XCHANOBIL 10
¿Kʼuxi xuʼ skoltaot li jtsobajelkutike?
¿Mi oy ayemot junuk velta li ta stsobajel stestigotak Jeovae? Mi muʼyuke, xuʼ van chaxiʼ jutuk mi labate. Xuʼ van xi chajakʼbe abae: «¿Kʼusi tspasik li ta stsobajelike? ¿Kʼu yuʼun toj tsots skʼoplal chilik? ¿Mi persa skʼan xibat ek?». Li ta xchanobil liʼe, te chachan ti xuʼ skoltaot sventa xavamigoin Dios mi labat ta tsobajeletike xchiʼuk tskoltaot ta akuxlejal.
1. ¿Kʼu yuʼun tstsob sbaik li stestigotak Jeovae?
Jun jtsʼibajom ta Vivlia laj yalbe skʼoplal ti kʼu yuʼun tstsob sbaik li stestigotak Jeovae. Xi laj yale: «Ta jkʼupil kʼopta Jeova li ta mukʼta tsobobbaile» (Salmo 26:12). Jech oxal, xmuyubaj noʼox tstsob sbaik li stestigotak Jeovae. Ta spʼejel balumil, jujun xemana tstsob sbaik sventa chichʼik ta mukʼ Dios, jmoj tskʼejintaik xchiʼuk tspasik orasion. Jech xtok, oy jaykojuk ta jabil ti mas ep tstsob sbaike.
2. ¿Kʼusi xuʼ te xachan li ta jtsobajelkutike?
Li ta tsobajeletike, jaʼ mas chalbeik skʼoplal li Skʼop Diose. Yuʼun ‹lek jamal xchiʼuk lek tsʼakal tsjambeik smelolal› (kʼelo Neemias 8:8). Mi labat li ta jtsobajelkutike, chavojtikin mas li Jeovae xchiʼuk li stalelaltake. Mi la avaʼi ti skʼanojot tajeke, mas to me chakʼan chavamigoin. Jech xtok, li tsobajeletike tskoltaot sventa junuk noʼox avoʼonton (Isaias 48:17, 18).
3. ¿Kʼuxi xuʼ skoltaot li buchʼutik chavojtikin ta tsobajele?
Li Jeovae tskʼan ti «oyuk ta koʼonton jbatik ta jujuntal yoʼ jtijbe jba koʼontontik sventa jkʼan jbatik xchiʼuk jpastik li kʼusitik toj leke», jech xtok ti mu xkiktatik ti ta jtsob jbatike (Ebreos 10:24, 25). Li ta jtsobajelkutike, xuʼ te xavojtikin krixchanoetik ti skʼanoj sbaik ta melele xchiʼuk ti tskʼan chojtikinik li Diose jech kʼuchaʼal li voʼot eke. Skotol li kʼusi chichʼ alel teʼe naka ta Vivlia lokʼem xchiʼuk xuʼ spatbot avoʼonton (kʼelo Romanos 1:11, 12). Xuʼ te xavojtikin kerem tsebetik xchiʼuk krixchanoetik ti nupunemike, ti xmuyubajik noʼox akʼo mi oy svokolike. Taje jaʼ noʼox junantik srasonaltak ti kʼu yuʼun tskʼan Jeova ti jtsob jbatike.
JCHANTIK TO BATEL MAS
Jkʼeltik kʼu yelan tspas stsobajelik li stestigotak Jeovae xchiʼuk ti kʼu yuʼun chatabe sbalil mi labate.
4. Li tsobajel tspasik li stestigotak Jeovae
Li jchʼunolajeletik ta mas voʼnee, nopem xaʼi tstsob sbaik sventa xichʼik ta mukʼ li Jeovae (Romanos 16:3-5). Kʼelik Kolosenses 3:16 xchiʼuk albeik skʼoplal li sjakʼobil liʼe:
-
¿Kʼu yelan laj yichʼik ta mukʼ Jeova li jchʼunolajeletik ta mas voʼnee?
Li avi eke, jaʼ jech tstsob sbaik li stestigotak Jeovae. Sventa xanaʼ kʼu yelan chjelav li stsobajelike, kʼelik li VIDEOE. Laje kʼelik li lokʼol ti chakʼ ta ilel kʼu yelan ch-echʼ li stsobajelike xchiʼuk albeik skʼoplal li sjakʼobiltak liʼe:
-
Li kʼusi chal Kolosenses 3:16, ¿mi jaʼ jech tspas ta salonik li stestigotak Jeovae? ¿Kʼusitik tspasik tey?
-
Kʼalal la akʼel li video o li lokʼole, ¿kʼusi lek la avil ti kʼu yelan chketʼes li jtsobajelkutike?
