UYONO 10
Mavọ Yen Emẹvwa rẹ Iseri ri Jihova sa Vwọ Chọn Wẹ Uko?
E durhie uwe kpo emẹvwa rẹ Iseri ri Jihova dẹvure? Ọ da dianẹ wọ je ra jovwo-o, omoshọ se mu we wọ vwọ ra vwẹ obọ rẹsosuọ. Wo se roro: ‘Die yen e ruẹ vwẹ emẹvwa nana? Diesorọ e vwọ ghanre? Diesorọ o vwo fo nẹ me ra?’ Vwẹ uyono nana, wo che yono kpahen oborẹ emẹvwa nana se vwo si we kẹrẹ Ọghẹnẹ je chọn wẹ uko komobọ.
1. Diesorọ Iseri ri Jihova vwo siomakoko?
Jokaphiyọ oborẹ ohwo ọvo rọhẹ usun rẹ ihwo ri si Baibol na vwo dje oboresorọ re vwo siomakoko: “Vwẹ evun rẹ ọghwẹgbe rode na mi de bruba kẹ Ọrovwohwo.” (Une Rẹ Ejiro 26:12) Ọtiọyen Iseri ri Jihova je mrẹ aghọghọ vwevunrẹ emẹvwa rayen. Vwẹ akpọneje, ayen vwoma kudughwrẹn kudughwrẹn vwo jiri Ọghẹnẹ, so une, je nẹrhovwo. Kukpe kukpe, ayen ji kpo emẹvwa ride.
2. Die yen wo che yono vwẹ emẹvwa rẹ avwanre?
Vwevunrẹ emẹvwa na, avwanre yono Ota rẹ Ọghẹnẹ “phẹnphẹn; . . . [je] kẹ ayen ọhọ.” (Se Nehemaya 8:8.) Vwẹ emẹvwa rẹ avwanre, wo che yono kpahen Jihova vẹ iruemu rọyen. Wo vwo yono kpahen ẹguọnọ ro vwo kpahen owẹ ye, ku wo che sikẹrẹ phiyọ. Wọ cha mrẹ obo rọ sa vwọ chọn wẹ uko vwo yerin omamọ akpọ.—Aizaya 48:17, 18.
3. Mavọ yen wọ sa vwọ mrẹ erere siẹrẹ wo de kpo emẹvwa rẹ avwanre?
Jihova vuẹ avwanre nẹ e “roro obo re jeje ohwohwo oma vwẹ ẹguọnọ kugbe iruo esiri, e jẹn avwanre ghwẹ oma koko.” (Hibru 10:24, 25) Vwẹ emẹvwa rẹ avwanre, wọ cha mrẹ ihwo ri ghini vwo ẹguọnọ rẹ ohwohwo, ri ji vwo owẹnvwe rẹ ayen vwo yono kpahen Ọghẹnẹ kerẹ owẹ. Wo che nyo eta rẹ ọbọngan rẹ ayen ta vwo nẹ Baibol na cha. (Se Rom 1:11, 12.) Wọ je cha mrẹ ihwo re rọvwọnre vẹ e re je rọvwọ-ọn rẹ oma vwerhan dede nẹ ayen hirharokuẹ ebẹnbẹn sansan. Enana erọnvwọn evo re sorọ Jihova vwọ guọnọ nẹ e siomakoko kọke kọke!
HIẸ KODO
Mrẹ obo re ruẹ vwẹ emẹvwa rẹ Iseri ri Jihova vẹ oboresorọ a vwọ davwẹngba vwọ ra.
4. Emẹvwa rẹ Iseri ri Jihova
Vwẹ ẹgbukpe ujorin rẹsosuọ, Inenikristi siomakoko kọke kọke vwọ ga Jihova. (Rom 16:3-5) Se Kọlose 3:16, ovwan ta ota kpahen onọ nana:
-
Mavọ yen Inenikristi rẹsosuọ ga Jihova wan?
Nonẹna, Iseri ri Jihova je vwoma kọke kọke vwẹ asan rẹ ayen da ga ẹga. Wọ da guọnọ riẹn obo re ruẹ vwẹ emẹvwa na, Hworo IVIDIO na. Ovwan ni uhoho rẹ omẹvwa na je ta ota kpahen enọ ri nenire.
-
Idjerhe vọ yen obo re phia vwẹ Ọguan Ruvie na vwọ họhọ obo wo seri vwẹ Kọlose 3:16?
-
Vwevunrẹ ividio na yẹrẹ uhoho na, die yen kẹ wẹ omavwerhovwẹn kpahen emẹvwa na?
Se 2 Kọrẹnt 9:7, ovwan ta ota kpahen onọ nana:
-
Diesorọ emẹvwa rẹ Iseri ri Jihova vwọ dia ọphẹ?
