LESSION 11

Come te pol imparar ancora de pi quando te ledi la Bìblia?

SONAR

Te ga belche sucedesto de gaver un laoro tanto grando de far che no te savei gnanca come scominsiarlo? Alora, te ghè pensà che saria pi fàcile se te lo fessi un pochetin ala volta. Pol esser che pensemo la medèsima roba sora leder la Bìblia. Fursi, pensemo che la ze massa granda e che no saremo boni de léderla tuta. Col aiuto de questa lession, te piaserà leder e studiar la Bìblia.

1. Parché ghemo de leder sempre la Bìblia?

La persona che la lede sempre la Bìblia, che la ze la lege de Geovà, la ze pi felice e la vive meio. (Ledi Salmo 1:1-3.) Par scominsiar a leder la Bìblia, proa lederla un pochetin tuti i giorni. Quando te scominsi a capir quel che te ledi, te gavarè ancora pi voia de seitar a lederla.

2. Come che te pol imparar ancora de pi de quel che te ledi?

Noantri ndaremo imparar ancora de pi se pensemo sora quel che ledemo nela Bìblia. (Giosuè 1:8) Intanto che te ledi, domàndate: ‘Cossa che questo me insegna sora Geovà? Come che posso meterlo in pràtica nela me vita ? Come che posso doperar questi versìcoli par giutar altre persone?’

3. Quando te podarissi leder la Bìblia?

Te pensi che no te ghè mia tempo par leder la Bìblia? Arquante persone le pensa cossita. Alora, cossa te podarissi far? Te pol doperar meio el tempo che te ghè. (Efesi 5:16) Te pol scòlier una ora par leder la Bìblia tuti i giorni. Par esémpio, arquante persone le lede la Bìblia de matina bonora, altre de mesdì, altre de sera e altre vanti de dormir. Che ora saria meio par ti?

IMPARA DE PI!

Come pol piaserte ancora de pi leder la Bìblia? Come te pol pareciarte ben par el to stùdio dela Bìblia?

Fursi sol ne piaserà magnar una roba dopo che la proemo e seitemo a magnarla. La medèsima roba pol suceder quando ledemo la Bìblia

4. Come pol piaserte leder la Bìblia?

Fursi no ne piase magnar una roba. Ma dopo che la proemo e seitemo a magnarla, la scominsiarà a piaserne. La medèsima roba sucede quando scominsiemo a leder la Bìblia. Fursi, no l’è mia fàcile scominsiar a lederla, ma dopo, ne piaserà farlo. Ledé 1 Piero 2:2, e dopo, parlé sora questo:

Se te scominsi a leder la Bìblia tuti i giorni, te pensi che te piaserà lederla?

Vardé el VÌDEO par veder come che a tante persone ga scominsià a piaserghe leder la Bìblia. Dopo, parlé sora questo:

VÌDEO: Gióveni che i ama la Parola de Dio (5:33)

Parché l’era fadiga par questi gióveni leder la Bìblia?
Cossa che ga giutà questi gióveni a lederla tuti i giorni?
Cossa che li ga giutà a gaver de pi voia de léderla?

Robe che ndarà giutarte a scominsiar a leder la Bìblia:

Scoli una tradussion che la sìpia giusta e fàcile de capir. Proa leder la Tradução do Novo Mundo se ghen’è nela to léngua o in nantra léngua che te sì bon de leder.
Te pol scominsiar a leder la parte che te pensi che te piaserà de pi. Varda arquante idee nel quadro “Come che te pol scominsiar a leder la Bìblia?”
Ricòrdate fin ndove te ghè ledesto. Dopera el quadro “Ricòrdito ndove te te sì fermà?”
Dopera el aplicativo JW Library^®. Te podarè leder e scoltar la Bìblia se te doperi un selular, un tablet o un computador.
Dopera el Apéndisse che ghen’è nela Tradução do Novo Mundo. In questo apéndisse, ghen’è mapi, quadri, e una parte che la spiega tante parole.

5. Paréciate par el to stùdio dela Bìblia

Ledé Salmo 119:34, e dopo, parlé sora questo:

Parché che l’è meio pregar a Geovà vanti de leder la Bìblia o de pareciarte par el to stùdio?

Come che te pol imparar ancora de pi nel to stùdio dela Bìblia? Quando te vè pareciarte par el to stùdio dela Bìblia, proa far cossita:

Ledi i primi paràgrafi dela prima pàgina dela lession.
Ledi i versìcoli dela Bìblia che ghen’è lì e proa veder come i te giuta a capir quel che te sì drio studiar.
Meti un segnal ndove che ghen’è la risposta ala domanda. Cossita, te sarè bon de parlar sora questo cola persona che fà el stùdio con ti.

Seto questo?

Le Testimònie de Geovà le dopera arquante tradussion dela Bìblia, ma le dopera de pi la Tradução do Novo Mundo parché la ze pi giusta, pi fàcile de capir e la dopera el nome de Dio. — Varda nel jw.org “La Bìblia dele Testimònie de Geovà la ze difarente dele altre?”

FURSI TE GHÈ BELCHE SCOLTÀ: “Massa fadiga studiar la Bìblia. Mi go massa laori de far e son sempre straco.”

Cossa che te pensi sora questo?

COSSA CHE TE GHÈ IMPARÀ?

Par imparar ancora de pi dela Bìblia, sfòrsate par torte el tempo par lederla, prega par capir quel che te ledi e paréciate par el to stùdio dela Bìblia.