LIJIGANYO 10
Misongano ja Mboni sya Yehofa Mpaka Jakamuchisye
Ana pakwete patesile nawo misongano ja Mboni sya Yehofa? Naga akusaka kuti akapikanile, mwine mpaka akole woga panandi. Mwine mpaka aliwusyeje kuti: ‘Ana pamisonganoji pakusatendekwa yamtuli? Ligongo chichi jili jakusosekwa? Ligongo chichi ngusosekwa kutenda nawo misonganoji?’ Mu mtwe awuno chitulole kuti kusongana pampepe mpaka kwalimbikasye soni kwakamuchisya kumŵandichila Mlungu.
1. Ana Ligongo chichi tukusasongana pampepe?
Jwakulemba Baibulo jwine jwasasile ligongo lyakwe tukusasongana pampepe. Jwalakwe jwatite: “Pamsongano chinjalumba Ambuje.” (Salimo 26:12) Mwakulandana ni yeleyi, Ŵamboni sya Yehofa akusasangalala pakusongana pampepe. Pachilambo chosope, wiki jilijose akusasongana pampepe kuti akalijiganye yakwamba Yehofa. Nambosoni chaka chilichose akusalijiganya yakwamba Yehofa kupitila m’misongano jekulungwakulungwa.
2. Ana pamisonganoji chachilijiganya chichi?
Pamisonganoji tukusalijiganya Maloŵe ga Mlungu. Nambosoni ‘akusagagopolela chenene [Maloŵego] kuti ŵandu apikanichisye chenene yigakugopolela.’ (Aŵalanje Nehemiya 8:8.) Pamisonganoji chachilijiganya yakwamba Yehofa soni ndamo syakwe syapenani. Pakulijiganya yejinji yakwamba chinonyelo chakwe, chachimŵandichila jwalakwe. Chachilijiganyasoni yampaka atende jwalakwe pakwakamuchisya kuti akole umi wambone.—Yesaya 48:17, 18.
3. Ana kusimanikwa kumisonganoji mpaka kwakamuchisye chamtuli?
Yehofa akusatusalila kuti ‘tukumbuchilaneje jwine ni mjakwe, ni kamuchisyana jwine ni mjakwe pakulosya kunonyelana ni kutendelana yambone. Kwende tukaleka ndamo syetu syakusongana pampepe.’ (Ahebeli 10:24, 25) Pa misonganoji chachisimana ni ŵandu ŵakusanonyelana yisyesyene, soni ŵakusasaka kulijiganya yejinji yakwamba Mlungu mpela wawojo. Ŵandu ŵeleŵa chachalimbikasya ni mfundo sya m’Baibulo. (Aŵalanje Aloma 1:11, 12.) Chachisimanasoni ni ŵandu ŵakulekanganalekangana ŵalombele kapena ŵangalombela ŵakukombola kulimbana ni yakusawusya yakusasimana nayo. Yeleyi yili yindu yine yayikusamtendekasya Yehofa kutulimbikasya kuti tusonganeje pampepe ndaŵi syosope.
KULIJIGANYA YEJINJI
Chitulijiganye yayikusatendekwa pamisongano ja Mboni sya Yehofa, soni ligongo lyakwe tukusosekwa tusimanikwejepo.
4. Misongano ja Mboni sya Yehofa
Aklistu ŵandanda ŵasonganaga pampepe kuti amlambile Yehofa. (Aloma 16:3-5) Aŵalanje Akolose 3:16, kaneko akambilane chiwusyo achi:
-
Ana Aklistu ŵandanda ŵamlambilaga chamtuli Yehofa?
Masiku aganosoni ŵa Mboni sya Yehofa akusasonganaga pampepe pamalo gawo gakulambilila. Kuti amanyilile mwajikusaŵela misonganoji, alolele FIDIYO. Kaneko alole chiwulili chakulosya ŵandu ali mkutenda misongano, pambesi pakwe akambilane yiwusyo ayi.
-
Ana pana kukamulana kwamtuli pasikati pa yindu yayikusatendekwa ku Nyumba ja Uchimwene ni yakusala pa Akolose 3:16?
-
Ana chichi chachasangalesye mu fidiyoji kapena pa chiwulilichi pakwamba ya misongano jetu?
