LĒSONI 10
ʻE Lava Fēfē ke ʻAonga Kiate Koe ʻa e Fakataha ʻa e Kau Fakamoʻoni ʻa Sihová?
Kuo fakaafeʻi koe ki ha fakataha ʻa e Kau Fakamoʻoni ʻa Sihová? Kapau kuo teʻeki ai ke ke maʻu ʻa e fakatahá, te ke ongoʻi tailiili nai ke maʻu ia ʻi he ʻuluaki taimí. Te ke fifili nai: ‘Ko e hā ʻoku fai ʻi he ngaahi fakataha ko ení? Ko e hā ʻoku mahuʻinga aí? Ko e hā ʻoku totonu ai ke u maʻu iá?’ ʻI he lēsoni ko ení, te ke ako ai ki he founga ʻe lava ke ʻai ai koe ʻe he fakataha mo e niʻihi kehé ke ke ʻunuʻunu ofi ange ki he ʻOtuá pea tokoniʻi fakafoʻituitui ai koé.
1. Ko e hā ʻa e ʻuhinga mahuʻinga taha ki he fakatahataha fakatahá?
Fakatokangaʻi ʻa e anga hono fakalea ʻe ha tokotaha-tohi Tohi Tapu ʻa e ʻuhinga mahuʻinga taha ke fakatahataha ai mo e niʻihi kehé: “ʻI he fuʻu fakatahaʻangá, te u fakahīkihikiʻi ai ʻa Sihova.” (Saame 26:12) Pehē foki, ko e Kau Fakamoʻoni ʻa Sihová ʻoku nau fiefia lahi ʻi he fakatahataha fakatahá. ʻI he māmaní takatakai, ʻoku nau fakatahataha ʻi he uike taki taha ke fakahīkihikiʻi ʻa e ʻOtuá, ke hiva mo lotu. ʻOku nau toe maʻu foki mo e ngaahi fakatahataha lalahi ange ke lotu ai, ʻi ha ngaahi taimi ʻi he taʻu taki taha.
2. Ko e hā te ke ako ʻi heʻemau ngaahi fakatahá?
ʻI he ngaahi fakatahá, ʻoku mau tokangataha ki he Folofola ʻa e ʻOtuá, “ʻo fakamatalaʻi māʻalaʻala ia mo fakahaaʻi ʻa hono ʻuhingá.” (Lau ʻa e Nehemaia 8:8.) ʻI hono maʻu iá, te ke ako ai fekauʻaki mo Sihova mo hono ngaahi ʻulungaanga fakaofó. ʻI hoʻo hoko ʻo ʻilo lahi ange fekauʻaki mo ʻene ʻofa kiate koé, te ke ʻunuʻunu ofi ange ai kiate ia. Te ke toe hoko foki ai ʻo ʻiloʻi ʻa e founga ʻe lava ke ne tokoniʻi ai koe ke ke maʻu ha moʻui fakafiemālié.—ʻAisea 48:17, 18.
3. ʻE lava fēfē ke ke maʻu ʻaonga ʻi he feohi mo e niʻihi kehé ʻi heʻemau ngaahi fakatahá?
ʻOku fakahinohinoʻi kitautolu ʻe Sihova ke tau “fetokangaʻaki koeʻuhi ke fakaʻaiʻai ai kitautolu ki he ʻofá mo e ngaahi ngāue leleí, ʻo ʻoua ʻe liʻaki ʻa ʻetau fakataha fakatahatahá.” (Hepelū 10:24, 25) ʻI heʻemau ngaahi fakatahá, te ke fetaulaki ai mo e kakai ʻoku nau fetokangaʻaki moʻoni pea ʻi he hangē ko koé, ʻoku nau mahuʻingaʻia ke ako lahi ange fekauʻaki mo e ʻOtuá. Te ke fanongo ai ki heʻenau vahevahe ʻa e ngaahi fakakaukau fakalototoʻa mei he Tohi Tapú. (Lau ʻa e Loma 1:11, 12.) Te ke toe malava foki ai ʻo talanoa ki he faʻahinga ʻoku nau lolotonga fekuki lavameʻa mo e ngaahi palopalema ʻa ia ʻoku fehangahangai mo e faʻahinga teʻeki malí mo e kakai ʻosi malí. Ko e niʻihi pē eni ʻo e ngaahi ʻuhinga ʻoku loto ai ʻa Sihova ke tau fakatahataha maʻu peé!
