LESON 10
Ino Mahatsara Anao Mivory Miaraka amy Vavolombelon̈o Jehovah?
Asa anao efa navy nivory niaraka tamy Vavolombelon̈o Jehovah? Izikoa anao tsiary tan̈y, mety hiasaloha anao koa voanalohany handeha an̈y. An̈aty dinikinao an̈y: ‘Karakory ma ataondro mivory? Raha maventy ma fivorian̈a io? Nan̈ino ma zaho tokony han̈aton̈o fivorian̈a io?’ Amy leson ty, ho hitanao fa ten̈a han̈ampy anao hifandray tsara amy Zan̈ahary fivorian̈a io sady hahatsara anao koa.
1. Nan̈ino ma raha ten̈a maventy fiarahan̈a mivory io?
Zahava raha nivolan̈inolo nanoratra Baiboly momba zen̈y. Ho izy: “Zaho hidera Jehovah an̈ivonolo mivory.” (Salamo 26:12) Tsisy ny hafa amy zen̈y koa Vavolombelon̈o Jehovah izioty. Ravoravo iro miaraka mivory isaka herin̈iandra. Iro midera Jehovah, ke mihira ndreky mivavaka. Iro koa man̈ano fivoriambe isaka taon̈o.
2. Ino ma raha hianaranao amy fivorian̈a an̈y?
Mianatra Baiboly raha ten̈a atao amy fivorian̈a io, ke ‘man̈azava tsarabe dikanizio.’ (Vakia Nehemia 8:8.) An̈y koa anao hianatra raha momba Jehovah ndreky iro toetrinany maro tsara aby io. Izikoa mahaimaro raha hainao momba fitiavany anao, loso von̈ono anao hanjary kamaradinany. Hianaranao an̈y koa akory hataonao baka anao hanan̈a fiain̈ana mahafapô.—Isaia 48:17, 18.
3. Nan̈ino mahatsara anao mifankazatra aminolo amy fivorian̈a an̈y?
Jehovah mandrisiky atsika ‘hifampandiniky ke handrisiky amy fitiavan̈a ndreky asa tsara ndreky tsy hanapatapaka fivorian̈a.’ (Hebreo 10:24, 25) Amy fivorian̈a an̈y anao hahita olo ten̈a tia olo ndreky tia mianatra raha momba Zan̈ahary, karaha ataonao. Iro koa samy mivolan̈a hevitrindro, izikoa fa misy raha iarahan̈a dinihin̈y amy Baiboly. (Vakia Romanina 1:11, 12.) Hahay olo maro efa niaritry problemo koa anao an̈y, kanefa iro ravoravo fo, an̈isanizen̈y olo manambady na olo tsy manambady. Mbala antony sasany mahavy Jehovah mandrisiky atsika han̈aton̈o fivorian̈a fo zen̈y!
ALEVA ONON̈O
Zahava karakory ataony Vavolombelon̈o Jehovah mivory, avio nan̈ino mahatsara anao mifen̈y man̈aton̈o fivorian̈a aby io.
4. Fivorian̈any Vavolombelon̈o Jehovah
Tamy taonjato voanalohany, iro Kristianin̈y aby io niaraka nivory nanompo Jehovah. (Romanina 16:3-5) Vakia Kolosianina 3:16, avio iaraha dinihin̈y fan̈ontanian̈a ty:
-
Akory nataondro Kristianin̈y taloha tan̈y nanompo Jehovah?
Izioty koa, Vavolombelon̈o Jehovah miaraka mivory amy Tran̈o Fivorian̈a. Baka anao mahay karakory ataondro mivory, alifasa VIDEO io. Avio zahava sarinolo amy fivorian̈a an̈y io, baka io iaraha dinihin̈y fan̈ontanian̈a aby ambany io.
-
Ino itovizany raha atao amy Tran̈o Fivorian̈a an̈y ndreky raha nivakinao tamy Kolosianina 3:16?
-
Ino raha ten̈a tianao tamy video na tamy sary momba fivorian̈a in̈y?
Vakia 2 Korintianina 9:7, avio iaraha dinihin̈y fan̈ontanian̈a ty:
-
Nan̈ino ma tsisy tanty rakitry amy fivorian̈any Vavolombelon̈o Jehovah?
