Ya ta wɔlɔ li Ziova Ŋɔsere-faa Kɛ-ɓelai dikoyaŋ-ŋai ta su? A kɛ ife ta wɔlɔ li ti naa, tãi ta ya pai kɛi ŋumɛi a gɛɛ I li naa a tãi maa-ŋuŋ. Ya pɔri ikili-ŋa siai: ‘Le ɓe a kɛ goyaŋ-ŋai ŋi su? Le mɛni ɓe dimɛni kpanaŋɔɔi lai? Maa nɛ̃ɛi ŋa li naa le mɛni ma?’ Zɛŋ-lɛɛi ŋi su, ya pai mɛni maa-kɔrii e pilaŋ berei ma goyaŋ a I lɛɣɛ la a Ɣala da berei a kpɔŋ la ya ikɛ-ɣeniɛi su.

1. Ziova Ŋɔsere-faa Kɛ-ɓelai da koyaŋ-ŋa too le mɛni ma?

Mɛnii kaa Ŋala-kɔlɔ pɔ̃yɛ-nuui tɔnɔ e mo e pilaŋ mɛnii ma kwa koyaŋ-ŋa too mɛni mai: “Ŋa pai Yawɛɛ laa ma tɛi ŋɔnuai sama.” (Ŋule-wooi 26:​12) Bere sii tɔnɔ ti su, Ziova Ŋɔsere-faa Kɛ-ɓelai da lii-nɛ̃ɛ tamaa sɔlɔ ɓo da li goyaŋ-ŋai su. Ŋeniɛi gwaa kelee, da pa dikie ma a lɔɔ-kuu kelee, a gɛɛ di Ɣala laa maa tɛ, di wule too, di Ɣala fɛli. Da kpɔŋ kɛtɛ-ŋa too a koraŋ kelee a gɛɛ di Ziova fɛli.

2. Le ɓe ya pai maa-kɔrii kukoyaŋ-ŋai su?

Mɛni-ŋai kelee kwa maa-kɔri goyaŋ-ŋai sui, a kula Ŋala-kɔlɔi su, ‘da ŋa lɛ kpɔ kua a zu ponoɔɔ a gɛɛ ku tare zu.’ (Niɛmaya 8:8 lono.) Ya pai mɛni maa-kɔrii e pilaŋ Ziova da ŋɔtua-pere lɛlɛɛ-ŋai dia kukoyaŋ-ŋai su. Ya mɛni tamaa maa-kɔri e pilaŋ berei ma I wɛli kaa la mai, ya pai lɛɣɛi a nyaa. Ya pai ŋɔnɔ mɛni maa-kɔrii e pilaŋ berei ma a pɔri kpɔnii la ya a gɛɛ ikɛ-ɣeniɛi ŋuŋ e kɛ ma.​—Azaya 48:​17, 18.

3. Mɛni lɛlɛɛ-ŋa kɛɛ leŋ ɓe ya pai zɔlɔ ɓoi ya pa goyaŋ-ŋai su?

Ziova e mo kua a gɛɛ “e lɛɛ kukili ŋa berei kwa pɔri wɛli-kɛ-maa pui la kukie-ni kponoi da tii lɛlɛɛ kɛɛi. Kufe tãi siɣe kukie-ni kɔɣɛŋ mɛni ma.” (Ibulu 10:​24-25) Ya pai nua kaai kukoyaŋ-ŋai su nyii tɔ̃ya wɛli-kɛ-maa kaa diyeei dikie-ni mɛni mai, nyii-ŋai ŋwɛlii di mɛni tamaa maa-kɔri e pilaŋ Ɣala ma, yɛɛ ya. Ya pai fɔrɔ-woo-ŋa mɛnii nyii kula Ŋala-kɔlɔi sui. (Lomaŋ 1:​11, 12 lono.) Ya pai ŋɔnɔ nua takpɛni-ŋa kɔlɔni, diai dife tua-laa sui da tua-laa su-ɓela nyii-ŋai dilii nɛ̃ɛi berei maŋ da tɛɛi la mɛni-kpanaŋ-ŋa sui. Mɛni-ŋai gɛ Ziova a ŋwɛlii a gɛɛ kukɛ goyaŋ-ŋa su a tãi kelee, taŋa nɔ kaa ti!

 MƐNI TAMAA MAA-KƆRI

4. Ziova Ŋɔsere-faa Kɛ-ɓelai Dikoyaŋ-ŋai

Zia-ɓelai ditãi ma, Korai-ɓelai da kaa koyaŋ-ŋa too a tãi kelee a gɛɛ di Ziova fɛli. (Lomaŋ 16:​3-5) Kolasiɛŋ 3:​16 lono, gɛ ni ka lono e pilaŋ mare-kɛɛ ŋi ma:

• Korai-ɓelai kɛ zia-ɓelai ditãi mai, da kaa Ziova fɛli leŋ?

1. Lono-ŋa, mɛni-kɔɔŋ-maa-ŋa da vilo-ŋa kaa kukoyaŋ-ŋai su. Kukoyaŋ-ŋai kelee kɔɔ a pilaŋ e kpɛɛ a wule toɔɔ, da Ɣala-fɛliɛ

2. Goyaŋ-ŋai gwaa taŋa ma, Nuu nyii kelee ŋwɛlii, a pɔri mare-kɛɛ ta sukulai

3.   Kukoyaŋ-ŋai kelee la ɓoɔi nuu kelee mi​—kaayɔɔ-ŋa, diai dife tualaa sui, nuu-pɔlɔ-ŋa, da nĩa-pɛlɛɛ

4. Ife pai kapa kpɛɛi I lɛɛ pai lɔi naa. Nyaŋ pɛnɛ pu mɛni fe Ziova Ŋɔsere-faa Kɛ-ɓelai dikoyaŋ-ŋai su

5. Maa nɛ̃ɛi ku kɔ a gbanaŋɔɔ a gɛɛ ku li goyaŋ-ŋai su

• Maa nɛ̃ɛi kukɛ goyaŋ-ŋai su a tãi kelee le mɛni ma?

 MƐNI-ŊUŊ-ŊAI YAA MAA-KƆRII

Ya li goyaŋ-ŋai su a tãi kelee, a pai kpɔnii ya a gɛɛ I mɛni tamaa maa-kɔri e pilaŋ Ziova ma, I ilaoi-laai su kpanaŋ a nyaa, ka nua takpɛni-ŋa ka vɛli gie ma.

Gili-too-ŋa mare-kɛɛ-ŋai

• Le mɛni ɓe Ziova a ku fɔrɔi la a gɛɛ kukɛ goyaŋ-ŋai su a tãi kelee?

• Le ɓe ya pai maa-kɔrii Ziova Ŋɔsere-faa Kɛ-ɓelai dikoyaŋ-ŋai su?

• I laai la goyaŋ-ŋai da pɔri kpɔnii ya a pere sii takpɛni-ŋa?