YOOSOMA 10
Mithukumano sa Anamoona a Yehova sinrowa wookhaviherani hayi?
Mwaninto orowela mithukumano sa Anamoona a Yehova? Mwaahintale orowawo, araaya miruku sooweera murowe omithukumanoni iwo pooti woovahani wuupuwela. Nto nyuwo munapatxera wiikoha ha: ‘Eheeni empakiwa omithukumanoni iwo?’ ‘Mwaha wa heeni siraaya sootthuneya?’ ‘Eheeni yeera ekironheke iwo?’ Mpuwa mwa yoosomeene yeela, munrowa oxuttera moota mithukumano sinkelaaya wookhaviherani omwaattamela Muluku ni wookhaviherani oviriha itthu sa nihuku ti nihuku.
1. Eheeni enaweeriha Anamoona a Yehova weera ethukumaneke?
Namalepa mmoha a Biblya enre: “mmuthukumanoni mutokwene kini kimuttottopele Yahvéh.” (Nsalmu 26:12) Ni masu eene yaala, owo oothaliha etthu enneeriha weera nthukumaneke: omukokhorela Muluku. Mwaha wa yeeyo, elapo yootheene, Anamoona a Yehova ennithukumana weera envuwihe Muluku, omwiipela ni onvekela. Nave-tho, vayaakhani ennapaka mithukumano mitokweene weera emukokhorele Muluku, Anamoona a Yehova onnaasivela orowela mithukumano.
2. Nyuwo munkela oxuttera eheeni mmithukumanoni mwahu?
Etthu etokotoko nimpakaahu mmithukumanoni mwahu ori omusoma Biblya. Hiyo ninnasoma masu a Muluku, ‘ntaphulelaka mowiiwanyeya ni noniheraka itthu sintaphulelaaya.’ (Mmusome Nehemiya 8:8.) Omithukumanoni iwo, nyuwo munkela oxuttera voohima sa Yehova ni mikhalelo sooreera owo okhalannaawe. Vaavo nyuwo munxutteraanyu voohima sa nsivelo na Yehova, mmweereke omwattamela. Nave munooxuttera moota Yehova aneeraawe ookhavihereni okhalano ekumi yoohakalaliha.—Yesaya 48:17, 18.
3. Omithukumanoni, nyuwo munkela waasuwela atthu akina. Eyo enkela wookhaviherani hayi?
Yehova onhima weera “niwehexexaneke mukina ni mukhw’awe, nòpereranaka mwa osivelana ni mwa sopanka sorera. Nihòtxele muthukumano ahu.” (Aheberi 10:24, 25) Omithukumanoni, nyuwo munkela waaphwanya atthu yaawo empwatthana mukina ni mukhwaawe nave munkela owiiwaka yuulumaka itthu siri mBiblyani. Antoko nyuwo, awo ennitthuna oxuttera voohima sa Muluku. (Mmusome Aroma 1:11, 12.) Opwaha mwa yeeyo, nyuwo munookela waasuwela atthu antxipale, ntoko anamathelana naari attiye, oohakalala, hata evirihaka maxupo. Muhoona itthu seiyo sineereya omithukumanoni? Khoiyono siiyeene Yehova onnoopereraawe othukumana.!
WEERA MUXUTTERE SINTXIPALE
Moonelele ele eneereya mmithukumanoni mwa Anamoona a Yehova. Nave muxuttere mwaha wa heeni eraaya yookhavihera wiilipihera orowela mithukumano.
4. Mithukumano sa Anamoona a Yehova sinkhala moota heeni?
Ehuhu ya atthareli a Yesu, makristu yannithukumana weera emukokhorele Yehova. (Aroma 16:3-5) Mmusome Akolosi 3:16, avinyaka mutthekule ni epontu enttharelana:
-
Ehuhu ya atthareli, makristu yaathukumana hayi weera emukokhorele Yehova?
Olelo va-tho, Anamoona a Yehova annathukumana weera emukokhoreleke Muluku. Weera musuwele moota sinkhalaaya mithukumano iyo, moone EVIIDIYU. Avinyaka, nwehe va elataratho ya mithukumano ni avinyaka mutthekule ni ipontu sinttharelana.
-
Nviidiyuni, nyuwo muhoona etthu eneereya Empa ya Omwene. Itthu heeni sineereya Empa ya Omwene sinlikanela ni ele musommaanyu va Akolosi 3:16?