Aŵalanje 2 Akolinto 9:7, kaneko akambilane chiwusyo achi:
-
Ligongo chichi Ŵamboni sya Yehofa ŵangasonjesya mbiya pamisongano jawo?
Wawojo yimpepe ni ŵakusiŵajiganya, alole yindu yachakalijiganye pamisongano ja mpingo wiki ajino.
-
Ana msongano wapi wawukwasangalasya wawojo wampaka akasimanikwe nawo?
Ana akumanyilila?
Pa webusayiti ja jw.org, mpaka apate malo soni ndaŵi jakusatenda misongano pachilambo chosope.
-
Pamisongano jetu pakusapagwa ngani, yisyasyo soni mafidiyo. Misonganoji jikusatanda soni kumalisya ni nyimbo nambosoni lipopelo
-
Pamisonganoji ŵakupikanila akusakola upile wakusala yalijiganyisye
-
Pamisonganoji akusampochela jwalijose
-
Pamisonganoji ŵangalipisyaga kapena kulokotela mbiya
5. Tukusosekwa kuŵichilapo mtima kuti tujawule kumisongano
Aganichisye yaŵatendaga achinangolo ŵa Yesu. Chaka chilichose, ŵasosekwaga kwenda m’matumbi ulendo wa makilomita 100 kutyochela ku Nasaleti kwawula ku Yelusalemu. Ŵatendaga yeleyi kuti akasimanikwe ku Nyumba jakulambilila. Aŵalanje Luka 2:39-42, kaneko akambilane yiwusyo ayi:
-
Ana jemanjaji ŵasosekwaga kulipeleka kuti akayiche ku Yelusalemu?
-
Ana ligongo chichi akusosekwa kulipeleka kuti akasimanikwe kumisongano?
-
Ana kusimanikwa pamisongano kuli kwakamuchisya? Ligongo chichi akwanga myoyo?
Baibulo jikusasala kuti kusongana pampepe kuti tumlambile Yehofa kuli kwakusosekwa mnope. Aŵalanje Ahebeli 10:24, 25, kaneko akambilane chiwusyo achi:
-
Ligongo chichi akusosekwa kusimanikwaga pamisongano ndaŵi syosope?
YAKUSAŴECHETA ŴANDU ŴANE: “Naga akusalijiganya Baibulo panyumba, yili yakwanila. Pangalisoni ligongo lyakuti asonganeje ni ŵane.”
-
Ana lilemba lyapi kapena chisyasyo chapi champaka chitukamuchisye kumanyilila nganisyo sya Yehofa pangani ja kusongana?
YALIJIGANYISYE
Pamisongano mpaka alijiganye yejinji yakwamba Yehofa. Mpaka jakamuchisyesoni kulimbisya unasi wawo ni jwalakwe soni kumlambila pampepe ni ŵane.
Yiwusyo Yakuwilisya
-
Ligongo chichi Yehofa akusatulimbikasya kusongana?
-
Ana mpaka akalijiganye chichi pamisongano?
-
Ana kutenda nawo misongano mpaka kwakamuchisye m’matala gane gapi?
YAKULINGA YINESONI
Ana akusatenda woga kuti akapikanile nawo misongano ja Mboni sya Yehofa? Mundu jwine jwalipikanagasoni myoyo. Alole chachamkamuchisye kuti atande kujinonyela misongano.
Alole mwakusangalalila jwachinyamata ni misongano soni yakutenda kuti ndaŵi syosope asimanikwejepo.
Alole mwakusapikanila ŵane mumtima payiche kumisongano.
“Ligongo Chichi Ngusosekwa Kusimanikwa pa Misongano ku Nyumba ja Uchimwene?” (Ngani ja pa intaneti)
Alole mwele misongano jamkamuchisye mundu jwine juŵaliji chigaŵenga kuti achenje umi wakwe.
“Najendaga ni Uti Kulikose” (Sanja ja Mlonda ja, Julayi 1, 2014)
You May Also Like
YIWUSYO YAKUSANONYELA ŴANDU KUWUSYA
Ana Ljiganyo lya Baibulo Lyakusatendesya Ŵamboni sya Yehofa Likusatendekwa Mwamtuli?
Muyakambilana ni Ŵamboniyi akwete ufulu ŵakamulichisya masengo Baibulo jawo. Yili yakomboleka kwaŵilanga achimjawo soni ŵamwiŵasa mwawo kuti atende nawo lijiganyoli.