KELI LOLOTO ANGE
Sio angé pe ʻoku fēfē ʻa e ngaahi fakataha ʻa e Kau Fakamoʻoni ʻa Sihová pea mo e ʻuhinga ʻoku tuha ai mo e feingá ke maʻu ʻa e ngaahi fakataha ko ení.
4. Ngaahi fakataha ʻa e Kau Fakamoʻoni ʻa Sihová
ʻI he ʻuluaki senitulí, naʻe fakatahataha maʻu pē ʻa e kau Kalisitiané ke lotu kia Sihova. (Loma 16:3-5) Lau ʻa e Kolose 3:16, pea lāulea leva ki he fehuʻi ko ení:
-
Naʻe anga-fēfē lotu ʻa e muʻaki kau Kalisitiané kia Sihová?
ʻI he ʻahó ni, ʻoku toe fakatahataha fakataha maʻu pē foki mo e Kau Fakamoʻoní ʻi honau ngaahi feituʻu faiʻanga lotú. Ke vakai pe ʻoku fēfē ʻa ʻenau ngaahi fakatahá, huluʻi ʻa e VITIOÓ. Sio leva ki he fakatātā ʻo ha fakataha ʻa e fakatahaʻangá, pea lāulea ki he ongo fehuʻi hokó.
-
Ko e hā ha ngaahi faitatau naʻá ke fakatokangaʻi ʻi he meʻa ʻoku fai ʻi ha Fale Fakatahaʻanga mo e meʻa naʻá ke lau ʻi he Kolose 3:16?
-
ʻI he vitioó pe ʻi he fakatātaá, naʻá ke fakatokangaʻi ha toe meʻa fekauʻaki mo e ngaahi fakatahá ʻoku fakamānako kiate koe?
Lau ʻa e 2 Kolinitō 9:7, pea lāulea leva ki he fehuʻi ko ení:
-
Ko e hā ʻoku ʻikai totongi ai hono maʻu ʻa e ngaahi fakataha ʻa e Kau Fakamoʻoni ʻa Sihová?
Sio fakataha mo hoʻo faiakó ki he meʻa ʻe fai ki ai ʻa e lāulea ʻi ha fakataha ʻi he uike ní.
-
Ko e hā ʻa e konga ʻi he fakatahá ʻokú ke pehē ʻoku fakamānako taha pe ʻaonga kiate koé?
Naʻá ke ʻiloʻi?
ʻI he jw.org, ʻe lava ke ke maʻu ai ʻa e feituʻu mo e taimi ʻoku fakahoko ai ʻa e ngaahi fakatahá takatakai ʻi he māmaní.
-
A. ʻOku kau ʻi heʻemau ngaahi fakatahá ha ngaahi malanga, fakahāhā mo e vitiō. Ko e ngaahi fakatahá ʻoku kamata mo fakaʻosiʻaki ʻa e hiva mo e lotu
-
E. Lolotonga ʻa e konga ʻe niʻihi ʻo e polokalamá, ʻoku fakaafeʻi ai ʻa e kau fanongó ke nau tali
-
F. ʻOku talitali lelei ʻa e taha kotoa—ngaahi fāmilí, faʻahinga teʻeki malí, kau taʻumotuʻá pea mo e fānaú
-
H. ʻOku taʻetotongi ʻemau ngaahi fakatahá. ʻOku ʻikai ʻeke ʻe he Kau Fakamoʻoni ʻa Sihová ha totongi hū pe fai ha tānaki paʻanga
5. ʻOku fiemaʻu ʻa e feinga ke maʻu ʻa e ngaahi fakatahá
Fakakaukau atu ki he faʻifaʻitakiʻanga ʻa e fāmili ʻo Sīsuú. Ke maʻu ha kātoanga fakataʻu, naʻe pau ke nau lue ʻi ha maile nai ʻe 60 ʻo fou atu ʻi he ngaahi feituʻu moʻungaʻia mei Nāsaleti ki Selusalema. Lau ʻa e Luke 2:39-42, pea lāulea leva ki he ngaahi fehuʻi ko ení:
-
ʻOkú ke fakakaukau pe naʻe fiemaʻu ha feinga ʻi he fononga ko eni ki Selusalemá?
