TLAMACHTILI 11
¿Tlake uelis tijchiuas tlaj tijneki ma mitspaleui Biblia?
¿Se tonali tijnekiyaya tijchiuas se ueyi tekitl tlen timoiljuiyaya tlauel ouij? Uelis yolik tijchijtiajki pampa tijnekiyaya tijtlamichiuas. Uelis nojkia kiampa tijyolmati kema tijneki tijpouas Biblia, uan timotlajtlania: “¿Kenijkatsa nijpeualtis nijpouas?”. Ipan ni tlamachtili tikitasej se keski tlamantli tlen mitspaleuis ma mitspakti tijpouas uan timomachtis Biblia.
1. ¿Kenke tlauel techpaleuis tlaj mojmostla tijpouasej Biblia?
Tlaj mojmostla tijpouas Biblia o “itlanauatiljuaj toTeko”, tlauel tiyolpakis uan nochi tlen tijchiuas kisas kuali (xijpoua Salmo 1:1-3). Achtoui, uelis mojmostla tijpouas Biblia san se keski minutos. Tlaj nochipa kiampa tijchiuas, teipa nojua tlauel mitspaktijtias tijpouas.
2. ¿Tlake moneki tijchiuas tlaj tijneki ma mitspaleui tlen tijpouas ipan Biblia?
Tlaj tijneki ma mitspaleui tlen Biblia kiijtoua, amo san moneki tijpouas, nojkia moneki timoyoliljuis (Josué 1:8). Kema tijpojtias uelis timotlatsintokis: “¿Tlake nechmachtia tlen Jehová ni versículos? ¿Kenijkatsa uelis nijchiuas ipan nonemilis? ¿Kenijkatsa uelis nikinpaleuis sekinok ika tlen nijpojki?”.
3. ¿Kema ueliskia tijpouas Biblia?
¿Tijmati ouij tijpouas Biblia pampa tlauel timotekiuia? Miakej nojkia ouij kimatij. Yeka, xijchiua kampeka kuali tijtekiuis tonali (Efesios 5:16). Ximoiljui tlake hora uelis tijpouas Biblia mojmostla. Sekij ijnalok kipouaj, sekij tlajkotona uan sekij tlayoua. Uan ta, ¿kema ueliskia tijpouas Biblia?
KUALI XIMOMACHTI
Ma tikitakaj tlake uelis mitspaleuis nojua ma mitspakti tijpouas Biblia. Tlen nikaj timomachtis mitspaleuis kuali timokualchijchiuas uan kiampa tlen timomachtijtias mitspaleuis ipan monemilis.
Uelis yolik techpaktijtias tijpouasej Biblia, sanse kej kema yolik techpaktijtia se tlakualistli tlen amo kema tijkuajtoyaj
4. ¿Kenijkatsa uelis mitspaktis tijpouas Biblia?
Maske uelis ouij tijmati tijpeualtis tijpouas Biblia, kena uelis mitspaktis, sanse kej kema yolik mitspaktijtia se tlakualistli tlen amo kema tijkuajtoya. Xijpouakaj 1 Pedro 2:2 uan xijnankilikaj ni tlajtlanili:
-
Tlaj mojmostla tijpouas Biblia, ¿timoiljuia mitspaktijtias uan nojua tijnekis tijpouas?
Xikitakaj nopa VIDEO kampa nesij se keskij telpokamej katli kinpaktik kipouasej Biblia. Teipa xijnankilikaj ni tlajtlanili:
-
¿Kenke nopa telpokamej ouij kimatiyayaj kipouasej Biblia?
-
¿Tlake kinpaleuik mojmostla ma kipouakaj Biblia?
-
¿Tlake kinpaleuik ma kinpakti kipouasej Biblia?
Tlen mitspaleuis tijpeualtis:
-
Xijpoua se Biblia tlen kuali kitlajtolkueptokej uan tlen kipia tlajtoli tlen nima tijkuamachilis. Uelis tijpouas Traducción del Nuevo Mundo ika español.
-
Achtoui xijpoua se tlapoualistli tlen timoiljuia mitspaktis. Kampa kiijtoua “Kej uelis tijpeualtis tijpouas Biblia” xikita tlake tlapoualistli mitspaktiskia tijpouas.