Zahava miaraka aminolo mampianatra Baiboly anao programony fivorian̈a aminy herin̈iandra ty.
-
Ino amy raha atao amy fivorian̈a io ma ten̈a tianao ho hita?
Asa mba hainao?
Amy jw.org ao ahitanao lera ndreky tany ivorian̈a erantany.
-
A. Amy fivorian̈anay io misy kabaro, fampisehoan̈a, ndreky video. Zahay mihira ndreky mivavaka isaka hanomboko fivorian̈a ndreky alohany ravan̈a.
-
B. Olo mety mamaly fan̈ontanian̈a amy fizaran̈a sasany amy fivorian̈a io
-
D. Karazan̈olo jiaby hitanao ao: Fianakavian̈a, olo tsy manambady, olo matoe ndreky tsaiky
-
E. Tsy man̈efa miditry amy fivorian̈any Vavolombelon̈o Jehovah. Tsisy tanty rakitry koa an̈y
5. Mila mifen̈y olo baka mahavita man̈aton̈o fivorian̈a
Zahava ohatrany fianakavian̈a nisy Jesosy. Isaka taon̈o iro nila nandeha nan̈aton̈o fivorian̈a ta Jerosalema, kanefa dia vity 100 kilometra baka ta Nazareta mandeha Jerosalema. Vakia Lioka 2:39-42, avio iaraha dinihin̈y fan̈ontanian̈a aby ty:
-
Akory fahitanao ezaka nataondro nandeha nivory ta Jerosalema io?
-
Ino raha hitanao mety ho sarotro ke mila ifen̈anao, baka anao ho afaka handeha hivory?
-
Fahitanao izy, ino mahatsara anao mifen̈y fo mandeha mivory, ndray tsy mora man̈ano zen̈y? Nan̈ino?
Baiboly mivolan̈a fa fiarahan̈a mivory io mbala an̈isany fanompoan̈a Jehovah. Vakia Hebreo 10:24, 25, avio iaraha dinihin̈y fan̈ontanian̈a ty:
-
Nan̈ino ma atsika tsy tokony hanapatapaka fivorian̈a?
MISY OLO MIVOLAN̈A: “Tsy ilain̈y aby fandihanan̈a mivory io. Fianaran̈a Baiboly antran̈o fo efa mahampy.”
-
Ino andininy na ohatra amy Baiboly ahitan̈a fa tiany Jehovah hivory atsika?
INO RAHA NIANARANAO TATO?
Hahay raha maro momba Jehovah anao koa mandeha mivory, avio ho loso kamaradinany anao, baka io manompo izy miaraka aminolo hafa.
Fan̈ontanian̈a Fameren̈ana
-
Ino mahavy Jehovah mandrisiky atsika hiaraka hivory?
-
Ino raha ho hitanao amy fivorian̈any Vavolombelon̈o Jehovah an̈y?
-
Fahitanao izy, mety han̈ampy anao amy raha hafa koa ma fivorian̈a io?
ZAHAVA
Ino raha tokony hataonao izikoa anao mavozo han̈aton̈o fivorian̈a? Zahava akory nahavy lelahy araiky ty nanjary tia nivory.
Zahava ino nahavy tsaiky lelahy araiky nanjary tia nivory, baka io ino raha nataony baka izy afaka mivory fo.
Zahava akory honolo efa nan̈aton̈o fivorian̈a.
“Nan̈ino ma Anao Mila Mandeha Mivory amy Tran̈o Fivorian̈a An̈y?” (Lahatsoratra aminy Internet)
Zahava lelahy navy nahery andra be taloha, kanefa nanjary niova izikoa fa nan̈aton̈o fivorian̈any Vavolombelon̈o Jehovah.
“Tsiary Nialany Basy Taminaka Taloha” (Tilikambo Fiambesan̈a 1 Zie 2014)
Mety ho Tianao Koa
RAHA MATETIKY AN̈ONTANIANOLO
Karakory ma Atao Mianatra Baiboly Zen̈y?
Tsy man̈efa mianatra Baiboly amy Vavolombelon̈o Jehovah. Mety tahominao miaraka mianatra aminao koa havanao ndreky kamaradinao. Lera anao mianatra, anao afaka mampiasa zay fandikanteniny Baiboly tianao.
