EHONGWA 11
Omuano mu mo yenene okurihonga ovingi okuza mOmbeibela
Hapo ove wa rora okukara nonḓero yokuuta otjiungura tjoo munu kutja otjizeu? Ngahino, kutja i rire oupupu okutjiungura, ove mape ya we tji haṋa motupa otuṱiṱi. Okulesa Ombeibela wina ku ri nao. Ove mape ya o ripura kutja, ‘Hapo hi utire pi?’ Mehongwa ndi, matu katara koviṋa tjiva mbi mo yenene okutjita, mbi mavi ku vatere kutja u tjaterwe i yokulesa nokukonḓonona Ombeibela.
1. Ongwaye tji matu sokulesa Ombeibela aruhe?
Omundu ngu lesa Ombeibela poo “omatwako wa Muhona,” aruhe ma kara nouṋingandu nu ma ṋingapara mu avihe mbi ma tjiti. (Lesa Epsalme 1:1-3.) Tji mo utu okulesa Ombeibela, kondja okuilesa ozominute ozonḓiṱi eyuva arihe. Indu tji wa utu okutjiwa Embo ra Mukuru, ove otji mo utu okuyorokera okulesa Ombeibela.
2. Ovikwaye mbi mavi ku vatere kutja u mune ouwa mokulesa Ombeibela?
Kutja u mune ouwa momalesero woye wOmbeibela, ove mo hepa okuhekana ‘nokuripura’ ohunga na imbi mbi mo lese. (Epsalme 119:97) Otja tji mo lese, ripura omuini omapuriro tjimuna inga: ‘Etjangwa ndi mari ndji raere tjike ohunga na Jehova Mukuru? Me yenene okuṱakamisa vi otjiṋa hi mehupo randje? Me yenene vi okuungurisa omazeva nga okuvatera varwe?’
3. Oruṋe tji mo yenene okulesa Ombeibela?
Hapo ouzeu kove okutwa po oruveze okulesa Ombeibela? I rira ouzeu ku eṱe atuhe. Kondja okuungurisa ‘oruveze ndu u na rwo momuhingo omusemba.’ (Ovaefese 5:16) Ove mo yenene okutjita nao indu tji wa twa po oiri kaaṋi okulesa Ombeibela eyuva arihe. Ovandu tjiva ve twa po oruveze okulesa Ombeibela rukuru mozoiri zomuhuka. Varwe ve twa po oruveze momakayendero weyuva, tjimuna mozoiri zometaha. Nu varwe ve lesa Ombeibela ongurova ngunda ave hi ya rara. Hapo oiri iṋe ndji mai pu kove?
KONḒONONA OUKOTO
Tjita kutja omalesero woye wOmbeibela ye rire omatjate. Tara kutja omomuano uṋe mu mo yenene okurirongerisa nawa kokutja u rihonge ovingi momakonḓononeno woye wOmbeibela.
Tjimuna tji tu rihonga okuiririra okurya ovikurya pekepeke, eṱe wina matu yenene okurihonga okukara nondjoroka okulesa Ombeibela
4. Rihonga okutjaterwa i yomalesero wOmbeibela
Okuuta okulesa Ombeibela mape ya aku ha rire oupupu. Nungwari, matu yenene okukara nonḓero okutjita nao, tjimuna tji tu rihonga okuyorokera ovikurya mbi tu hi ya rora. Lesa 1 Petrus 2:2, nu okuzambo hungirira kepuriro ndi:
-
Hapo mo munu kutja okulesa Ombeibela eyuva arihe, mape ya aku ku tjatere, nu o vanga okuilesa aruhe?
Nyanda OKAVIDIO kutja u mune omuano ovandu tjiva mu va uta okuyorokera okulesa Ombeibela. Okuzambo hungirira komapuriro ngu maye kongorere kehi mba.
-
Mokavidio, omatokero yeṋe omitanda ngu vya tuurunga?
-
Ovikwaye mbye ve vatera okukayenda komurungu okulesa Ombeibela aruhe?
-
Omomuano uṋe mu va tjita kutja omalesero wawo wOmbeibela ye rire omatjate?
Oviṋa mbi mavi ku vatere okuuta:
-
Toorora Ombeibela ndja torokwa nawa nu ndji neraka epupu okuzuva. Rora okulesa Ombeibela ndji New World Translation indu tji i ri meraka roye poo meraka rarwe ndu u zuva nawa.
