingdom Hall? (2:12)

Ani bo aputonoro naejai akiro nuisiom jo kotoma Ikolosain 3:16 keda nuiswamasi kotoma Kingdom Hall?
Iwanyunit kereka bobo jo kobidio arai bo kotoma aput, icebore yeneminakinit ijo?

Kosiom 2 Ikorinton 9:7, kosodete aimor aingiset nata:

Kanuinyo mam itelemere ikapun kotoma airiamununeta nuka Ajenak Luka Yawe?

Irereosi nepepe keda esisianakinanikon, akiro nuebeit aisisia kotoma airiamun adiope naka esabiiti kalo.

Ani bo atutubet nakotoma airiamununeta kanu naiwomit ijo ebe ebuni aminakin ijo noi?

Ijeni kereka jo?

Ipedori ijo ajenun kojw.org, iwori ido ai bo ejaununos airiamununeta anatar akwap kere.

Airiamununetakosi imoriaritosi ineresinei, aitetemonoreta, keda ibidion. Egeario kangetakin airiamununeta keda ekosio ka ailip
Kotoma atutubena ace nuka ainapeta kangun, einanakinete itunga abongonokinetakec
Isukunyunitai itunga kere—lumam edukokina, luemojongito, idwe, ka ikalia
Mam itelemio ikapun. Mam Ajenak Luka Yawe itelemete itunga ikapun karaida airimitor adita

5. Kipuda aswam kagogong kanu alosenen airiamununeta

Koomoom ber ijo nuikamunitos aanyunet naka ekale loalomunitor Yesu. Kanu ajaun airiamun nakangolikaru, arai kesi alosit amairon nuedolete 60 kitoritos orongan anyoun koNasaret kitoni Yerusalem. Kosiom Luka 2:39-42, kosodete aimor aingiseta nuta:

Iwomit kereka jo ebe alosit Yerusalem akoto itunganan aswam kagogong?
Kanuinyo aticepak ibusakinitor ijo aswam kagogong alosenen airiamununeta?
Iwomit kereka jo ebe ejok ajaunun airiamununeta karaida aticepak etiono aswam ngun? Kanuinyo?

Ebala Ebaibuli ebe eraasi nuepolok noi oni airiamunun nepepe kanu aima Edeke. Kosiom Iburanian 10:24, 25, kosodete aimor aingiset nata:

Kanuinyo ibusakinitor oni ajaunun airiamununeta?

EBAKASI ICETUNGA EBE: “Mam ibusakinit jo airiamunun kaluce. Ipedori ijo ilopet bon aisiom Ebaibulikon ore.”

Ani bo ekokoro arai bo aanyunet naejai toma Obaibuli naitodunit nuekoto Yawe?

NUIDAU AISISIAUN

Ajaunun airiamununeta ingarakini jo aisisiaun nuipu nuikamunitos Yawe, itogogongi eidicanekon keda Edeke, ido ingarakini jo aima Edeke kimorikikina kaluce.