Wẹ vẹ oyono wẹn fuẹrẹn obo re che yono vwẹ omẹvwa rẹ udughwrẹn nana.
-
Ẹbẹre vọ vwẹ omẹvwa na yen ma kẹ wẹ omavwerhovwẹn?
Wọ riẹnre jovwo?
Vwẹ jw.org, wọ sa mrẹ asan vẹ ọke re vwo ru emẹvwa vwẹ akpọneje.
-
A ta eta, ru udje, ji ni ividio vwẹ emẹvwa rẹ avwanre. A vwẹ une vẹ ẹrhovwo vwọ ton emẹvwa phiyọ ji kuophiyọ
-
Vwẹ ẹbẹre evo rẹ uyono na, e durhie otu na nẹ ayen kpahenphiyọ enọ
-
Kohwo kohwo sa rhe—erua, ihwo re je rọvwọ-ọn, emare, kugbe emọ
-
Emẹvwa rẹ avwanre ọphẹ. Iseri ri Jihova bru arhọghọ kẹ ohwo-o, ayen ji mu imize-e
5. Ọ guọnọ ẹgbaẹdavwọn e vwo kpo emẹvwa
Roro kpahen udje rẹ orua ri Jesu. Kukpe kukpe, ayen yan iroko 100 wan asan rẹ igbenu vọnre, vwo nẹ Nazarẹt kpo Jerusalẹm. Se Luk 2:39-42, ovwan ta ota kpahen enọ nana:
-
Wo rorori nẹ oyan nana rẹ ayen yan kpo Jerusalẹm na guọnọ ẹgbaẹdavwọn?
-
Diesorọ o vwo fo nẹ wọ davwẹngba vwo kpo emẹvwa?
-
Wo rorori nẹ a ghene guọnọ ẹgbaẹdavwọn yena? Ke, Diesorọ?
Baibol na tare nẹ ọ pha ghanghanre re vwo kuomakugbe vwọ ga Jihova. Se Hibru 10:24, 25, ovwan ta ota kpahen onọ nana:
-
Diesorọ o vwo fo nẹ e kpo emẹvwa ọkieje?
IHWO EVO TA: “O ghwe fo nẹ wẹ vẹ ihwo siomakoko-o. Wẹwẹ ọvo se yono Baibol na vwẹ uwevwin.”
-
Ẹkpo ri Baibol vọ yẹrẹ udje ri Baibol vọ yen dje oborẹ Jihova guọnọre phia?
ỌDJẸKOKO
Uyono ẹra cha chọn wẹ uko vwo yono erọnvwọn efa kpahen Jihova, ru oyerinkugbe wẹn vẹ ọ rọyen ganphiyọ, ji nene ihwo efa ga kugbe.
Ẹrhomafuẹrẹn
-
Diesorọ Jihova vwọ vuẹ avwanre nẹ e siomakoko?
-
Die yen wo che yono vwẹ emẹvwa rẹ Iseri ri Jihova?
-
Wo rorori nẹ emẹvwa na sa chọn wẹ uko vwẹ idjerhe efa?
HIẸ GUỌNỌ
Ọ da dianẹ oshọ wo vwo kpo emẹvwa na ko mu we vwo? Mrẹ oborẹ ọshare ọvo ro vwo ọkpọ ẹwẹn yena jovwo vwọ rhoma ri vwo ẹguọnọ rẹ emẹvwa na.
Mrẹ omavwerhovwẹn rẹ ọshare ọvo vwo kpahen uyono ẹra, vẹ obo ro ruru o se vwo kpo uyono ọkieje.
Mrẹ oborẹ oma ru ihwo siẹrẹ ayen de kpo uyono.
“Diesorọ E Vwo Kpo Emẹvwa Vwẹ Ọguan Ruvie?” (Uyovwinrota rọhẹ jw.org)
Mrẹ oborẹ akpeyeren rẹ onogbozighi ọvo weneri ọke ro vwo kpo emẹvwa rẹ Iseri ri Jihova.
“Mi mu Ọhwunu Mẹ Kpo Kasan Kasan” (Uwevwin Orhẹrẹ ri July 1, 2014)
Wọ je sa Fuẹrẹn
ENỌ REDJE ẸNẸNỌ
Die Yen Uyono ri Baibol rẹ Iseri ri Jihova Vwo Muẹ kẹ Ihwo?
Vwẹ uyono ri Baibol ọphẹ rẹ Iseri ri Jihova vwo muẹ kẹ ihwo na, wọ sa reyọ kefanfan kefanfan ri Baibol ro je we vwo ruiruo. Wo se durhie ihwo rẹ orua wẹn eje yẹrẹ kugbeyan kugbeyan ru wọ guọnọre odedede.