-
Xikijkuilo tlen ya tijpojki. Xikita kampa kiijtoua “Tlen nijpojtia ipan Biblia”, tlen eltok ipan ni amatlajkuiloli.
-
Xijtekiui JW Library®. Tlaj tijtlalis nopa aplicación ipan moteléfono o ipan seyok tlamantli, uelis tijpouas o tijkakis Biblia kampa ueli.
-
Xijtekiui nopa pilamochtsi Tlen techpaleuis timomachtisej toTeotsij iTlajtol. Nopaya eltok mapas uan tablas tlen mitspaleuis nojua ma mitspakti tijpouas Biblia.
5. Achtoui ta moselti ximomachti tlen inkiitasej ipan sejse tlamachtili
Xijpouakaj Salmo 119:34 uan xijnankilikaj ni tlajtlanili:
-
¿Kenke moneki timomaijtos kema tijpouas Biblia o kema timomachtis tlen tikitas iuaya katli mitsmachtia?
¿Tlake uelis tijchiuas uan kiampa mitspaleuis tlen timomachtis? Kema moselti timomachtis xijchiua ni tlamantli:
-
A. Xijpoua nopa achtoui párrafos tlen uala ipan sejse tlamachtili.
-
E. Xijtemo uan xijpoua nopa textos. Teipa xikita kenijkatsa nopa tlamachtili mokixtijtok ipan nopa textos.
-
I. San xijuasani se keski tlajtoli tlen kinankilia nopa tlajtlanili. Tlaj kiampa tijchiuas, mitspaleuis nima tijkuamachilis kema timomachtis iuaya katli mitsmachtia.
¿Tijmajtoya?
Maske Jehová itlajtoltemakauaj kitekiuijtokej miak Biblias, tlauel kinpaktia Traducción del Nuevo Mundo pampa kuali kitlajtolkueptokej, nima tijkuamachilis uan kipia toTeotsij itoka (xikita nopa tlamachtili tlen eltok ipan jw.org: “¿Kipixtokej ininBiblia Jehová itlajtoltemakauaj?”).
TLEN SEKINOK KIIJTOUAJ: “Tlauel ouij nijmati nimomachtis Biblia pampa tlauel nimotekiuia uan amo nechpaktia nijpouas”.
-
¿Ta tlake timoiljuia?
TLEN TIMOMACHTIJKEJ
Tlaj tijneki ma mitspaleui tlen timomachtis ipan Biblia, ximoiljui tlake hora uelis tijpouas mojmostla, xikiljui toTeotsij ma mitspaleui tijkuamachilis uan achtoui moselti ximomachti tlen teipa tikitas iuaya katli mitsmachtia.
¿Tlake tijyekok?
-
¿Tlake moneki tijchiuas tlaj tijneki ma mitspaleui tlen timomachtis ipan Biblia?
-
¿Tlake hora ueliskia tijpouas uan timomachtis Biblia?
-
¿Kenke achtoui moneki moselti timomachtis tlen teipa tikitas iuaya katli mitsmachtia?
NOJKIA XIKITA NI
Xikompaui se keski tlamantli tlen mitspaleuis ma mitspakti tijpouas Biblia.
“Tlen mitspaleuis ma mitspakti tijpouas Biblia” (Tlen Tematiltia, tlamachtili)
Xikita eyi tlamantli tlen uelis tijchiuas kema tijpouas Biblia.
Xikita tlake mitspaleuis ma mitspakti tijpouas Biblia.
Xikita tlake kiijtouaj se keskij maseualmej katli uejkajkia kipouaj Biblia.
¿Kenijkatsa uelis timomachtis Biblia tlaj tijneki ma mitspaleui? (2:06)
Tlen nojkia mitspaktis tikitas
TLEN KINEKIJ KIMATISEJ
¿Kenijkatsa Jehová itlajtoltemakauaj tlamachtiaj ika Biblia?
Kema Jehová itlajtoltemakauaj mitsmachtisej ika Biblia amo mitsinamasej uan uelis tijtekiuis Biblia tlen ta tijnekis. Nojkia uelis tikintlaneuis sekinok kej mochampoyouaj o mouampoyouaj.
