Nakaatender ka na ba hin katirok han mga Saksi ni Jehova? Kon waray pa, bangin maawod ka ha siyahan mo nga pagtambong. Bangin magpakiana ka: ‘Ano an ginbubuhat didto hito nga mga katirok? Kay ano nga importante ito? Kay ano nga dapat ako umatender hito?’ Hini nga leksyon, mahibabaroan mo kon paonan-o an pag-atender ha mga katirok makakabulig ha imo nga magin mas duok ha Dios ngan ha imo personal nga kinabuhi.

1. Kay ano nga nagkakatirok an mga Saksi ni Jehova?

Iginsumat han usa nga parasurat han Biblia an pinakaimportante nga rason han pagkatirok: “Ha daku nga kongregasyon, dadayawon ko hi Jehova.” (Salmo 26:12) Ha pariho nga paagi, an mga Saksi ni Jehova nalilipay gud ha pag-atender ha mga katirok. Ha bug-os nga kalibotan, nagkakatirok hira kada semana basi magdayaw ha Dios, magkanta, ngan mag-ampo. Ngan kada tuig, naatender liwat hira hin pipira nga dagku nga katirok para magsingba.

2. Ano an imo mahibabaroan ha amon mga katirok?

Ha amon mga katirok, igintututdo an Pulong han Dios, ‘iginsasaysay ito hin matin-aw ngan iginhahatag an kahulogan hito.’ (Basaha an Nehemias 8:8.) Kon maatender ka, mahibabaro ka mahitungod kan Jehova ngan ha iya mag-opay nga mga kalidad. Samtang nagtitikadamu an imo nahibabaroan mahitungod han iya gugma ha imo, magigin mas duok ka ha iya. Mahibabaroan mo liwat kon paonan-o ka niya mabubuligan nga magkaada mapulsanon nga kinabuhi.—Isaias 48:17, 18.

3. Paonan-o ka mabubuligan han mga tawo nga imo nakakaupod ha amon mga katirok?

Ginsusugo kita ni Jehova nga “tagdon naton an usa kag usa basi mag-aghat ha pagpakita hin gugma ngan mag-opay nga mga buhat, nga diri ginpapabay-an an aton pagkatirok.” (Hebreo 10:24, 25) Ha amon mga katirok, makikilala mo an mga tawo nga tinuod nga nahigugma ha usa kag usa, pati na an mga interesado mahibaro hin dugang mahitungod ha Dios pariho ha imo. Makakabati ka tikang ha ira hin makapadasig nga mga pulong tikang ha Biblia. (Basaha an Roma 1:11, 12.) May makakaistorya ka liwat didto nga mga solo ngan mga inasaw-an nga nagin malampuson ha pag-atubang ha ira mga problema. Pipira la ini nga rason kon kay ano nga karuyag ni Jehova nga regular nga umatender kita ha mga katirok!

 DUGANG NGA USISAHA

4. Mga katirok han mga Saksi ni Jehova

Han siyahan nga siglo, an mga Kristiano regular nga nagkakatirok basi magsingba kan Jehova. (Roma 16:3-5) Basaha an Colosas 3:16, katapos, hisguti niyo ini nga pakiana:

• Paonan-o nagsingba kan Jehova an siyahan nga mga Kristiano?

1. Ha amon mga katirok may-ada mga pahayag, pasundayag, ngan video. Gintitikangan ngan gintatapos namon ito pinaagi hin kanta ngan pag-ampo

2. Ha pipira nga bahin han programa, puydi magkomento an mamarati

3. An ngatanan puydi umatender—mga pamilya, mga solo, mga lagas, ngan kabataan

4. An mga katirok han mga Saksi ni Jehova libre la. Waray ka babaydan ngan waray didto pangulekta hin kwarta

 5. Kinahanglan hin pangalimbasog basi makaatender ha katirok

• Kay ano nga dapat kita umatender hin regular ha mga katirok?

 SUMARYO

An pag-atender ha mga katirok mabulig ha imo nga mas makilala pa hi Jehova, mas maparig-on an imo pakigsangkay ha iya, ngan singbahon hiya kaupod han iba.

Repaso

• Kay ano nga gin-aaghat kita ni Jehova nga umatender ha mga katirok?

• Ano an imo mahibabaroan ha mga katirok han mga Saksi ni Jehova?

• Ano pa an imo nahuhunahuna nga kapulsanan ha imo han pag-atender ha mga katirok?