LEKSYON 11
Kon Paonan-o Mo Mapapahimulosan hin Bug-os an Biblia
Karuyag mo ba magtikang hin daku nga proyekto pero inabat mo nga makuri ito hinduro? Para diri ka makurian, bangin imo ito bahin-bahinon ha gudti nga buruhaton. Sugad liwat hito an pagbasa ha Biblia. Bangin magpakiana ka, ‘Paonan-o ako magtitikang?’ Hini nga leksyon, uusisahon naton an pipira nga simple nga paagi nga puydi mo buhaton nga mabulig ha imo nga mag-enjoy ha pagbasa ngan pag-aram ha Biblia.
1. Kay ano nga dapat naton basahon hin regular an Biblia?
An tawo nga regular nga nagbabasa han Biblia, o han “balaud ni Jehova,” magigin malipayon ngan malampuson. (Basaha an Salmo 1:1-3.) Ha pagtikang, puydi ka magbasa hin pipira la ka minuto kada adlaw. Kon mas pamilyar ka na ha Pulong han Dios, mas mag-i-enjoy ka ha imo pagbasa ha Biblia.
2. Ano an mabulig ha imo nga magpahimulos ha pagbasa ha Biblia?
Basi magpahimulos hin bug-os ha pagbasa ha Biblia, kinahanglan umundang kita hin madaliay ngan hunahunaon an aton ginbabasa. Kinahanglan basahon ngan “pamalandungon” naton ito. (Josue 1:8, footnote) Samtang nagbabasa ka, ipakiana ini ha imo kalugaringon: ‘Ano an igintututdo hini ha akon mahitungod kan Jehova nga Dios? Paonan-o ko ini maiaaplikar ha akon kinabuhi? Paonan-o ko magagamit ini nga mga teksto ha pagbulig ha iba?’
3. Paonan-o ka magkakaada panahon ha pagbasa ha Biblia?
Nakukurian ka ba pamiling hin panahon ha pagbasa ha Biblia? Damu ha aton an nakukurian. Pangalimbasugi nga ‘gamiton ha pinakamaopay nga paagi an imo panahon.’ (Efeso 5:16) Mahihimo mo ini pinaagi ha paggahin hin espisipiko nga panahon ha pagbasa ha Biblia kada adlaw. An iba nagbabasa han Biblia temprano ha aga. An iba naman nagbabasa bangin durante han ira lunch break. May iba liwat nga nagbabasa han Biblia ha gab-i antes kumaturog. Ano an pinakamaopay nga panahon han pagbasa para ha imo?
DUGANG NGA USISAHA
Hibaroi kon paonan-o magigin mas makapainteres an imo pagbasa ha Biblia. Hibaroi kon paonan-o mag-aandam hin maopay basi magpahimulos hin bug-os ha imo pag-aram ha Biblia.
Sugad la nga puydi naton maruyagan an iba-iba nga pagkaon, puydi liwat kita mag-enjoy ha pagbasa ha Biblia
4. Kon paonan-o ka mag-i-enjoy ha pagbasa ha Biblia
Bangin diri masayon an pagtikang ha pagbasa ha Biblia. Pero puydi kita magkaada hin ‘hingyap’ ngan mag-enjoy ha pagbuhat hito, sugad la nga puydi mag-enjoy an usa ha pagkaon nga siyahan pa la niya nga natilawan. Basaha an 1 Pedro 2:2, katapos, hisguti niyo ini nga pakiana:
-
Kon babasahon mo an Biblia kada adlaw, ha imo hunahuna, mag-i-enjoy ka ba hito ngan mas magbabasa pa?
I-play an VIDEO basi hibaroan kon paonan-o na-enjoy han pipira nga batan-on an pagbasa ha Biblia. Katapos, hisguti niyo an masunod nga mga pakiana.
-
Ha video, ano nga mga ulang an nalamposan han mga batan-on?
-
Ano an nakabulig ha ira nga padayon nga basahon hin regular an Biblia?
-
Ano an ira ginhimo basi magin mas makapainteres an ira pagbasa ha Biblia?
