MATAUPU 10
E Aoga Pefea ki a Koe a Fakatasiga a Molimau a Ieova?
Kai ‵kami aka loa koe ke kau ki se fakatasiga a Molimau a Ieova? Kafai e seki kau eiloa ki ei, kāti ka polepole malie koe māfai ko kau atu ki ei. E mafai o mafaufau koe: ‘Ne a mea e fai i fakatasiga konei? Kaia e tāua ei? Kaia e ‵tau o kau au ki ei?’ I te mataupu tenei, ka iloa ne koe me i te ‵kau fakatasi mo nisi tino ka fai ei ke fakapilipili koe ki te Atua kae aoga foki ki a koe.
1. Se a te ‵toe pogai tāua e fai ei a fakatasiga?
Onoono la ki fakamatalaga a se tino tusitala o te Tusi Tapu ki te ‵toe pogai tāua mō maopoopoga konei: “I te fakapotopotoga lasi, ka ‵viki atu ei au ki a Ieova.” (Salamo 26:12) Kae penā foki loa a Molimau a Ieova, e fia‵fia malosi māfai ko ‵kau fakatasi. I te lalolagi kātoa e maopoopo latou i vaiaso katoa, ke ‵viki atu ki te Atua, usu pese, kae ‵talo. Kae e isi ne nai taimi i tausaga takitasi, e ‵kau atu ei latou ki maopoopoga tai ‵lasi mō tapuakiga.
2. Ne a au mea ka tauloto i omotou fakatasiga?
I fakatasiga, e ‵saga tonu matou ki te Muna a te Atua, “kae fakamatala faka‵lei atu kae fakamalamalama atu a mea i ei.” (Faitau te Neemia 8:8.) Kafai e kau koe ki ei, ka tauloto koe e uiga ki a Ieova mo ana uiga ‵gali. Kafai ko momea aka te iloa ‵lei ne koe o tena alofa, ka gasolo eiloa o pili atu koe ki a ia. Ka iloa foki ne koe a te auala ka fesoasoani atu a ia ke maua se olaga fakamalie loto.—Isaia 48:17, 18.
3. Ka aoga pefea ki a koe a te ‵kau fakatasi mo nisi tino i omotou fakatasiga?
E fakatonu mai a Ieova “ke na mafau‵fau tatou te suā tino ki te suā tino o fakama‵losi atu ke fakatau a‵lofa kae fai a mea ‵lei, ke mo a ma ‵galo sāle tatou i ‵tou fakatasiga.” (Epelu 10:24, 25) I motou fakatasiga, ka fetaui koe mo tino kolā e fakatau a‵lofa kae fia tauloto ki mea e uke atu e uiga ki te Atua, e pelā eiloa mo koe. Ka lagona ne koe olotou manatu fakamalosi loto mai te Tusi Tapu. (Faitau te Loma 1:11, 12.) Ka mafai foki o sau‵tala koe mo tino kolā ne manumalo i fakalavelave kolā e fe‵paki mo talavou mo tino a‵vaga. Konei la a nai pogai e manako a Ieova ke ‵kau fakatasi faeloa tatou!
KELI MALOSI IFO
Fai ke iloa ne koe a mea e fai i fakatasiga a Molimau a Ieova mo te aoga ke ‵kau atu ki fakatasiga konā.
4. Fakatasiga a Molimau a Ieova
I te senitenali muamua, ne maopoopo fakatasi faeloa a Kelisiano o tapuaki ki a Ieova. (Loma 16:3-5) Faitau te Kolose 3:16, ko sau‵tala ei ki te fesili tenei:
-
Ne tapuaki atu pefea ki a Ieova a Kelisiano i aso mua?
I aso nei, e maopoopo fakatasi faeloa a Molimau i olotou koga tapuaki. Ke iloa ne koe a mea e fai i fakatasiga, pei te VITIO. Ka oti, ko onoono ei ki te ata o se fakatasiga a te fakapotopotoga, ko sau‵tala ei ki fesili konei.
-
Ne a mea tai ‵pau ne lavea ne koe kolā e fai i se fale tapuaki mo mea ne faitau ne koe i te Kolose 3:16?