Kʼelik 2 Korintios 9:7 xchiʼuk albeik skʼoplal li sjakʼobil liʼe:
-
¿Kʼu yuʼun muʼyuk tskʼanik takʼin li ta stsobajel stestigotak Jeovae?
Koʼol xa kʼelik xchiʼuk li buchʼu chakʼbot chanubtasel li kʼusi chichʼ chanel ta junuk tsobajel li ta xemana chtale.
-
¿Kʼusi lek laj avil li kʼusi chichʼ chanel ta jtsobajelkutike?
¿Mi chak’an to chachan mas?
Li ta jw.org, xuʼ te xanaʼ bakʼin xchiʼuk bu tstsob sbaik li stestigotak Jeova ta spʼejel balumile.
-
Li ta jtsobajelkutike, chjelav mantaletik, chjelav ermanoetik ti oy kʼusi chakʼik ta ilele xchiʼuk videoetik. Chlik xchiʼuk chlaj ta jun kʼejoj xchiʼuk ta jun orasion.
-
Oy chjelav mantaletik xtok ti bu xuʼ xakʼ sloʼilik li buchʼutik te chkʼotike.
-
Lek chʼambil skotolik ta bikʼit ta mukʼ.
-
Muʼyuk chichʼ kʼanel takʼin li ta jtsobajelkutike mi jaʼuk tojbil chij-och.
5. Sventa xijbat li ta tsobajeletike, skʼan xkakʼ kipaltik
Jnopbetik skʼoplal li yutsʼ yalal Jesuse. Te toʼox nakalik ta Nasaret xchiʼuk chkʼotik ta templo jujun jabil ta Jerusalen. Pe sventa xkʼotike, skʼan xanavik oxib kʼakʼal ta vitstikaltik. Kʼelik Lukas 2:39-42 xchiʼuk albeik skʼoplal li sjakʼobiltak liʼe:
-
¿Mi kʼun noʼox chaʼiik xanaʼ ti xbatik ta Jerusalen li yutsʼ yalal Jesuse?
-
Li voʼote, ¿kʼusi xuʼ smakot xanaʼ sventa mu xabat li ta tsobajeletike?
-
¿Mi ta van xatabe sbalil xanaʼ mi laj avakʼ persa chabat li ta tsobajeletike? ¿Kʼu yuʼun ti jech chavale?
Li Vivliae chal ti toj tsots skʼoplal ti jtsob jbatik sventa xkichʼtik ta mukʼ li Jeovae. Kʼelik Ebreos 10:24, 25 xchiʼuk albeik skʼoplal li sjakʼobil liʼe:
-
¿Kʼu yuʼun skʼan xijbatilan-o li ta tsobajeletike?
JUNANTIKE XI CHALIKE: «Mu persauk ti jtsob jba xchiʼuk yantik sventa xkichʼ ta mukʼ Diose. Jaʼ noʼox venta mi la jchan Jvivlia ta jnae».
-
¿Kʼusi teksto o loʼil ta Vivlia chakʼ ta ilel li kʼusi tskʼan Jeova ti akʼo jpastike?
¿KʼUSI LA ACHAN?
Mi labat ta tsobajeletike, chavojtikin mas li Jeovae, mas chavamigoin xchiʼuk chavichʼ ta mukʼ xchiʼuk yan krixchanoetik.
Svulesobil ta joltik
-
¿Kʼu yuʼun oy ta yoʼonton Jeova ti xijbat li ta tsobajeletike?
-
¿Kʼusitik xuʼ te xachan li ta stsobajel stestigotak Jeovae?
-
¿Kʼuxi to yan xuʼ skoltaot li tsobajeletike?
XUʼ TO XAKʼEL LIʼE
¿Mi chakʼexav chavaʼi ti xabat ta tsobajele? Oy jun vinik ti jech toʼox chaʼi sbae. Kʼelavil kʼu yuʼun la skʼupin.
Ojtikino jun kerem ti tskʼupin tajek li tsobajeletike xchiʼuk kʼelo kʼusi la spas sventa xbatilan-oe.
Kʼelavil kʼusi tsnopik yantik ta sventa li tsobajeletike.
«¿Kʼu yuʼun lek ti xijbatutik ta tsobajel ta salone?» (Xu’ te xata ta jw.org)
Kʼelavil kʼuxi jelbat-o xkuxlejal yuʼun tsobajeletik jun pandiyero ti lek snaʼ saʼ kʼope.
Xuʼ van chakʼupin skʼelel xtok liʼe
LI KʼUSITIK TSJAKʼILANIKE
¿Kʼu yelan li chanubtasel ta Vivlia chakʼik li stestigotak Jeovae?
Li ta matanal chanubtasel chakʼik li stestigotak Jeovae xuʼ xatunes li Vivlia oy avuʼune, xuʼ xavalbe ti xchiʼinot li avutsʼ avalale xchiʼuk avamigotak.