Mga suhestyon nga mabulig ha imo basi makagtikang:
-
Pagpili hin hubad nga matataporan ngan moderno an mga pulong. Testingi pagbasa an Bag-o nga Kalibotan nga Hubad kon may-ada ito ha iyo yinaknan.
-
Pagtikang pagbasa ha mga bahin han Biblia nga makapainteres gud ha imo. Basi magkaada ka hin ideya, kitaa an tsart nga “Kon Paonan-o Titikangan an Pagbasa ha Biblia.”
-
Markahi an imo nabasa. Gamita an tsart nga “Markahi an Natapos Na ha Imo Pagbasa ha Biblia” dinhi hini nga publikasyon.
-
Gamita an JW Library®nga app. Pinaagi hito, puydi mo basahon ngan pamatian an Biblia bisan hain ka, gamit an smartphone o iba pa nga gadyet.
-
Gamita an mga apendise ha Bag-o nga Kalibotan nga Hubad. May-ada ito mga mapa, tsart, ngan may glossary basi mas makapainteres an imo pagbasa.
5. Pangandam para ha imo pag-aram ha Biblia
Basaha an Salmo 119:34, katapos, hisguti niyo ini nga pakiana:
-
Kay ano nga maopay nga mag-ampo antes magbasa ha Biblia o mangandam para ha imo pag-aram ha Biblia?
Paonan-o ka magpapahimulos hin bug-os ha tagsa nga pag-aram? Samtang nag-aandam ka ha usa nga leksyon hini nga pag-aram, testingi an masunod:
-
Basaha an siyahan nga bahin han leksyon.
-
Pamilnga ngan basaha an mga teksto, ngan pangalimbasugi nga masabtan kon ano an koneksyon hito ha gin-aadman.
-
Markahi an importante nga mga pulong nga baton ha tagsa nga pakiana; mabulig ini ha imo kon hisgotan na niyo an leksyon kaupod han nagdudumara ha imo han pag-aram.
Maaram ka ba?
An mga Saksi ni Jehova nagamit hin iba-iba nga hubad han Biblia. Pero naruruyagan gud namon an Bag-o nga Kalibotan nga Hubad han Baraan nga Kasuratan kay husto ito, klaro, ngan nagamit han ngaran han Dios.—Kitaa an Web article nga “May Kalugaringon ba nga Biblia an mga Saksi ni Jehova?”
AN IBA NASIRING: “An pag-aram ha Biblia makuri hinduro. Waray ako panahon o ginkakapoy ako.”
-
Ano an imo masisiring?
SUMARYO
Basi magpahimulos hin bug-os ha Biblia, paggahin hin panahon nga basahon ito, pag-ampo basi masabtan an imo ginbabasa, ngan pag-andam para ha tagsa nga pag-aram ha Biblia.
Repaso
-
Ano an mabulig ha imo basi magpahimulos hin bug-os ha Biblia?
-
San-o ka puydi magbasa ngan mag-aram han Biblia?
-
Kay ano nga maopay nga mag-andam para ha tagsa nga pag-aram ha Biblia?
DUGANG NGA IMPORMASYON
Repasoha an pipira nga paagi nga makakabulig ha imo nga mas magpahimulos ha pagbasa ha Biblia.
“Kon Paonan-o Mas Magpapahimulos ha Pagbasa han Biblia” (An Barantayan Num. 1 2017)
Hibaroi an tulo nga paagi ha pagbasa ha Biblia.
“Paonan-o Ako Mabubuligan han Biblia?—Bahin 1: Basaha an Imo Biblia” (Web article)
Hibaroi kon paonan-o ka mag-i-enjoy ha pagbasa ha Biblia.
Hibaroi an pipira nga mga suhestyon tikang ha maiha na nga mga nagbabasa han Biblia.
Bangin Maruyagan Mo Liwat
KOMON NGA MGA PAKIANA
Ano an Pag-aram ha Biblia nga Igintatanyag han mga Saksi ni Jehova?
Ha libre nga interactive nga programa nga igintatanyag han mga Saksi ni Jehova, puydi mo gamiton an bisan ano nga bersyon han Biblia. Ayaw pag-alang nga paupdon an imo bug-os nga pamilya o an imo kasangkayan.