-
Nviidiyuni naari valatarathoni, etthu heeni yoosivenleni voohima sa mithukumano?
Mmusome 2 Akorinto 9:7, ni avinyaka mutthekule ni epontu enttharelana:
-
Mwaha wa heeni mmithukumanoni sa Anamoona a Yehova ehinvirihiwaaya ephatxe ovekiwaka musurukhu?
Vamoha ni ole onoohusihani, munwehe programa onttharelana a mithukumano.
-
Empari heeni ya muthukumano monnaanyu weera yohoosivelani naari monnaanyu weera enimookhaviherani?
Nyuwo mwaasuwela??
Va esaiti jw.org nyuwo munkela ophwanya nipuro ni ehuhu sa mithukumano simpakiwa elapo yootheene.
-
Mmithukumanoni mwahu, munkela woona mwaha wuulummwaka, soowoonihera ni iviidiyu. Mithukumano simpatxera ni etxipo ni nivekelo nave-tho, simmalihera ni etxipo ni nivekelo
-
Empari ekina ya mithukumano, atthu pooti opaka ikomentaariyu yatthuna vale
-
Atthu ootheene ennaakheleliwa nimurettele: anamathelana, attiye, oowuuluvala naari anamwane
-
Mmithukumanoni sa Anamoona a Yehova, khaavo onvekela musurukhu
5. Ontthuneya wiilipihera weera murowele mithukumano
Moone ntakihero na emusi ya Yesu. Iyaakha sootheene yaannavinya oNazarethi mpaka oYerusalemu. Mene ekwaha eyo khayaakhweya mwaha wooweera yanneetta ikiloometuru siniphiyera 100, naari mahiku mararu, eviraka mmwaakoni. Mmusome Luka 2:39-42, avinyaka mutthekule ni ipontu sinttharelana:
-
Munoona weera waannatthuneya wiilipihera opaka ekwaheene yeela?
-
Apaale mwaha wa heeni waatthuneyaaya wiilipihera orowa omuthukumanoni?
-
Neereke munoona weera tiwootthuneya wiilipihera orowela mithukumano? Mwaha wa heeni munoonelaanyu hiiho?
Biblya onhima weera onnitthuneya othukumana ni akina weera nimokokhorele Yehova. Mmusome Aheberi 10:24, 25, ni avinyaka mutthekule ni epontu enttharelana:
-
Mwaha wa heeni ontthuneyaaya wiilipihera orowela mithukumano?
ATTHU AKINA ANEERA: “Nyuwo khontthuneya okhuma owaani weera mwamukokhorele Muluku. Omusoma Biblya meekhiinyu onnakwana.”
-
Yoolepa heeni naari ntakihero na mBiblyani nnoonihera moonelo wa Yehova voohima sa mithukumano?
NYAHA SOOTTHUNEYA
Orowela mithukumano, sinimookhaviherani oxuttera itthu sintxipale voohima sa Yehova ni olipiha onthamwene anyu ni yoowo. Opwaha mwa yeeyo, mithukumano sinimoovahani eparakha yoomukokhorela Muluku vamoha ni atthu akina.
Wuuluula
-
Mwaha wa heeni Yehova ontthunaawe weera nroweleke mithukumano?
-
Eheeni munkelaanyu oxuttera omithukumanoni sa Anamoona a Yehova?
-
Munnawera wuupuwela moota mithukumano sineeraaya sookhavihereni?
WEERA MUSUWELE ITTHU SINTXIPALE
Miruku sooweera murowe omithukumanoni iwo, pooti woovahani wuupuwela? Eyo yaaheereya ni mulopwana mmoha. Moonelele etthu yaamweerinhe opatxera omusivela mithukumano.
Moonelele mwaha wa heeni mmiravo mmoha saamusivenlaaya mithukumano ni heeni aapankaawe weera ahiyeleeleke.
Moonelele mwaha wa heeni atthu akina anoonaaya okhala wootthuneya orowela mithukumano.
“Mwaha wa heeni varaaya vooreera orowela mithukumano” (Mwaha va jw.org)
Mmusuwele mulopwana mmoha oowali ni yoowo aari egrupu yaanasusuki. Moone moota yaatxentxeyalaaya ekumi awe arowelakaru mithukumano sa Anamoona a Yehova.
“Khuuvo opuro waarowa aka kihimukunxe kapwitthi aka” (Owehaweha, 1.º a Julho a 2014)
