Awˬ lawn 11

Nawˬ Liꞈ hpu gʼaw ve htaꞈ awˬ bon hkʼaˬ hkʼe gʼa tuˬ le?

LEˍ VE

Nawˬ kanˉ uiˍ ve te tuˬ dawˇ leh kanˉ chi te gʼa tuˬ haˍ jaˇ tehꞈ dawˇ jaw˗aw laˇ? Kanˉ chi hkʼa sha sha˗ehˬ te gʼa tuˬ awˬ meu˗eˇ awˬ meu˗eˇ gʼa te kʼai ve yoˬ. Liꞈ hpu gʼaw ve kaꞈ chi hkʼe hpehꞈ ve yoˬ. ‘Ngaˬ hkʼaˬ kaˬ lo tanˬ gʼaw tuˬ le’ tehꞈ nawˬ dawˇ tuˬ yoˬ hehˉ. Chi teˇ lawn hkʼaw nawˬ Liꞈ hpu gʼaw ve leh Liꞈ hpu henˇ ve hkʼaw ha lehˬ ve cawˬ tuˬ nawˬ aˬ htoꞈ ma gʼa te ve teˇ geh nyi sheˍ.

1. Aˬ htoꞈ ma pa taw ngaˬ hui hkʼaˬ htaˆ kaꞈ Liꞈ hpu gʼaw cawˇ ve le?

Liꞈ hpu htaꞈ hkʼaˬ htaˆ kaꞈ gʼaw chehˇ ve chaw, maˇ heˆ leh “Gʼuiˬ sha ve awˬ liˇ tawˇ hkawˇ” gʼaw chehˇ ve chaw lehˬ ha lehˬ ve cawˬ leh yawˇ te ve kanˉ teˇ ceuˬ le le uiˍ la daꞈ la tuˬ yoˬ. (Chiˇ mvuh ve 1:1-3 gʼaw sheˍ.) Teˇ nyi le le hkʼaw nawˬ Liꞈ hpu awˉ lawˉ tanˬ gʼaw htaˇ hkʼaˬ nyiˇ miꞈ niꞈ yehˇ kaꞈ hpehꞈ ve yoˬ. Nawˬ Liꞈ hpu awˬ meu˗eˇ awˬ meu˗eˇ gʼaw ve kʼo, Liꞈ hpu gʼaw ve htaꞈ dawˇ cawˇ tuˬ yoˬ.

2. Nawˬ Liꞈ hpu gʼaw ve htaꞈ awˬ bon gʼa tuˬ aˬ htoꞈ ma te cawˇ ve le?

Liꞈ hpu gʼaw ve htaꞈ awˬ bon gʼa gaˇ ve kʼo, ngaˬ hui gʼaw chehˇ ve htaꞈ jehˇ leh dawˇ nyi cawˇ ve yoˬ. Ngaˬ hui hkʼa dehꞈ gʼaw leh “dawˇ nyi” cawˇ ve yoˬ. (Chiˇ mvuh ve 119:99) Nawˬ Liꞈ hpu gʼaw htaˇ nawˬ awˬ to htaꞈ chi hkʼe na nyi sheˍ. ‘Liꞈ hpu chi teˇ tawn Yaˬhoˉvaˬ htaꞈ caˉ daꞈ ve ngaˬ htaꞈ aˬ htoꞈ ma maˍ laˇ ve le? Ngaˬ ve a shaꞈ teꞈ hkʼaˇ hkʼaw hkʼaˬ hkʼe te yuˬ yehˇ gʼa tuˬ le? Ngaˬ Liꞈ hpu chi teˇ tawn yehˇ leh shu htaꞈ hkʼaˬ hkʼe ga piˇ gʼa tuˬ le?’

3. Nawˬ Liꞈ hpu gʼaw tuˬ awˬ yanˇ hkʼaˬ hkʼe shawˍ teh gʼa ve le?

Nawˬ Liꞈ hpu gʼaw gaˇ ve htawˇ, awˬ yanˇ maˇ cawˬ tehꞈ dawˇ˗aw laˇ? Chaw laiˉ gʼaˇ chi hkʼe dawˇ ve yoˬ. Liꞈ hpu hkʼaw ngaˬ hui htaꞈ kʼoˆ laˇ ve, “awˬ yanˇ htaꞈ vuiˬ hkʼawꞈ leh hkʼa dehꞈ yehˇ˗oˆ.” (Eˇfeˇsuꞈ 5:16) Nawˬ chi hkʼe te gʼa tuˬ teˇ nyi ve hkʼaw Liꞈ hpu hkʼaˬ htaˆ gʼaw tuˬ awˬ yanˇ gʼa shawˍ teh taˍ ve yoˬ. Chaw teˇ hpaˍ mvuhˇ shawˉ gʼaw ve. Chaw teˇ hpaˍ mvuhˇ lawꞈ kʼaw htaˇ gʼaw ve. Chaw teˇ hpaˍ maˇ zuhꞈ sheˍ gʼuˇ suhˍ htaˇ gʼaw ve. Nawˬ˗ehꞈ hkʼaˬ htaˆ gʼaw tuˬ le?