-
I te vitio io me ko te ata, e a, e isi aka foki se mea e uiga ki te fakatasiga e gali ki a koe?
Faitau te 2 Kolinito 9:7, ko sau‵tala ei ki te fesili tenei:
-
Kaia e se ‵togi ei a fakatasiga a Molimau a Ieova?
Ke onoono fakatasi mo tou faiakoga ki mea ka sau‵tala ki ei i se fakatasiga o te vaiaso nei.
-
Se a te ‵toe vaega gali io me aoga ki a koe i te fakatasiga?
E iloa ne koe?
I te jw.org, ka maua ne koe a te koga mo te taimi e fai ei a fakatasiga i te lalolagi kātoa.
-
E aofia i omotou fakatasiga a lāuga, fakaasiga mo vitio. E kamata kae fakaoti a fakatasiga ki se pese mo se ‵talo
-
I nisi vaega o te polokalame, e ‵kami mai a tino fakalogo‵logo ke fai olotou tali
-
E mafai o kau mai so se tino—kāiga, tino seki a‵vaga, tino ma‵tua, mo tama‵liki
-
E se ‵togi omotou fakatasiga. E seai se tifa e fakateka mai ke lafo koe ki ei
5. E ‵tau o taumafai malosi ke kau ki fakatasiga
Mafaufau ki te kāiga o Iesu. Ke mafai o ‵kau latou ki se maopoopoga tāua i tausaga katoa, ne ‵tau o sa‵sale atu latou i se 60 maila i koga maugā mai Nasaleta ki Ielusalema. Faitau te Luka 2:39-42, ko sau‵tala ei ki fesili konei:
-
Se a tau faka‵tau, e mata, e ‵tau o taumafai malosi latou ke olo atu i te malaga tenei ki Ielusalema?
-
Kaia e ‵tau ei o taumafai malosi koe ke kau ki fakatasiga?
-
E mata, e aoga? Kaia?
E fai mai te Tusi Tapu me e tāua ‵ki a te ‵kau fakatasi mō tapuakiga. Faitau te Epelu 10:24, 25, ko sau‵tala ei ki te fesili tenei:
-
Kaia e ‵tau ei o ‵kau faeloa tatou ki fakatasiga?
MEA E FAI MAI NE NISI TINO: “E se manakogina ke ‵kau fakatasi koe mo nisi tino. Ko lava loa ke sukesuke ki te Tusi Tapu i te fale.”
-
Se a te tusi faitau io me se tala i te Tusi Tapu e fakaasi mai i ei a te mea e manako ki ei a Ieova?
MANATU AOGA
A te kau ki fakatasiga ka fesoasoani atu ke uke au mea e iloa e uiga ki a Ieova, ke fakamalosi aka tou lua va fakataugasoa, kae ke tapuaki atu fakatasi mo nisi tino ki a ia.
Fesili
-
Kaia e fakamalosi mai a Ieova ke ‵kau fakatasi tatou i tapuakiga?
-
Ne a au mea ka tauloto i fakatasiga a Molimau a Ieova?
-
Se a tau faka‵tau, ne a nisi mea aoga e mafai o maua mai te kau atu ki fakatasiga?
NISI FAKAMATALAGA
Kae e a māfai ko polepole koe i te kau atu ki se fakatasiga? Onoono ki se tagata telā ne maua ne ia a lagonaga penā kae ne fiafia fakamuli ki fakatasiga.
Onoono ki te auala ne fiafia ei se talavou ki fakatasiga mo ana mea ne fai ke kau faeloa ki ei.
Fai ke iloa ne koe a lagonaga o nisi tino e uiga ki te ‵kau atu ki fakatasiga.
“Kaia e ‵Tau o ‵Kau ki Fakatasiga i se Fale Tapuaki?” (Mataupu i te neti)
Onoono ki te auala ne ‵fuli ne se tagata telā ne kau atu ki se potukau masei a tena olaga mai tua o te kau atu ki se fakatasiga a Molimau a Ieova.
“Ne Seki Fano Au ki se Koga e Aunoa mo Taku Fana” (Te Faleleoleo Maluga, Iulai 1, 2014)