-
Rutenga uta okulesa otupa tu mo munu kutja matu ku nana ombango. Tji mo vanga ondunge, lesa okawongo nga “Lesa Ombeibela eyuva arihe.”
-
Tjanga kutja wa yandere pi okulesa. Ungurisa okawongo nga “Tjanga imbi mbi wa lese mOmbeibela” ku ke ri membo ndi.
-
Ungurisa oprograma yo JW Library®. Mo yenene okulesa nokupuratena Ombeibela apehe pu u ri, okupitira mongoze poo otjiungurisiwa tjarwe.
-
Ungurisa okambo nga “Okambo kokukonḓonona Embo raMukuru” ku ke ri ko-jw.org. Oko ke novikarata vyehi nouwongo mbu mau tjiti kutja u kare nonḓero momalesero woye.
5. Rirongerisa komerihongero woye wOmbeibela
Lesa Epsalme 119:34, nu okuzambo hungirira komapuriro nga:
-
Ongwaye tje ri nawa okukumba ngunda au hi ya uta okulesa poo okurirongerisa komerihongero woye wOmbeibela?
Omomuano uṋe mu mo yenene okumuna ouwa momerihongero woye ayehe wOmbeibela? Otja tji mo rirongerisa kehongwa arihe, kondja okukongorera omapu ngu maye kongorere kehi mba:
-
Lesa ozoparagrafa nḓe ri pomautiro wehongwa.
-
Lesa omatjangwa nu kondja okuzuva nawa kutja maye hitasana vi ku nepu ndi mari hungirirwa ko.
-
Twa ko oviraisiro komambo ngu maye ziri epuriro arihe. Okutjita nao maku ku vatere kutja mu hungirire ko ku na ingwi ngu me ku hongo.
Hapo ove oo tjiwa?
Ovahongonone va Jehova, va ungurisa ozOmbeibela pekepeke. Posi yokutja, tu tjaterwa i yOmbeibela ndji New World Translation of the Holy Scriptures mena rokutja ya torokwa nawa, ongahu, nu i ungurisa ena ra Mukuru.—Lesa Okarupa okasupi morungovi “Hapo Ovahongonone va Jehova ve nOmbeibela yawo oveni?”
OVANDU TJIVA VE TJA: “Okurihonga Ombeibela katjiṋa otjipupu. Hi noruveze poo omasa okurihonga.”
-
Ove u noumune uṋe?
OKUYARUKIRA PO OUSUPI
Kutja u rihonge ovingi okuza mOmbeibela, twa po oruveze okuilesa, kumba kutja u zuve nawa imbi mbi mo lese nu rirongerisa komerihongero woye wOmbeibela ayehe.
Okurizemburukisa
-
Ovikwaye mbi mavi ku vatere kutja u rihonge ovingi okuza mOmbeibela?
-
Oruṋe tji mo yenene okutwa po oruveze okulesa nokurihonga Ombeibela?
-
Ongwaye tje ri otjiṋa otjiwa okurirongerisa komerihongero woye wOmbeibela ayehe?
RIHONGA OVINGI
Tara rukwao komapu tjiva ngu mape ya aye ku vatere okurihonga ovingi okuza momalesero woye wOmbeibela.
“Omuano mu mo yenene okurihonga ovingi okuza momalesero wOmbeibela” (Oruhungu No. 1 2017)
Rihonga omiano vitatu vyokulesa Ombeibela.
Tara kutja omomuano uṋe mu mo yenene okuyorokera omalesero wOmbeibela.
Muna ondjiviro okuza kovandu mba lesa Ombeibela oure wozombura ozengi.
Oviṋa mbi mavi ku vatere momakonḓoneno woye wOmbeibela (2:06)
Mo yenene okutara ku imbi wina
OMAPURIRO NGE PURWA i yovandu OVENGI
Ovahongonone va Jehova ve yandja omerihongero wOmbeibela momuano uṋe?
Ove mo yenene okuungurisa Ombeibela ngamwa aihe indu tji mo rihongo Ombeibela otjari pu nOvahongonone va Jehova. Mo yenene okuṋanga eṱunḓu roye arihe poo omapanga woye okukara pomerihongero woye wOmbeibela.