Henˇ shiˍ maˇ la tuˬ

Liꞈ hpu gʼaw ve htaꞈ hkʼaˬ hkʼe te leh ha lehˬ ve cawˬ tuˬ le, Liꞈ hpu henˇ ve htaꞈ nawˬ awˬ bon gʼa tuˬ hkʼaˬ hkʼe gʼa gu teh taˍ ve le, teˇ geh henˇ sheˍ.

Ngaˬ hui maˇ caˇ jaw ve caˇ tuˬ htaꞈ dawˇ cawˇ tuˬ laiˉ pawˆ gʼa caˇ nyi ve hkʼe, Liꞈ hpu gʼaw ve htaꞈ dawˇ cawˇ tuˬ gʼa gʼaw nyi ve

4. Liꞈ hpu gʼaw ve htaꞈ nawˬ dawˇ cawˇ tuˬ hkʼaˬ hkʼe gʼa te ve le?

Liꞈ hpu tanˬ gʼaw ve lehˬ maˇ sha ve yoˬ hehˉ. Nawˬ maˇ caˇ jaw ve caˇ tuˬ htaꞈ dawˇ cawˇ tuˬ laiˉ pawˆ gʼa caˇ nyi ve hkʼe, Liꞈ hpu gʼaw ve htaꞈ dawˇ cawˇ tuˬ gʼa gʼaw nyi ve yoˬ. 1 Peˍtruˆ liꞈ 2:2 gʼaw leh na hkawˇ chi htaꞈ tawˇ yaw daꞈ sheˍ:

Nawˬ dawˇ kʼo, nawˬ teˇ nyi le le Liꞈ hpu gʼaw ve kʼo, Liꞈ hpu gʼaw ve htaꞈ dawˇ cawˇ tuˬ laˇ?

VDO hpaw leh aˬ htoꞈ ma pa taw chaw teˇ hpaˍ Liꞈ hpu gʼaw ve htaꞈ dawˇ cawˇ ve tehꞈ nyi sheˍ. Peuˬ leh na hkawˇ chi teˇ hpaˍ htaꞈ tawˇ yaw daꞈ sheˍ:

VDO: Yaˇ nehˬ Gʼuiˬ sha ve tawˇ hkawˇ htaꞈ haꞈ tuˬ henˇ ve (5:33)

VDO hkʼaw ve yaˇ nehˬ, aˬ htoꞈ ma pa taw yawˇ hui Liꞈ hpu gʼaw tuˬ maˇ sha tehꞈ kʼoˆ ve le?
Liꞈ hpu hkʼaˬ htaˆ kaꞈ gʼaw tuˬ yawˇ hui hkʼaˬ hkʼe te ve le?
Liꞈ hpu gʼaw ve htaꞈ dawˇ cawˇ tuˬ, yawˇ hui aˬ htoꞈ ma te ve le?

Ga laˇ gʼa ve awˬ hkʼaˇ:

Cawˇ ve leh hkʼa sha sha˗ehˍ na gʼa ve Liꞈ hpu gʼaw sheˍ. Nawˬ ve chaw ceuˬ tawˇ hkawˇ maˇ heˆ leh nawˬ na gʼa ve tawˇ hkawˇ Miˬ guiˬ awˬ suhˉ yuˬ tawˆ ve Liꞈ hpu cawˬ ve kʼo, oˇ ve teˇ kʼoˆ hkʼaw gʼaw sheˍ.
Nawˬ dawˇ cawˇ jaˇ ve awˬ lawn awˉ lawˉ gʼaw sheˍ. Hkʼaˬ ve teˇ lawn htaꞈ nyi ma pfuhˇ ve shiˍ tuˬ “Liꞈ hpu tanˬ gʼaw ve” hkʼaw nyi sheˍ.
Nawˬ gʼaw taˍ ve htaꞈ bvuhꞈ keu sheˍ. “Nawˬ Liꞈ hpu gʼaw tuˬ ve awˬ hkʼaˇ” htaꞈ yehˇ sheˍ.
JW Laiˉbaˍliˍ (JW Library^®) ehˆ yehˇ sheˍ. Hkʼaˬ kaˬ lo chehˇ taˍ ve maˇ kʼoˆ, nawˬ ve tawˇ yaw tuˬ awˬ hkʼeun hkʼaw maˇ heˆ leh awˬ nu ve awˬ hkʼeun hkʼaw Liꞈ hpu gʼaw gʼa leh gʼaw taˍ ve awˬ hkawˇ hpaw na gʼa ve yoˬ.
Miˬ guiˬ awˬ suhˉ yuˬ tawˆ ve Liꞈ hpu hkʼaw awˬ tawn teˇ hpaˍ htaꞈ yehˇ sheˍ. Miˬ guiˬ awˬ han liꞈ, awˬ han, leh tawˇ hkawˇ kʼoˆ maˍ laˇ ve hkʼaw yehˇ ve kʼo nawˬ Liꞈ hpu gʼaw ve hkʼaw ha lehˬ ve cawˬ tuˬ te laˇ ve yoˬ.