-
Ko e hā ʻe fiemaʻu nai ai ke ke fai ha feinga ke maʻu ʻa e ngaahi fakatahá?
-
ʻOkú ke fakakaukau ʻoku tuha eni mo e feingá? Ko e hā hono ʻuhingá?
ʻOku pehē ʻe he Tohi Tapú ko e fakatahataha fakataha ke lotú ʻoku mātuʻaki mahuʻinga. Lau ʻa e Hepelū 10:24, 25, pea lāulea leva ki he fehuʻi ko ení:
-
Ko e hā ʻoku totonu ai ke tau maʻu maʻu pē ʻa e ngaahi fakatahá?
ʻOKU PEHĒ ʻE HE NIʻIHI: “ʻOku ʻikai fiemaʻu ia ke ke fakataha mo e niʻihi kehé. ʻOku feʻunga pē hono ako ʻa e Tohi Tapú ʻi ʻapí.”
-
Ko e hā ha konga Tohi Tapu pe faʻifaʻitakiʻanga Fakatohitapu ʻoku fakahaaʻi ai ʻa e meʻa ʻoku fiemaʻu ʻe Sihová?
FAKANOUNOU
Ko hono maʻu ʻa e ngaahi fakatahá ʻe tokoniʻi ai koe ke ako lahi ange fekauʻaki mo Sihova, ke fakaivimālohiʻi hoʻo kaumeʻa mo iá, pea ke lotu kiate ia fakataha mo e niʻihi kehé.
Fakamanatu
-
Ko e hā ʻoku fakalototoʻaʻi ai kitautolu ʻe Sihova ke tau fakatahataha fakatahá?
-
Ko e hā te ke ako ʻi he ngaahi fakataha ʻa e Kau Fakamoʻoni ʻa Sihová?
-
Ko e hā ha toe ʻaonga ʻokú ke pehē ʻe lava ke ke maʻu mei hono maʻu ʻa e ngaahi fakatahá?
AKO LAHI ANGE
Fēfē kapau ʻokú ke tailiili fekauʻaki mo hono maʻu ha fakataha? Sio angé ki he founga naʻe hoko ai ha tangata naʻá ne ongoʻi pehē ʻo saiʻia ʻaupito ʻi he ngaahi fakatahá.
Heʻikai Ke Tau Fakangaloʻi ʻa e Anga-Talitali Kakai Leleí (4:16)
Sio angé ki he founga naʻe hoko ai ha talavou ʻo saiʻia ʻi he ngaahi fakatahá pea mo e meʻa naʻá ne fai ke hokohoko atu hono maʻu iá.
Ako ki he anga ʻo e ongoʻi ʻa e niʻihi kehé fekauʻaki mo hono maʻu ʻa e ngaahi fakatahá.
“Ko e Hā ke Maʻu Ai ʻa e Ngaahi Fakataha ʻi he Fale Fakatahaʻangá?” (Kupu ʻi he uepisaití)
Vakai ki he founga naʻe liliu ai ʻa e moʻui ʻa ha mēmipa ʻo ha kau kengi anga-fakamālohi hili ʻene maʻu ha fakataha ʻa e Kau Fakamoʻoni ʻa Sihová.
“Naʻe ʻIkai Ke U ʻAlu ki ha Feituʻu ʻo Taʻetoʻo ʻEku Meʻafaná” (Toʻo mei he Ko e Taua Leʻo)
Te Ke Fie Vakai Foki ki Heni
NGAAHI FEHUʻI ʻOKU TOUTOU ʻEKE
Ko e Hā ʻa e Polokalama Ako Tohi Tapu ʻOku Fai ʻe he Kau Fakamoʻoni ʻa Sihová?
ʻI he polokalama ako fetalanoaʻaki taʻetotongi ʻa e Kau Fakamoʻoni ʻa Sihová, ʻe lava ke ke ngāueʻaki ai ha faʻahinga liliu Tohi Tapu pē. Ongoʻi tauʻatāina ke fakaafeʻi ʻa e kotoa ho fāmilí pe kaumeʻá ke kau fakataha mo koe.