5. Nawˬ Liꞈ hpu henˇ tuˬ gu teh taˍ˗oꞈ

Chiˇ mvuh ve liꞈ 119:34 gʼaw leh na hkawˇ chi htaꞈ tawˇ yaw daꞈ sheˍ:

Liꞈ hpu gʼaw˗a te htaˇ maˇ heˆ leh Liꞈ hpu henˇ tuˬ gu htaˇ aˬ htoꞈ ma pa taw bon awˉ lawˉ gʼa lawˬ cawˇ ve le?

Teˇ pawˆ le le Liꞈ hpu henˇ ve htaꞈ awˬ bon gʼa tuˬ nawˬ aˬ htoꞈ ma gʼa te ve le? Henˇ tuˬ ve awˬ lawn gu htaˇ chi hkʼe te nyi sheˍ:

Awˬ lawn hkʼaw cawˬ ve awˉ lawˉ henˇ tuˬ ve htaꞈ gʼaw sheˍ.
Liꞈ hpu hpeuꞈ gʼaw leh Liꞈ hpu chi teˇ tawn henˇ tuˬ ve awˬ lawn htaꞈ hkʼaˬ hkʼe caˉ daꞈ ve htaꞈ nyi sheˍ.
A yeˇ uiˍ ve awˬ tawn maˇ heˆ leh hkʼawꞈ laˇ hkawˇ awˬ hawˉ lo hkʼaiˇ taˍ sheˍ. Nawˬ chi hkʼe te ve kʼo, nawˬ htaꞈ maˍ laˇ ve chaw geh henˇ htaˇ na gʼa tuˬ yoˬ.

Nawˬ shiˍ˗aˬ laˇ?

Yaˬhoˉvaˬ ve Shaˉhkiˆhkanˍ ve chaw Liꞈ hpu yanˍ tawˆ taˍ ve teˇ hpaˍ laiˉ kʼoˆ yehˇ jaw ve yoˬ. Yaꞈ hkʼaˇ, ngaˬ hui dawˇ cawˇ leh yehˇ ve teˇ kʼoˆ lehˬ Miˬ guiˬ awˬ suhˉ yuˬ tawˆ ve Liꞈ hpu yoˬ. Awˬ lawn kʼo, Liꞈ hpu yanˍ tawˆ ve cawˇ ve, hkʼa sha sha˗ehˬ na gʼa ve, leh Gʼuiˬ sha ve awˬ meh cawˬ ve yoˬ.—“Yaˬhoˉvaˬ ve Shaˉhkiˆhkanˍ ve chaw yawˇ hui ve Liꞈ hpu ceh tiˉ yehˇ ve laˇ?” vehˆsaiˉ hkʼaw ve awˬ lawn nyi sheˍ

Chaw teˇ hpaˍ kʼoˆ ve: “Liꞈ hpu henˇ ve haˍ jaˇ. Henˇ tuˬ awˬ yanˇ maˇ cawˬ.”

Nawˬ hkʼaˬ hkʼe dawˇ ve le?

A yeˇ uiˍ ve awˬ lawn

Nawˬ Liꞈ hpu henˇ ve htaꞈ awˬ bon gʼa tuˬ Liꞈ hpu gʼaw tuˬ awˬ yanˇ gʼa shawˍ teh ve, Liꞈ hpu gʼaw ve htaꞈ na gʼa tuˬ bon gʼa lawˬ ve, leh Liꞈ hpu maˇ henˇ sheˍ htaˇ gʼa gu teh taˍ ve yoˬ.

Kʼawꞈ gʼaꞈ na ve

Liꞈ hpu henˇ ve htaꞈ nawˬ awˬ bon gʼa tuˬ aˬ htoꞈ ma gʼa te ve le?
Nawˬ hkʼaˇ nawˬ Liꞈ hpu gʼaw leh henˇ tuˬ awˬ yanˇ hkʼaˬ htaˆ shawˍ teh gʼa ve le?
Aˬ htoꞈ ma pa taw nawˬ Liꞈ hpu maˇ henˇ sheˍ htaˇ gʼa gu teh taˍ ve le?

Henˇ peuˬ ve awˬ nyi

Dawˇ teh taˍ ve

Chi teˇ lawn hkʼaw maˍ laˇ ve hkʼe, awˬ gʼuˇ suhˍ teˇ lawn henˇ tuˬ gu teh taˍ sheˍ.

Awˬ nu ve teˇ hpaˍ:

Awˬ nu ve teˇ hpaˍ